شالقار كولىندە تۋريستىك ماۋسىم اشىلدى

ءىس-شارانىڭ باستى ماقساتى – ءوڭىردىڭ تابيعي كورىكتى جەرلەرىن كەڭىنەن ناسيحاتتاپ, ىشكى ءتۋريزمنىڭ الەۋەتىن ارتتىرۋ. سونىمەن قاتار, ەكولوگيالىق, مادەني جانە بەلسەندى دەمالىس تۇرلەرىن دارىپتەۋ. قاراعايلى ورمان مەن تاۋ جوتالارىمەن كومكەرىلگەن شالقار كولى تاعى ءبىر مارتە سىبە كولدەر توبىنىڭ ءىنجۋ-مارجانى ەكەنىن دالەلدەدى.

ۇيىمداستىرۋشىلاردىڭ مالىمەتىنشە, قازىرگى تاڭدا اتالعان اۋماقتا 21 دەمالىس بازاسى رەسمي تۇردە جۇمىس ىستەيدى. ولاردىڭ جالپى سىيىمدىلىعى – 2349 توسەك-ورىن مەن 558 ءنومىردى قۇرايدى. تۋريزم سالاسىندا 68 ادام تۇراقتى تۇردە ەڭبەك ەتسە, 31 ماۋسىمدىق قىزمەتكەر تارتىلعان. سوڭعى جىلدارى تۋريستەر لەگى ايتارلىقتاي ارتقان: 2023 جىلى كولدى 15 600 ادام تاماشالاسا, 2024 جىلى بۇل كورسەتكىش 20 774 ادامعا جەتكەن. ولاردىڭ اراسىندا شەتەلدىك قوناقتار دا بار.

مەرەكەلىك باعدارلاما اياسىندا قوناقتارعا باي مادەني-سپورتتىق شارالار ۇسىنىلدى. اتاپ ايتقاندا, شىعارماشىلىق ۇجىمداردىڭ قاتىسۋىمەن كونتسەرت, ۇلتتىق سپورت تۇرلەرىنەن جارىستار, جەبەمەن اتۋ, اتقا, تۇيەگە جانە باگگيگە ءمىنۋ سىندى قىزىقتى ءىس-شارالار ۇيىمداستىرىلدى. بۇدان بولەك, «TOR ALTAI» دەمالىس بازاسىنا دەيىن جاياۋ ەكسكۋرسيا, ء«ومىر سوقپاعى» باعىتىمەن سەرۋەن جانە بەلگىلى زەرتتەۋشى ب. ۆ. ششەرباكوۆتىڭ بىرەگەي تانىستىرىلىمى ءوتتى.

شارا بارىسىندا ۇلتتىق تاعامدار ۇسىنىلعان ەتنواۋىل, قولونەرشىلەر جارمەڭكەسى جانە قازاق حالقىنىڭ سالت-ءداستۇرىن تانىستىراتىن ەكسپوزيتسيالار كوپشىلىككە ەرەكشە اسەر قالدىردى. كەش سوڭىندا جۇلدىزدى اسپان استىندا اشىق اسپان اياسىندا وتكەن جاستار ديسكوتەكاسى مەرەكەنىڭ كوركىن اشا ءتۇستى.

جازعى ماۋسىمنىڭ اشىلۋى — ءوڭىر تۇرعىندارى مەن قوناقتارى ءۇشىن قۋانىشتى وقيعا عانا ەمەس, سونىمەن قاتار تۋريزم ينفراقۇرىلىمىن, شاعىن جانە ورتا بيزنەستى دامىتۋعا تىڭ سەرپىن بەرەتىن ماڭىزدى باستاما. شالقار كولى — تابيعاتتى, مادەني مۇرانى جانە سالاۋاتتى ءومىر سالتىن باعالايتىن جاندار ءۇشىن ايرىقشا تارتىمدى مەكەن ەكەنىن تاعى ءبىر مارتە دالەلدەدى.