بيىل ەلىمىزدەگى مەكتەپتەردە وقۋ جىلى 23 مامىردا اياقتالادى. بۇل كۇنى بارلىق ءبىلىم ۇياسىندا ء«بىلىمىم – وتانىما!» اتتى رەسپۋبليكالىق بىرىڭعاي سىنىپ ساعاتى وتەدى. شارا بارىسىندا «ادال ازامات» باعدارلاماسىنىڭ نەگىزگى قۇندىلىقتارىنا ەرەكشە كوڭىل بولىنەدى, دەپ جازادى Egemen.kz.
سىنىپ ساعاتىندا وقۋشىلارعا جاز مەزگىلىندە وقۋعا بولاتىن ادەبيەتتەر مەن كورۋگە لايىق فيلمدەر ءتىزىمى ۇسىنىلادى. سونىمەن قاتار, دەمالىستى ءتيىمدى ۇيىمداستىرۋدىڭ ماڭىزدىلىعى, قاۋىپسىزدىك شارالارى, قوسىمشا ءبىلىم بەرۋ ۇيىمدارىنا قاتىسۋدىڭ پايداسى تۋرالى ايتىلادى.
مينيسترلىك تاراپىنان مەكتەپ ءبىتىرۋ شاراسىن وتكىزۋگە قاتىستى شەكتەۋلەر ەنگىزىلدى. اتاپ ايتقاندا, اتا-انالاردان اقشا جيناۋعا, سىنىپ ىشىندە داستارحان جايۋعا, انيماتورلار مەن جەكە اگەنتتىكتەردى شاقىرۋعا, كولىكپەن شەرۋلەر ۇيىمداستىرۋعا, مەكتەپكە دەيىنگى ۇيىمداردا سالتاناتتى جيىندار وتكىزۋگە, سونداي-اق مۇعالىمدەر مەن مەكتەپ اكىمشىلىگىنە سىيلىق الۋعا قاتاڭ تىيىم سالىنادى. سوڭعى قوڭىراۋ شاراسىنا وقۋشىنىڭ ءبىر زاڭدى وكىلى عانا قاتىسا الادى.
الينا قايراتقىزى
ەۇۋ 2-كۋرس ستۋدەنتى