بۇگىن ۇكىمەت وتىرىسىندا وقۋ-اعارتۋ ءمينيسترى عاني بەيسەمباەۆ جازعى دەمالىس كەزىندە بالالاردىڭ ساۋىقتىرۋ دەمالىسىن, بوس ۋاقىتىن جانە جۇمىسپەن قامتىلۋىن ۇيىمداستىرۋ شارالارى تۋرالى باياندادى, دەپ جازادى Egemen.kz.
ءمينيستردىڭ ايتۋىنشا, ەلىمىزدەگى 10 مىڭنان اسا دەمالىس ورنىندا 3,2 ملن بالا جازعى كانيكۋلىن وتكىزەدى. ونىڭ 15 مىڭنان استامى – جىل بويعى ساۋىقتىرۋ ورتالىقتارىندا, 186 مىڭ بالا – قالا ماڭىنداعى, 2,8 ملن بالا – مەكتەپ جانىنداعى, 160 مىڭ بالا – شاتىر جانە كيىز ءۇي سىندى دەمالىس ورىندارىندا جازعى كانيكۋلىن وتكىزەدى.
«وڭىرلەرمەن بىرلەسىپ بارلىق دەمالىس ورتالىقتارىنىڭ ءتىزىمى بەكىتىلىپ, ولاردىڭ دايىندىعى رەسپۋبليكالىق شتاب وتىرىستارىندا قارالدى. سانيتارلىق نورمالاردىڭ, تاماق قاۋىپسىزدىگى تالاپتارىنىڭ, سونداي-اق سۋداعى, ورمانداعى جانە سپورت وبەكتىلەرىندەگى قاۋىپسىزدىك ەرەجەلەرىنىڭ ساقتالۋىنا باقىلاۋ كۇشەيتىلدى», دەدى عاني بەيسەمباەۆ.
الەۋمەتتىك وسال ساناتتاعى بالالاردىڭ جازعا دەمالىسىن ۇيىمداستىرۋعا دا ەرەكشە نازار اۋدارىلعان. «قازاقستان حالقىنا» قورىنىڭ قولداۋىمەن «جازدىق جولداما» جوباسى اياسىندا 10 مىڭ بالا تەگىن دەمالۋعا مۇمكىندىك الادى. كوپ بالالى جانە اۋىلدىق وتباسىلاردان شىققان بالالارعا دا باسىمدىق بەرىلەدى.
جازعى دەمالىستى مازمۇندى ۇيىمداستىرۋ ماقساتىندا مينيسترلىك 120 مىڭ ۇيىمداستىرۋشى-پەداگوگتى دايارلاعان. وسى باعىتتاعى جۇمىستارعا قوسىمشا 12 مىڭنان استام ستۋدەنت پەن ەرىكتى تارتىلادى.
وڭىرلەردە دەمالىس ورىندارىن سالۋ جۇمىستارى دا قارقىن العان. ماسەلەن, تۇركىستان وبلىسىندا بالالاردى ساپالى دەمالىسپەن قامتۋ دەڭگەيىن ارتتىرۋ ءۇشىن 10 لاگەردە مودۋلدىك كورپۋستار سالىنىپ جاتىر.
شىعىس قازاقستان وبلىسىندا «قوناقجاي وتباسى» جوباسى جالعاسۋدا – بيىل التى ەلدى مەكەننەن 62 وتباسى قاتىسىپ, 140 بالاعا ارنالعان دەمالىس ۇيىمداستىرىلادى. اقتوبە وبلىسىندا جانە باسقا دا بىرقاتار وڭىردە جۇمىسشى ماماندىقتارى جىلى اياسىندا كوللەدجدەر جانىنداعى لاگەرلەردە وقۋشىلار شەبەرلىك سىنىپتارى مەن كاسىپتىك باعدار بەرۋ سەسسيالارىنا قاتىسادى.