جازعى ماۋسىمدا الاكولگە دەمالاتىندار ءۇشىن كولىك قاتىناسى ايتارلىقتاي جەڭىلدەدى. كولىك مينيسترلىگىنىڭ مالىمەتىنشە, بيىل دەمالىس ورنىنا قوسىمشا پويىز باعىتتارى مەن اۋە رەيستەرى قوسىلادى. سونداي-اق, رەسپۋبليكالىق ماڭىزى بار اۆتوجولدار دا ساياحاتشىلارعا ساقاداي ساي.
اباي وبلىسىنان الاكولگە قالاي جەتۋگە بولادى؟
ءتىزىمنىڭ باسىندا تەمىرجول تۇر. ماسەلەن, سەمەي – دوستىق اراسىندا №457/458 پويىزى تاق كۇندەرى قاتىنايدى. سونىمەن قاتار, اقتوعاي ارقىلى وتەتىن №6941/6942 پويىزى كۇن سايىن جۇرەدى. بۇل باعىتتار اباي ءوڭىرىنىڭ تۇرعىندارى ءۇشىن ەڭ ءتيىمدى جولداردىڭ ءبىرى سانالادى.
ال اۆتوكولىكپەن قاتىناعىسى كەلەتىندەرگە دە جول اشىق. اباي وبلىسى ارقىلى الاكولگە جەتۋدىڭ ەڭ قولايلى جولى – «تاسكەسكەن – باقتى» اۆتوجولىمەن ماقانشى اۋىلىنا دەيىن (133 كم), ودان ءارى جاڭارتىلعان «ماقانشى – جالاڭاشكول» جولىمەن الاكولدىڭ سولتۇستىك جاعالاۋىنا جەتۋگە بولادى. بۇل باعىتتاعى اسفالت جاڭارتىلعان, جول ساپاسى دا جاقسى.
بۇعان ەندى اۋە قاتىناسى قوسىلدى. SCAT اۋە كومپانياسى 1 ماۋسىمنان باستاپ ۇرجارعا سۋبسيديالانعان رەيستەردى باستايدى. الماتى مەن استانا قالالارىنان اپتاسىنا 6 رەت ۇشاتىن بۇل رەيستەردىڭ بيلەت قۇنى قولجەتىمدى: الماتى – ءۇرجار باعىتى بويىنشا 14 مىڭ تەڭگە, استانا – ءۇرجار باعىتىندا 16 مىڭ تەڭگە. ءۇرجاردان كولگە دەيىنگى قاشىقتىق – نەبارى 50 شاقىرىم.
جالپى جازعى ماۋسىمدا الاكولگە پويىزبەن بارۋعا 13 باعىت قاراستىرىلعان. ولاردىڭ توعىزى كەزەڭدىك. الماتىدان – بەس, استانادان – ءۇش, پاۆلودار, قىزىلوردا, وسكەمەننەن قاتىنايتىن پويىزدار بار. ال اۆتوموبيلمەن باراتىندار ءۇشىن «تالدىقورعان – وسكەمەن» كۇرە جولى – تاعى ءبىر بالاما جول. جەتىسۋ جاعىنان ءۇشارال ارقىلى, ودان كەيىن جاڭارتىلعان 180 شاقىرىمدىق ء«ۇشارال – دوستىق» جولىمەن كولدىڭ وڭتۇستىك جاعالاۋىنا جەتۋگە بولادى.
اباي وبلىسى