جەتىسۋ وبلىسىنىڭ تۇرعىندارى تالدىقورعان مەن تەكەلى قالالارى اراسىنداعى تەمىرجول جەلىسىن جولاۋشىلار تاسىمالى ءۇشىن پايدالانۋدى سۇراپ, جالپىۇلتتىق سوتسيال-دەموكراتيالىق پارتياسىنا جۇگىنگەن. وسىعان بايلانىستى پارتيا دەپۋتاتتارى كولىك مينيسترىنە ساۋال جولداپ, ءماجىلىستىڭ جالپى وتىرىسىندا وسى ماسەلەنى كوتەردى, دەپ جازادى Egemen.kz.
جسدپ دەپۋتاتتارى ناۋرىز سايلاۋباي, اسحات راحىمجانوۆ, نۇرلان اۋەسباەۆ جانە اجار ساعاندىقوۆا كولىك ءمينيسترى مارات قاراباەۆتىڭ اتىنا جولداعان دەپۋتاتتىق ساۋالىندا تالدىقورعان مەن تەكەلى قالالارىن بايلانىستىراتىن تەمىرجول جەلىسىن جولاۋشىلارعا دا قولجەتىمدى ەتۋ قاجەتتىگىن ايتتى. ەكى قالا اراسى نەبارى 50 شاقىرىم بولعانىمەن, قازىرگى ۋاقىتتا بۇل باعىتتا تەك جۇك پويىزدارى عانا قاتىنايدى. تۇرعىندار قولايسىز ءارى قاۋىپتى جولمەن جۇرۋگە ءماجبۇر. سەبەبى ءوڭىردىڭ تاۋلى گەوگرافيالىق ەرەكشەلىگىنە بايلانىستى اۆتوكولىك قاتىناسى ءجيى اپاتتى جاعدايلارعا ۇشىرايدى. كولىك اپاتتارىنان ادام شىعىنى دا از ەمەس, اسىرەسە بۇل جاعداي كوكتەم, كۇز جانە قىس ايلارىندا ءجيى كەزدەسەدى.
پارتيانىڭ جەتىسۋ وبلىستىق فيليالى بۇل ماسەلەنى قوعامدا بىرنەشە مارتە تالقىلاپ, 2023–2024 جىلدارى ارالىعىندا قوعامدىق تىڭداۋلار مەن دوڭگەلەك ۇستەلدەر وتكىزگەن. قاتىسۋشىلاردىڭ ورتاق پىكىرى – تەكەلى مەن تالدىقورعان اراسىندا جولاۋشىلار پويىزىن جۇرگىزۋ قاجەتتىلىگى. سونىمەن قاتار, تۇرعىندار «سارىارقا – جەتىسۋ» باعىتى بويىنشا جاڭا مارشرۋت اشۋدى سۇراپ وتىر. ەگەر مۇنداي باعىت ىسكە قوسىلسا, ءوڭىردىڭ كولىك قولجەتىمدىلىگى ارتىپ, تۋريستىك جانە ەكونوميكالىق الەۋەتى جاندانا تۇسەر ەدى.
ساۋالدا تەمىرجول باعىتى تەكەلى – قارابۇلاق – كوكسۋ – ۇشتوبە – ماتاي – لەپسى – اقتوعاي – ساياق – بالقاش – مويىنتى – اقادىر – قاراعاندى – استانا – بۋراباي جەلىسىمەن جۇرەتىن ءىرى مارشرۋت رەتىندە ۇسىنىلعان. بۇل ەلدىڭ ەكى ءىرى تۋريستىك ايماعىن بايلانىستىراتىن ماڭىزدى كولىك تورابىنا اينالار ەدى. دەپۋتاتتاردىڭ ايتۋىنشا, بۇل باستاما كەم دەگەندە 500 مىڭ تۇرعىنعا ءتيىمدى بولادى. سونىمەن قاتار, ەلدەگى ىشكى ءتۋريزمنىڭ دامۋىنا جول اشادى.
دەپۋتاتتىق ساۋالدا كولىك مينيسترىنە مىناداي ەكى سۇراق قويىلعان: تەكەلى مەن تالدىقورعان اراسىنداعى تەمىرجول جەلىسىن جولاۋشىلار ءۇشىن پايدالانۋعا قانداي كەدەرگىلەر بار؟ سونىمەن قاتار, پرەزيدەنت قاسىم-جومارت توقاەۆتىڭ كولىك ينفراقۇرىلىمىن دامىتۋ تۋرالى تاپسىرماسىنا سايكەس, بۇل باعىتتاعى پويىزدى ىسكە قوسۋعا مۇمكىندىك بار ما؟
دەپۋتاتتار بۇل ۇسىنىستىڭ ورىندالۋى تۇرعىندار ءۇشىن قولايلى جاعداي تۋعىزىپ قانا قويماي, مەملەكەتتىك دەڭگەيدەگى كولىك جانە تۋريزم ساياساتىنا دا سەرپىن بەرەتىنىنە سەنىمدى.
داميرا تولەگەن,
ەۇۋ ستۋدەنتى