استانادا پارلامەنت سەناتى مەن ۇلتتىق بانكتىڭ بىرلەسكەن وقىتۋ كۋرسى باستالدى. جاڭا باستاما قاتىسۋشىلاردىڭ اقشا-نەسيە ساياساتى جونىندەگى ءبىلىمىن تولىقتىرۋدى كوزدەيدى. جوبا اياسىنداعى العاشقى ءدارىستى پالاتا سپيكەرى ماۋلەن اشىمباەۆ پەن ۇلتتىق بانك توراعاسى تيمۋر سۇلەيمەنوۆ وقىدى.
ءدارىس بارىسىندا ۇلتتىق جانە حالىقارالىق ەكونوميكاداعى نەگىزگى رەفورمالار تالداندى. سونداي-اق ماكروەكونوميكالىق ساياساتتى قايتا جاڭعىرتۋعا ارنالعان ساراپتامالىق-زاڭنامالىق جۇمىستىڭ باسىم مىندەتتەرى بەلگىلەندى.
وقىتۋ كۋرسى سەنات جانىنداعى تالداۋ مەكتەبى مەن ساراپشىلار كلۋبى اياسىندا ەلىمىزدەگى ساراپشىلار قاۋىمداستىعىنىڭ اناليتيكالىق قابىلەتتەرىن شىڭداۋ باعىتىندا پالاتا جۇرگىزىپ كەلە جاتقان جۇمىستىڭ جالعاسى ەكەنىن اتاپ وتكەن ءجون. ءتورت اپتالىق كۋرسقا 40 تىڭداۋشى قاتىسادى. ولاردىڭ قاتارىندا سەنات جانىنداعى ساراپشىلار كلۋبىنىڭ مۇشەلەرى مەن تالداۋ مەكتەبىنىڭ تۇلەكتەرى جانە مونەتارلىق ساياسات تاقىرىبىنا ماماندانعان جۋرناليستەر بار. جوبانىڭ باستى ماقساتى – اقشا-نەسيە ساياساتىن جان-جاقتى تالقىلاۋ ارقىلى ءار سالاداعى اناليتيكتەردىڭ بۇل باعىتتاعى شەشىم قابىلداۋ ۇدەرىسىمەن جاقىن تانىسۋىنا جاعداي جاساۋ.
العاشقى ءدارىس سۇرانىس پەن ۇسىنىس تەورياسىنا, نارىقتىق تەپە-تەڭدىك پەن يكەمدىلىككە جانە نەگىزگى ماكروەكونوميكالىق كورسەتكىشتەرگە ارنالدى. بۇعان قوسا ءىس-شارادا ەلىمىزدىڭ ماكروەكونوميكالىق كورسەتكىشتەرىنىڭ ديناميكاسىنا رەتروسپەكتيۆتى تالداۋ جۇرگىزىلدى جانە جابىق ەكونوميكا مودەلدەرى مەن وزىق حالىقارالىق تاجىريبەلەر زەردەلەندى.
م.اشىمباەۆ اتاپ وتكەندەي, مەملەكەتتىڭ ەكونوميكالىق ساياساتىنىڭ تيىمدىلىگىن ارتتىرۋدى كوزدەيتىن مىندەتتەردى ناتيجەلى ىسكە اسىرۋ جانە جاھاندىق ەكونوميكالىق ءتارتىپتىڭ وزگەرۋى جاعدايىندا جاڭا سىن-قاتەرلەردى ەڭسەرۋ ءۇشىن تالدامالىق داعدىلاردى دامىتۋ ايرىشقا مانگە يە. سوندىقتان اتالعان وقىتۋ كۋرسى تىڭداۋشىلارعا قازىرگى ەكونوميكالىق احۋالدى تەرەڭ ءتۇسىندىرۋ جانە سوعان بايلانىستى كاسىبي تۇرعىدان ارەكەت ەتۋىنە ىقپال جاساۋ ماقساتىمەن ۇيىمداستىرىلىپ وتىر.
«پرەزيدەنت قاسىم-جومارت توقاەۆ اقشا-نەسيە جانە فيسكالدىق ساياسات اراسىنداعى تەڭگەرىمسىزدىكتەردى جويۋ كەرەكتىگىن بىرنەشە رەت اتاپ ءوتتى. بۇل باعىتتاعى ءىس-ارەكەتتەر سەنىمدى دەرەكتەرگە, تىڭعىلىقتى تالداۋعا جانە ساپالى ساراپتاماعا نەگىزدەلۋى قاجەت. وسى رەتتە جاڭادان قولعا الىنىپ جاتقان وقىتۋ كۋرسى ۇلتتىق بانك شەشىمدەرىنىڭ قالاي قابىلداناتىنىن, ولاردىڭ ينفلياتسياعا, جۇمىسپەن قامتۋعا, ينۆەستيتسيالارعا, جيناقتارعا جانە ەلدىڭ ەكونوميكالىق وسۋىنە قانشالىقتى اسەر ەتەتىنىن تۇسىنۋگە, وسى باعىتتا تاجىريبە جيناۋعا جاقسى مۇمكىندىك ەكەنى انىق», دەپ م.اشىمباەۆ جوبانى ۇيىمداستىرعانى ءۇشىن ۇلتتىق بانك كومانداسىنا, سونداي-اق ەرىكتى نەگىزدە ءوز بىلىمدەرىمەن بولىسۋگە دايىن بولعان دارىسكەرلەرگە العىس ءبىلدىردى.
وقىتۋ كۋرسىنىڭ قورىتىندىسىندا تىڭداۋشىلار بازالىق مولشەرلەمەنى بەلگىلەۋگە اسەر ەتەتىن اناليتيكالىق جۇمىس تۋرالى ءبىلىمىن مولايتىپ, نەگىزگى ماكروەكونوميكالىق قاتىناستاردى جانە ارتىق تەحنيكالىق جۇكتەمەسىز بولجاۋ نەگىزدەرىن مەڭگەرەدى. ودان بولەك, اقشا-نەسيە ساياساتىنىڭ جالپى ءمانى مەن ماڭىزى جونىندە مالىمەت الادى.
ايتا كەتەيىك, بىلتىر پارلامەنت سەناتى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ, تالداۋ كەزىندە «ۇلكەن» دەرەكتەر مەن جاساندى ينتەللەكتىنى قولدانۋ تاقىرىبىنا ارنالعان سەمينار وتكىزدى. سونىمەن قاتار بۇعان دەيىن «Taldau Talks» پودكاستىندا مونەتارلىق جانە فيسكالدىق ساياساتتىڭ وزەكتى ماسەلەلەرى كەڭىنەن تالقىلانعانىن اتاپ وتكەن ءجون.