وقۋ جىلى قاشان اياقتالادى؟ قورىتىندى ەمتيحاندار قاي كەزدە بولادى؟ حالىقارالىق سايىستاردان قانداي جەتىستىگىمىز بار؟ وسى سۇراقتارعا پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن جيىندا وقۋ-اعارتۋ مينيسترلىگى وكىلدەرى جاۋاپ بەردى.
ءباسپاسوز ءماسليحاتىندا ءسوز العان وقۋ-اعارتۋ مينيسترلىگى ورتا ءبىلىم بەرۋ كوميتەتىنىڭ توراعاسى قانىبەك جۇماشەۆ بيىل مەكتەپ ءبىتىرۋ اتتەستاتىن تۇلەكتەرگە تاپسىرۋ سالتاناتى 18-20 ماۋسىم ارالىعىندا وتكىزىلەتىنىن ايتتى.
– ۇلتتىق ءبىلىم بەرۋ دەرەكتەر قورىنىڭ مالىمەتتەرىنە سايكەس, ەلىمىزدە بارلىعى 8 مىڭنان استام مەكتەپ بار, وندا 4 ملن-عا جۋىق وقۋشى ءبىلىم الادى. بيىل 9-سىنىپتى 364 مىڭنان استام بالا اياقتايدى. ولار الداعى ۋاقىتتا 10-سىنىپتى جالعاستىرۋ نەمەسە كوللەدجگە ءتۇسۋ تۋرالى شەشىم قابىلدايتىن بولادى. سونداي-اق 217 مىڭنان استام تۇلەك 11-سىنىپتى ءتامامدايدى. وقۋ-اعارتۋ ءمينيسترىنىڭ بۇيرىعىنا سايكەس, مەكتەپتەردە وقۋ مەرزىمى ءداستۇرلى تۇردە 34 اپتاعا سوزىلادى, وقۋ 25 مامىردا اياقتالادى. ورتا ءبىلىم بەرۋ ۇيىمدارىندا ساباق اپتاسىنىڭ بەس كۇندىك ەكەنىن ەسكەرە وتىرىپ, 1-10 سىنىپ وقۋشىلارى ءۇشىن سوڭعى ساباق كۇنىن 23 مامىردا ء«بىلىمىم — وتانىما» تاقىرىبىندا بىرىڭعاي سىنىپ ساعاتى فورماتىندا وتكىزۋ تۋرالى ۇسىنىم بەرىلدى. سىنىپ ساعاتىنىڭ ماقساتى – بالالاردى جىل بويى العان ءبىلىمىنىڭ ناتيجەسىن قورىتىندىلاي بىلۋگە تاربيەلەۋ, – دەدى ق.جۇماشەۆ.
ونىڭ ايتۋىنشا, 11-سىنىپ تۇلەكتەرى ءۇشىن سالتاناتتى ءىس-شارا مەكتەپ اكىمشىلىگىنىڭ شەشىمىمەن 23 نەمەسە 24 مامىردا مەكتەپتە وتكىزىلەدى. ونىڭ وتكىزۋ فورماتىن, قاتىسۋشىلار قۇرامىن ءبىلىم بەرۋ ۇيىمدارى انىقتايدى. سونىمەن قاتار وقۋ-اعارتۋ مينيسترلىگىنىڭ بۇيرىعىنا سايكەس 9 جانە 11-سىنىپ وقۋشىلارى ءۇشىن قورىتىندى مەملەكەتتىك ەمتيحانداردىڭ مەرزىمدەرى ايقىندالدى. 9-سىنىپ وقۋشىلارى قورىتىندى مەملەكەتتىك ەمتيحانداردى 29 مامىر مەن 10 ماۋسىم ارالىعىندا تاپسىرادى دەپ جوسپارلانىپ وتىر. ال 11-سىنىپ تۇلەكتەرى 30 مامىر مەن 16 ماۋسىم ارالىعىندا مەملەكەتتىك ءبىتىرۋ ەمتيحاندارىن تاپسىرادى.
– وتكەن جىلى العاش رەت بارلىق مەكتەپتە وقىتۋ تىلىنە قاراماي قازاق ءتىلى جانە ادەبيەت پانىنەن ارالىق ەمتيحاندار ەنگىزىلدى. ارالىق ەمتيحاندى 5, 6, 7, 8, 10-سىنىپ وقۋشىلارى 27-31 مامىر ارالىعىندا تاپسىرادى. وعان 1,7 ملن وقۋشى قاتىسادى. بۇل ەمتيحاننىڭ ماقساتى – وقۋشىلاردىڭ مەملەكەتتىك ءتىلدى وقىپ ۇيرەنۋ دەڭگەيىن انىقتاۋ جانە بىلىمدەرىن شىڭداۋعا داعدىلاندىرۋ. وسى ەمتيحان نەگىزىنەن 4 باعىتتا وتەدى: تىڭدالىم, ايتىلىم, وقىلىم, جازىلىم. بۇل حالىقارالىق «CREF» ستاندارتىنا سايكەس. سونىمەن قاتار مەكتەپ ءبىتىرۋ اتتەستاتتارىن تۇلەكتەرگە تاپسىرۋ سالتاناتىن 18-20 ماۋسىم ارالىعىندا وتكىزۋ جوسپارلانعان, – دەدى كوميتەت توراعاسى.
ال وقۋ-اعارتۋ مينيسترلىگىنىڭ رەسمي وكىلى مەرەكە نۇرمۇحانوۆا وقۋشىلاردىڭ حالىقارالىق وليمپيادالارداعى جەتىستىكتەرىنە توقتالدى.
