مەملەكەتتىڭ ەڭ قىمبات قازىناسى ادام دەسەك, ءزۇبارجات تاسى – بالا. ونىڭ اماندىعى مەن ەرتەڭگى ەركىن ءومىرى ءبارىمىزدىڭ موينىمىزدا. جاس ۇرپاقتىڭ جانارىنداعى جالىندى جاعا ءبىلۋ – باستى پارىزىمىز. ول ءۇشىن بالانىڭ كوڭىل كۇمبەزىنە باسا-كوكتەپ كىرمەي, تانىم تابالدىرىعىن ادەپپەن اتتاۋ كەرەك. وسىنداي ىزگى نيەتپەن مەملەكەتىمىز بالالارعا, ولاردىڭ قۇقىنىڭ قورعالۋىنا باسا نازار اۋدارىپ وتىر. ماسەلەن, 22-30 مامىر ارالىعىندا ەلىمىزدىڭ بارلىق وڭىرىندە حالىقارالىق بالالاردى قورعاۋ كۇنىنە ارنالعان كەڭ اۋقىمدى ءىس-شارالار ۇيىمداستىرىلادى. بيىل بۇل باستاما «قازاقستان بالالارى» دەگەن ورتاق ۇرانمەن ءوتىپ جاتىر.
ەلىمىز بويىنشا بارلىق اۋىل, اۋدان جانە قالا بۇل مەرەكەلىك باستاماعا بەلسەنە قاتىسادى. ءىس-شارالار بالالاردى ەلدىڭ مادەني, ءبىلىم بەرۋ جانە قوعامدىق ومىرىنە كەڭىنەن تارتۋعا باعىتتالعان. مەرەكە كۇندەرى وبلىس, قالا جانە اۋدان اكىمدەرىنىڭ بالالارمەن كەزدەسۋلەرى وتەدى. بۇل جۇزدەسۋدە بالالار ءوز ۇسىنىستارىن ايتىپ, ارمان-ماقساتتارىمەن بولىسە الادى. سونىمەن قاتار وسى كۇندەرى جاڭا ءبىلىم بەرۋ نىساندارىنىڭ اشىلۋى جوسپارلانعان. تەاتر, مۋزەي, ساياباقتار مەن كينوتەاترلارعا تەگىن نەمەسە جەڭىلدىكپەن بارۋ مۇمكىندىگى قاراستىرىلعان. وعان قوسا بالالارعا قولداۋ كورسەتۋگە باعىتتالعان وڭىرلىك قايىرىمدىلىق اكتسيالارى ۇيىمداستىرىلادى.
«قازاقستان بالالارى» ۇلتتىق ونكۇندىگى بالالاردىڭ ءوسىپ-ونۋىنە كوڭىل بولۋگە باعىتتالعان. ءىس-شارالاردىڭ ماقساتى بالدىرعاندارعا قۋانىش سىيلاۋ عانا ەمەس, سونىمەن قاتار ولاردىڭ بالالىق شاعىنا قامقورلىق كورسەتۋ – مەملەكەتتىك ساياساتتىڭ باستى باسىمدىعى ەكەنىن كورسەتۋ.
وسى ماقساتتا استاناداعى «جانۇيا» وتباسىن قولداۋ ورتالىعىندا «اكەم – تىرەگىم, انام – جۇرەگىم» اتتى قايىرىمدىلىق ءىس-شاراسى ءوتتى. جيىن اياسىندا پسيحولوگ پەن زاڭگەر كەڭەستەرى, كونتسەرتتىك جانە تەاتر قويىلىمدارى, شەبەرلىك ساعاتتارى مەن قىزىقتى ويىندار ۇيىمداستىرىلدى. سونداي-اق الەۋمەتتىك وسال وتباسىلاردان شىققان بالالارعا سىيلىقتار تابىستالدى.
نۇرا اۋدانى بويىنشا وتباسىن قولداۋ ورتالىعى الەۋمەتتىك سۇيەمەلدەۋ ءبولىمىنىڭ باسشىسى اقىرىس ادىلحانقىزىنىڭ ايتۋىنشا, ورتالىق اشىلعالى بەرى بۇل قىزمەت 965 وتباسىنا كومەك كورسەتكەن.
«جانۇيا» وتباسىن قولداۋ ورتالىعىندا الەۋمەتتىك سۇيەمەلدەۋ, كەڭەس بەرۋ, زاڭگەرلىك جانە پسيحولوگيالىق كومەك كورسەتۋ قىزمەتتەرى قاراستىرىلعان. بارلىعى تەگىن. سونىمەن قاتار مۇگەدەكتىگى بار جاندارعا الەۋمەتتىك قىزمەتتەر پورتالى ارقىلى تەحنيكالىق كومەكشى قۇرالدارعا ءوتىنىش بەرۋ, كەڭەس الۋ بويىنشا دا قولداۋ كورسەتەمىز. بۇگىنگى جيىنعا دا الەۋمەتتىك سۇيەمەلدەۋدە تۇرعان وتباسىلار مەن ولاردىڭ بالالارى قاتىسىپ جاتىر. ءىس-شارانىڭ نەگىزگى ماقساتى – اتا-انا مەن بالا اراسىنداعى بايلانىستى نىعايتۋ, بالالار ءۇشىن قولايلى ورتا قالىپتاستىرۋ جانە اتا-انامەن اشىق ديالوگ قۇرۋ مادەنيەتىن دامىتۋ. جالپى, مۇنداي ون كۇندىك باعدارلاما بيىل العاش رەت قولعا الىنىپ وتىر», دەدى ا.ادىلحانقىزى.
ءيا, بۇل جيىندار – جاي عانا ءىس-شارا ەمەس. بۇل – بالا باقىتىنىڭ باستى قۇندىلىق ەكەنىن كورسەتەتىن قوعامدىق ۇندەۋ. بالالارعا قامقورلىق – ءاربىر ازاماتتىڭ ورتاق مىندەتى, ادامگەرشىلىك بورىشى. ءار بالا باقىتتى بولۋعا لايىق.