استاناداعى قىلمىستىق ىستەر جونىندەگى سوت مادەنيەت جانە سپورت سالاسىنىڭ بۇرىنعى ۆيتسە-ءمينيسترى ەرلان قوجاعاپانوۆقا قاتىستى ۇكىم شىعاردى. ول قىزمەت بابىن اسىرا پايدالاندى دەگەن ايىپپەن كىنالى دەپ تانىلىپ, 3 جىلعا باس بوستاندىعىنان ايىرىلدى, دەپ حابارلايدى Egemen.kz.
سوت ۇكىمىنە سايكەس, قوجاعاپانوۆقا ءومىر بويى مەملەكەتتىك جانە كۆازيمەملەكەتتىك ورگانداردا, سونداي-اق سوت, جەرگىلىكتى باسقارۋ قۇرىلىمدارى مەن ۇلتتىق بانك جۇيەسىندە لاۋازىمدى قىزمەت اتقارۋعا تىيىم سالىنعان.
تەرگەۋ ماتەريالدارىنا سايكەس, بۇرىنعى ۆيتسە-مينيستر 2018 جىلى پەتروپاۆلدا وتكەن قازاقستان مەن رەسەي اراسىنداعى ايماقارالىق فورۋمدى ۇيىمداستىرۋعا بولىنگەن قاراجاتتىڭ ءبىر بولىگى ءتيىمسىز جۇمسالعان. مەملەكەتكە 1 ميلليارد تەڭگەدەن استام شىعىن كەلتىرگەن.
اتالعان ءىس اياسىندا SUCCESS اگەنتتىگىنىڭ باسشىسى لياززات كوككوزوۆا دا جاۋاپقا تارتىلىپ, اسا ءىرى كولەمدە الاياقتىق جاساعانى ءۇشىن 5 جىلعا باس بوستاندىعىنان ايىرىلعان. ول قر قك 190-بابى 4-بولىگى بويىنشا كىنالى دەپ تانىلعان.
سوت ەكى سوتتالۋشىنىڭ تەرگەۋ كەزىندە قاماۋدا وتكىزگەن ۋاقىتىن جازا مەرزىمىنە قوسا ەسەپتەگەن. ايىپتاۋ تارابى قوجاعاپانوۆقا 7 جىل, ال كوككوزوۆاعا 8 جىل تۇرمە جازاسىن جانە مۇلكىن تاركىلەۋدى سۇراعان.