بۇگىن ەلىمىزدىڭ بارلىق مەكتەبىندە ءبىر مەزگىلدە ء«بىلىمىم - وتانىما» بىرىڭعاي سىنىپ ساعاتى ءوتتى. 2024-2025 وقۋ جىلىن سالا ءمينيسترى قورىتىندىلادى, دەپ جازادى Egemen.kz.
پرەزيدەنت باستاماسىمەن ەلىمىزدە ءبىر جىل ىشىندە رەكوردتىق كورسەتكىش - 257 جاڭا مەكتەپ اشىلعان. قازاقستان وقۋشىلارى حالىقارالىق ءبىلىم دودالارىندا 362 مەدال يەلەنگەن, ونىڭ 41-ءى - التىن مەدال.
«ەل تاريحىندا العاش رەت كوللەدج ستۋدەنتتەرىنەن قۇرالعان قازاقستاننىڭ ۇلتتىق قۇراماسى فرانتسيادا وتكەن 47-ءشى WorldSkills چەمپيوناتىندا زور تابىسقا جەتىپ, 7 مەدالون يەلەندى. مۇنىڭ بارلىعى وتاندىق ءبىلىم بەرۋ جۇيەسىندەگى جۇيەلى رەفورمالار مەن قاجىرلى ەڭبەكتىڭ ناقتى جەمىسى», دەدى وقۋ-اعارتۋ ءمينيسترى.
مينيستر بيىل ءبىلىم بەرۋ سالاسىندا العاش رەت بىردەن ەكى پەداگوگ - گۇلجانار نۇرپەيىسوۆا مەن ەلمارا ترايسوۆا «قازاقستاننىڭ ەڭبەك ەرى» اتاعىنا يە بولعانىن ەرەكشە اتاپ ءوتتى.
وسى جىلداعى ماڭىزدى باستامالاردىڭ ءبىرى بالالاردىڭ قۇقىقتارىن قورعاۋ جۇيەسىنىڭ نىعايا ءتۇسۋى. مەملەكەت بالالاردىڭ ءبىلىم, تاربيە الۋىنا, دامۋىنا جانە ولاردى قورعاۋعا باعىتتالعان ءۇش نەگىزگى زاڭ قابىلدادى. سونداي-اق مينيستر بارلىق اتا-انالعا كورسەتكەن قولداۋلارى ءۇشىن العىس ايتتى. 217 مىڭ مەكتەپ ءبىتىرۋشى مەن 173 مىڭ كوللەدج تۇلەگىنە جارقىن بولاشاق تىلەپ, بارشا شاكىرتتى وقۋ جىلىنىڭ اياقتالۋىمەن قۇتتىقتادى.