استانادا ورتالىق مەملەكەتتىك جانە جەرگىلىكتى اتقارۋشى ورگانداردىڭ ءباسپاسوز حاتشىلارىنا ارنالعان «حالىقپەن ءتيىمدى كوممۋنيكاتسيا ءۇشىن جاساندى ينتەللەكت» اتتى سەمينار-پراكتيكۋم ءوتتى. ءۇش كۇنگە جالعاسقان ءىس-شارادا قاتىسۋشىلار زاماناۋي تسيفرلىق مۇمكىندىكتەردى پايدالانۋ ارقىلى مەملەكەتتىك قۇرىلىمدار مەن ازاماتتار اراسىنداعى ءوزارا بايلانىستى جەتىلدىرۋ جولدارىن تالقىلادى. باستى نازار قوعاممەن بايلانىس ساپاسىن ارتتىرۋعا, اشىقتىقتى قامتاماسىز ەتۋگە جانە اقپاراتقا قولجەتىمدىلىكتى كەڭەيتۋگە باعىتتالدى, دەپ حابارلايدى Egemen.kz.
سەميناردىڭ اشىلۋىندا استانا مەملەكەتتىك قىزمەت حابىنىڭ باسقارۋشى كوميتەت توراعاسى ءاليحان بايمەنوۆ مەملەكەتتىك ساياساتتى تۇسىندىرۋدە ءباسپاسوز قىزمەتتەرىنىڭ شەشۋشى ءرولىن اتاپ ءوتىپ, ءباسپاسوز حاتشىلارىنىڭ جي سياقتى زاماناۋي تسيفرلىق قۇرالداردى مەڭگەرۋىنىڭ قاجەتتىلىگىنە توقتالدى. ءىس-شارا بارىسىندا قاتىسۋشىلار ماتىندەر مەن بەينەماتەريالدار قۇراستىرۋ, قوعامدىق پىكىردى تالداۋ جانە كۇندەلىكتى جۇمىستى اۆتوماتتاندىرۋ بويىنشا جي قولدانۋداعى پراكتيكالىق داعدىلارىن شىڭدادى.
گرۋزيالىق ساراپشىلار اني سيربيلادزە مەن يراكلي گۆينيانيدزە ءباسپاسوز قىزمەتتەرىنە جەدەل ءباسپاسوز حابارلامارىن ازىرلەۋگە, الەۋمەتتىك جەلىلەر ءۇشىن مازمۇندى بەينەروليكتەر مەن كورنەكى كونتەنت جاساۋعا مۇمكىندىك بەرەتىن قاراپايىم ءارى ءتيىمدى قۇرالداردى تانىستىردى. سونداي-اق, سەميناردا جي تەحنولوگيالارىن قولدانۋداعى ەتيكالىق جانە قۇقىقتىق ماسەلەلەرگە, مەملەكەتتىك اقپارات قاۋىپسىزدىگىنە دە نازار اۋدارىلدى.
قاتىسۋشىلار سەميناردا العان بىلىمدەرى مەملەكەتتىك ورگاندار مەن قوعام اراسىنداعى كوممۋنيكاتسيانى بارىنشا تۇسىنىكتى, اشىق جانە قولجەتىمدى ەتۋگە كومەكتەسەتىندىگىن ايتتى. جيىن قورىتىندىسىندا مەملەكەتتىك كوممۋنيكاتسيا سالاسىندا جي قولدانۋعا قاتىستى حالىقارالىق ترەندتەر مەن پراكتيكالىق ۇسىنىستار قامتىلعان تسيفرلىق نۇسقاۋلىق جاسالىپ, قاتىسۋشىلارعا ۇسىنىلدى.
سەمينار استانا مەملەكەتتىك قىزمەت حابى باستاماسىمەن مەملەكەتتىك قىزمەت ىستەرى اگەنتتىگى, مادەنيەت جانە اقپارات مينيسترلىگى, پرەزيدەنت جانىنداعى مەملەكەتتىك باسقارۋ اكادەمياسى جانە بۇۇ دامۋ باعدارلاماسىمەن بىرلەسە ۇيىمداستىرىلعان.