– 2024–2025 وقۋ جىلىنىڭ باستى جەتىستىكتەرىنىڭ ءبىرى – حالىقارالىق وليمپيادالارعا قاتىسقان ءاربىر ەكىنشى وقۋشىنىڭ ەلگە جۇلدەمەن ورالۋى. ۇلتتىق قۇراما قورجىنىندا – 362 مەدال, ونىڭ ىشىندە 41 التىن بار. بۇل – ءبىلىم ساپاسىنىڭ حالىقارالىق دەڭگەيدە جوعارى باعالانۋىنىڭ ايقىن دالەلى. اتالعان وقۋ جىلىندا 40 پايىزدان استام وقۋشى رەسپۋبليكالىق جانە حالىقارالىق دەڭگەيدەگى زياتكەرلىك ءىس-شارالارعا قاتىستى. وزات وقۋشىلارىمىز ازيا جانە الەمدىك وليمپيادالاردا بىلىمدەرىمەن دارالانىپ, لينگۆيستيكادان – «ەڭ ۇزدىك قاتىسۋشى», فيزيكادان – «ەڭ ۇزدىك قاتىسۋشى قىز», حيميادان — «ەڭ ۇزدىك پراكتيك», ينفورماتيكادان – «ەڭ ۇزدىك ينفورماتيك» اتاندى. سونىمەن قاتار وقۋشىلارىمىز حيميا پانىنەن ەڭ بەدەلدى حالىقارالىق وليمپيادادا – ەكى دۇركىن, «First Global Challenge» روبوتتەحنيكا چەمپيوناتىندا ءۇش دۇركىن الەم چەمپيونى بولدى. تاعى ءبىر ءسۇيىنشى جاڭالىق – قازاقستان – ورتالىق ازيادا جالپى ءبىلىم ساپاسىن باعالاۋ جونىندەگى ۇلتتىق جۇيەسىن حالىقارالىق اككرەديتاتسيادان وتكىزگەن جالعىز ەل اتانىپ, وتاندىق ءبىلىم جۇيەسىنىڭ حالىقارالىق ستاندارتتارعا سايكەستىگىن راستايتىن «RCEC» ساپا بەلگىسىنە يە بولدى, – دەدى م. نۇرمۇحانوۆا.
سپيكەردىڭ سوزىنە سۇيەنسەك, قالا مەن اۋىل مەكتەپتەرى اراسىنداعى الشاقتىقتى ازايتۋ ماقساتىندا «اۋىل مەكتەبى – ساپا الاڭى» جوباسى جۇزەگە اسىرىلىپ وتىر. مىسالى, اقتوبە وبلىسىندا – تسيفرلىق تەحنولوگيالاردى قولدانۋ ارقىلى شاعىن جيناقتى مەكتەپتەردى دامىتۋ, الماتى وبلىسىندا – جاراتىلىستانۋ-ماتەماتيكالىق باعىتتاعى پاندەر بويىنشا ءبىلىم ساپاسىن ارتتىرۋ, ماڭعىستاۋ وبلىسىندا – «وتپان» تىرەك مەكتەپتەرىنىڭ جەلىسىن دامىتۋ, ۇلىتاۋ وبلىسىندا – «Ustaz Ulytau» جوبالارى ىسكە اسىپ جاتىر. سونىمەن بىرگە ءداستۇرلى ءىس-شاراعا اينالعان اۋىل مەكتەپتەرىنىڭ رەسپۋبليكالىق پاندىك وليمپياداسىنا قىزىعۋشىلىق جىل سايىن ارتىپ كەلەدى. سونىڭ ناتيجەسىندە, اۋىل وقۋشىلارىنىڭ جۇلدەلى ورىندارعا يە بولۋ كورسەتكىشى 10 ەسەگە دەيىن ارتىپ, شاعىن جيناقتى اۋىل مەكتەپتەرىندەگى ءبىلىم ساپاسى ورتا ەسەپپەن 7-9%-عا كوتەرىلگەن.
«بۇگىندە ەلىمىزدە 772 تەحنيكالىق جانە كاسىپتىك ءبىلىم بەرۋ ۇيىمىندا 565 مىڭ ستۋدەنت ءبىلىم الادى. ونىڭ ىشىندە 173 مىڭ تۇلەك بيىلعى جىلى ەڭبەك نارىعىنا ديپلوممەن شىعادى دەپ جوسپارلانىپ وتىر. 2024 جىلى مامان دايارلاۋعا گرانت كولەمى 10 مىڭ ورىنعا ارتتى, بيىل 100 پايىزعا جەتەدى. قىركۇيەك ايىنان باستاپ ستۋدەنتتەردىڭ شاكىرتاقىسى 2 ەسەگە ءوستى. ەلىمىزدىڭ تاريحىندا العاش رەت كوللەدج ستۋدەنتتەرىنەن قۇرالعان ۇلتتىق قۇراما فرانتسيادا وتكەن 47-ءى حالىقارالىق «WorldSkills» چەمپيوناتىندا 6 ەرەكشەلىك مەدالونى مەن «ۇلت ۇزدىگى» اتالىمىن جەڭىپ الدى. ەلىمىز جۇمىسشى كادرلاردى دايارلاۋدا الەمدىك دەڭگەيگە شىقتى. وقۋ-اعارتۋ ءمينيسترى عاني بەيسەمباەۆتىڭ قىتاي حالىق رەسپۋبليكاسىنا جاساعان جۇمىس ساپارىنىڭ اياسىندا حالىقارالىق بىلىكتىلىگى بار مامانداردى دايارلايتىن قازاقستان-قىتاي كاسىپتىك-تەحنيكالىق كوللەدجىن قۇرۋ تۋرالى كەلىسىمگە قول جەتكىزىلدى», دەدى وقۋ-اعارتۋ مينيسترلىگىنىڭ رەسمي وكىلى, ءباسپاسوز حاتشىسى.