پوليتسيا سوتقا دەيىنگى ءوندىرىستى توقتاتىپ, وقۋشىنى ارقاسىنان وتكىر زاتپەن تۇيرەگەن ۇستاز دەنە جاراقاتىن سالماعان دەگەن قورىتىندى جاسادى, دەپ حابارلايدى Egemen.kz.
بيىلعى قاڭتار ايىندا پاۆلودار قالاسىندا تاقتا الدىنا شىققان وقۋشىنى ماتەماتيكا مۇعالىمى ارقاسىنان ۇشكىر زاتپەن (بۇراندالى شەگەمەن) تۇيرەپ كەتكەنى تۋرالى وقيعا الەۋمەتتىك جەلى قولدانۋشىلارىن شۋلاتقان ەدى.
بەينەجازبادان بايقاعانىمىزداي, ماتەماتيكا ءپانىنىڭ مۇعالىمى تاقتاعا شىعىپ, تاپسىرمانى شەشىپ تۇرعان ەر بالانىڭ ارتىنان كەلىپ, الدەنەمەن تۇيرەپ وتەدى. وقۋشىنىڭ اۋىرسىنىپ قالعانى بايقالادى ءارى ونىڭ الدىندا مۇعالىمنىڭ شكافقا جاقىنداپ كەلىپ, ودان بۇراندالى شەگەنى (شۋرۋپ) بوساتىپ العانى دا كامەراعا ءتۇسىپ قالعان.
پوليتسيا قىلمىستىق ءىس قوزعاپ, مەكتەپ اكىمشىلىگى اتالعان مۇعالىممەن ەڭبەك شارتىن بۇزىپ, جۇمىستان شىعارىپ جىبەرگەن ەدى.
الەۋمەتتىك جەلى قولدانۋشىلارى مەكتەپ باسشىلىعىنىڭ شەشىمى دۇرىس ەمەس دەگەن بايلام جاسادى. ال مەكتەپ اتا-انالارى ۇستازدى قولداۋ ءۇشىن قول جيناماق بولدى.
اقىر-سوڭى پەداگوگ وقۋشىنىڭ اتا-اناسىنان كەشىرىم سۇراپ, ارادا ەكى كۇن وتكەندە جۇمىسقا قايتادان الىندى.
ارادا ءۇش جارىم ايدان استام ۋاقىت وتكەندە پوليتسيا ءىستىڭ سوتقا جەتپەي دوعارىلعانىن ءمالىم ەتىپ وتىر.
- اتالعان وقيعا بويىنشا سوتقا دەيىنگى تەرگەۋ شارالارى اياقتالىپ, ءىس توقتاتىلدى. ماتەريالدار وندىرىسىندە بۇل ءىستىڭ قۇرامىندا قىلمىستىق زاڭ بۇزۋشىلىقتىڭ جوق ەكەنى انىقتالدى. كامەلەتكە تولماعان ەر بالاعا دەنە جاراقاتىن كەلتىرۋدىڭ قانداي دا ءبىر دەرەكتەرى انىقتالماعانى سوت-مەديتسينالىق ساراپتامانىڭ قورىتىندىسىمەن, كامەلەتكە تولماعاندى كۋالاندىرۋدى جۇرگىزگەن ساراپشىنىڭ جاۋاپ الۋ حاتتاماسىمەن جانە كابينەتتەن تۇسىرىلگەن بەينەجازبا ارقىلى راستالدى,-دەپ حابارلادى وڭىرلىك پوليتسيا دەپارتامەنتىنىڭ ءباسپاسوز قىزمەتىنەن.