قازاقستاندا ءدارى-دارمەك پەن مەديتسينالىق بۇيىمداردى تىركەۋ مەرزىمىن ەداۋىر قىسقارتاتىن ء«بىر تەرەزە» قاعيداتى بويىنشا پيلوتتىق جوبا ىسكە قوسىلدى. جاڭا باستاما تسيفرلىق دامۋ جانە دەنساۋلىق ساقتاۋ مينيسترلىكتەرىنىڭ بىرلەسكەن جۇمىسى ناتيجەسىندە جۇزەگە اسىرىلىپ وتىر, دەپ حابارلايدى Egemen.kz.
مينيسترلىكتىڭ حابارلاۋىنشا, بۇل باستاما ونىمدەردىڭ نارىققا شىعۋ مەرزىمىن ەداۋىر قىسقارتىپ, قايتالاناتىن اكىمشىلىك راسىمدەردى جويۋعا مۇمكىندىك بەرەدى.
«قازىرگى تاڭدا ءدارى-دارمەكتەرگە ساراپتاما جۇرگىزۋ 210 كۇنگە دەيىن, باعا قالىپتاستىرۋ – 60 جۇمىس كۇنىنە دەيىن, ال كاسىبي ساراپتاما – 50 جۇمىس كۇنىنە دەيىن سوزىلۋى مۇمكىن, ال كومپوزيتتىك مەملەكەتتىك قىزمەتتى قولدانۋ ارقىلى بۇل پروتسەستەر بىرىكتىرىلىپ, پاراللەل تۇردە 100 جۇمىس كۇنىنەن اسپاي وتەتىن بولادى», دەلىنگەن حابارلامادا.
ايتا كەتەيىك, كومپوزيتتىك مەملەكەتتىك قىزمەت ەرىكتى ءارى بالامالى نەگىزدە ەنگىزىلەدى جانە قولدانىستاعى ساراپتاما, تىركەۋ جانە باعا بەلگىلەۋ مەحانيزمدەرىمەن قاتار قولدانىلادى. سونىمەن قاتار دارىلىك زاتتاردى قازاقستاننىڭ ۇلتتىق دارىلىك فورمۋليارىنا ەنگىزۋ ءۇشىن كاسىبي ساراپتامادان وتكىزۋدى دە قاراستىرادى.
جاڭا جۇيە دۇنيەجۇزىلىك دەنساۋلىق ساقتاۋ ۇيىمىمەن بىرلەسكەن الدىن الا بىلىكتەندىرۋ جانە تىركەۋ راسىمدەرىن دە قامتيدى. بۇل ەۋروپالىق وداق, اقش, ۇلىبريتانيا, جاپونيا سياقتى قاتاڭ رەتتەۋشى جۇيەلەرى بار ەلدەردە تىركەلگەن دارىلەر ءۇشىن 15 جۇمىس كۇنىنە دەيىن جەدەلدەتىلگەن ءتارتىپتى قولدانۋعا مۇمكىندىك بەرەدى. وسىنداي جەدەلدەتىلگەن مەرزىمدەر تانىلعان رەتتەۋشى جۇيەلەرى بار ەلدەردە وندىرىلگەن مەديتسينالىق بۇيىمدارعا دا قولدانىلاتىن بولادى.
پيلوتتىق جوبا 2025 جىلدىڭ 1 شىلدەسىنە دەيىن جالعاسادى. ەگەر ونىڭ تيىمدىلىگى دالەلدەنسە, بۇل مودەل تۇراقتى جۇيەگە اينالىپ, نورماتيۆتىك-قۇقىقتىق وزگەرىستەر ەنگىزىلەدى.