ازىق-ت ۇلىك كەلىسىمشارت كورپوراتسياسى فورۆاردتىق ساتىپ الۋ باعدارلاماسى اياسىندا اۋىل شارۋاشىلىعى تاۋارىن وندىرۋشىلەرگە 6,4 ملرد تەڭگە الدىن الا تولەم جاسادى. بۇل قاراجات كۇزگى ءونىم تاپسىرۋعا دايىندالعان فەرمەرلەردىڭ تۇقىم, تىڭايتقىش پەن تەحنيكاعا قاجەتتىلىگىن وتەۋگە باعىتتالعان. قارجىلاندىرۋدىڭ نەگىزگى بولىگى بيداي, زىعىر جانە ارپا وسىرۋشىلەرگە ءبولىندى, دەپ حابارلايدى Egemen.kz.
اۋىل شارۋاشىلىعى مينيسترلىگىنىڭ مالىمەتىنشە, 16 مامىرداعى جاعداي بويىنشا ۇلتتىق وپەراتور 169 مىڭ توننا استىقتى كۇزگى تاپسىرۋ ءۇشىن الدىن الا تولەم رەتىندە فەرمەرلەردىڭ شوتىنا 6,4 ملرد تەڭگە اۋداردى. ونىڭ 4,7 ملرد تەڭگەسى بيداي وندىرۋشىلەرگە, 549 ملن تەڭگەسى مايلى زىعىر وسىرۋگە ماماندانعان اۋىل شارۋاشىلىعى كاسىپورىندارىنا, 367,7 ملن تەڭگەسى ارپا جەتكىزۋشىلەرىنە باعىتتالدى. بۇل رەتتە شىعىس قازاقستان وبلىسىنا تيەسىلى كۇنباعىس وندىرۋشىلەرىنە باسىم بولىگى 688,9 ملن تەڭگە جىبەرىلدى.
قارجىلاندىرۋدىڭ ەڭ كوپ كولەمى ءداستۇرلى تۇردە نەگىزگى استىقتى ايماقتارعا كەلەدى. قازىردىڭ وزىندە قارجىلاي قولداۋدى قوستاناي, سولتۇستىك قازاقستان, شىعىس قازاقستان جانە اقمولا وبلىستارىنىڭ 98 اۋىل شارۋاشىلىعى كاسىپورنى الدى.
2025 جىلى اۋىل شارۋاشىلىعى ونىمدەرىن فورۆاردتىق ساتىپ الۋ باعدارلاماسى بويىنشا مايلى داقىلداردى وندىرۋشىلەردى نەسيەلەندىرۋ كولەمى ۇلعايتىلادى.
كوكتەمگى دالا جۇمىستارىن قارجىلاندىرۋعا وتىنىمدەر قابىلداۋ باستالعاننان بەرى ازىق-ت ۇلىك كەلىسىمشارت كورپوراتسياسىنا جالپى سوماسى 19 ملرد تەڭگەگە جۇگىنگەن. فورۆاردتىق كەلىسىمشارتتار بويىنشا شارۋالار وراق ناۋقانى اياقتالعاننان كەيىن مەملەكەتتىك وپەراتوردىڭ رەسۋرستارىنا 368 مىڭ توننا استىق جەتكىزۋدى جوسپارلاپ وتىر.
فورۆاردتىق قارجىلاندىرۋ باعدارلاماسى اۋىل شارۋاشىلىعى تاۋارىن وندىرۋشىلەردى ەگىس جۇمىستارىنا قولجەتىمدى قاراجاتپەن قامتاماسىز ەتۋگە باعىتتالعان. العان اۆانستى شارۋالار تۇقىم, تىڭايتقىش, قوسالقى بولشەكتەر جانە باسقا دا رەسۋرستاردى ساتىپ الۋعا جۇمسايدى. بۇل رەتتە مەملەكەت قارجىلاندىرۋدى عانا ەمەس, سونىمەن قاتار ازىق-ت ۇلىك كەلىسىمشارت كورپوراتسياسى ارقىلى استىق ونىمدەرىن ءادىل باعامەن وتكىزۋگە دە كەپىلدىك بەرەدى. وسىلايشا, فورۆاردتىق تەتىك فەرمەرلەرگە قارجىلىق جۇكتەمەنى ازايتۋعا جانە ماركەتينگتىك تاۋەكەلدەردى بارىنشا ازايتۋعا كومەكتەسەدى.