سەنات سپيكەرى ماۋلەن اشىمباەۆ ارمەنيا ۇلتتىق جينالىسىنىڭ توراعاسى الەن سيمونيان باستاعان دەلەگاتسيا وكىلدەرىمەن كەزدەستى. ءىس-شارا بارىسىندا ەكىجاقتى ىنتىماقتاستىق پەن پارلامەنتارالىق بايلانىستاردى ودان ءارى دامىتۋ ماسەلەلەرى تالقىلاندى.
پالاتا توراعاسى سەناتقا كەلگەن مەيماندارعا ءىلتيپات ءبىلدىرىپ, قازاقستان مەن ارمەنيا اراسىندا جوعارى دەڭگەيدە سىندارلى جانە سەنىمدى ديالوگ قالىپتاسقانىن اتاپ ءوتتى. سونداي-اق مەملەكەت باسشىلارى بەلگىلەپ بەرگەن ءوزارا ءىس-قيمىلدىڭ قالىپتاسقان قارقىنىن ءارى قاراي ساقتاۋدىڭ ماڭىزدى ەكەنى ايتىلدى.
«ارمەنيا – قازاقستاننىڭ سەنىمدى جانە جاقىن سەرىكتەستەرىنىڭ ءبىرى. ەلدەرىمىز اراسىندا ءوزارا قۇرمەتكە نەگىزدەلگەن ساياسي ديالوگ قالىپتاستى. ەكونوميكالىق ءوزارا ءىس-قيمىل نىعايىپ كەلەدى. مادەني-گۋمانيتارلىق بايلانىس جولعا قويىلعان. وسى رەتتە قازاقستان پرەزيدەنتى قاسىم-جومارت كەمەل ۇلى توقاەۆتىڭ بىلتىر ەرەۆانعا جاساعان العاشقى رەسمي ساپارى مەن ارمەنيا پرەزيدەنتى ۆااگن گارنيكوۆيچ حاچاتۋرياننىڭ استاناعا جاساعان ساپارىن اتاپ وتكىم كەلەدى. ساپار كەزىندە بىرقاتار ماڭىزدى قۇجاتقا قول قويىلدى. ولاردىڭ قاتارىندا قازاقستان مەن ارمەنيا باسشىلىعىنىڭ بىرلەسكەن مالىمدەمەسى جانە 2024–2025 جىلدارعا ارنالعان ساۋدا-ەكونوميكالىق ىنتىماقتاستىق جونىندەگى جول كارتاسى دا بار. قابىلدانعان قۇجاتتار قازاق-ارميان دوستىعى مەن سەرىكتەستىگىنىڭ مىزعىماستىعىن راستاي وتىرىپ, ىنتىماقتاستىقتىڭ جاڭا باعدارلارىن بەلگىلەپ بەردى», دەدى م.اشىمباەۆ.
سونىمەن قاتار سەنات سپيكەرى پرەزيدەنت قاسىم-جومارت توقاەۆ الەن سيمونياندى قابىلداعانىنا نازار اۋدارىپ, سول كەزدە وتكەن كەلىسسوزدەردىڭ ماڭىزىنا توقتالدى. كەزدەسۋ بارىسىندا ەكىجاقتى ىنتىماقتاستىقتى, ونىڭ ىشىندە پارلامەنتارالىق بايلانىستى ودان ءارى نىعايتۋ قاجەت ەكەنى ءسوز بولدى.
ء«بىز قازاقستان مەن ارمەنيا پارلامەنتتەرى اراسىندا قالىپتاسقان دوستىق بايلانىستاردى جوعارى باعالايمىز. قازىرگى تاڭدا ءبىزدىڭ پارلامەنتارالىق قارىم-قاتىناسىمىز جۇيەلى جانە جان-جاقتى سيپاتقا يە. ەكى پارلامەنتتە دە دوستىق توپتارى قۇرىلىپ, بەلسەندى جۇمىس ىستەپ كەلەدى. الداعى ۋاقىتتا دا قازاقستان مەن ارمەنيا دەپۋتاتتارىنىڭ ءوزارا ساپارلارى جالعاسا بەرەدى دەپ ۇمىتتەنەمىز. دەپۋتاتتارىمىز تمد پارلامەنتارالىق اسسامبلەياسى, ەقىۇ پارلامەنتتىك اسسامبلەياسى, ەۋروپا كەڭەسى جانە پارلامەنتارالىق وداق اياسىندا كوپجاقتى فورماتتا تىعىز بايلانىس ورناتتى. ءسىزدىڭ قازاقستانعا ساپارىڭىز پارلامەنتارالىق ىنتىماقتاستىقتى ءارى قاراي كەڭەيتە تۇسەدى دەپ سەنەمىن», دەدى سەنات سپيكەرى.
كەزدەسۋ بارىسىندا تاراپتار ساۋدا-ەكونوميكالىق جانە ينۆەستيتسيالىق ىنتىماقتاستىقتىڭ الەۋەتىنە دە توقتالدى. ناقتى ايتقاندا, كولىك جانە لوگيستيكا, ەنەرگەتيكا, IT سياقتى ەكى تاراپ تا مۇددەلى سالالاردا بىرلەسكەن جوبالاردى ىسكە اسىرۋعا قاتىستى ۇسىنىستار ايتىلدى.
سەنات توراعاسى ەكى حالىق اراسىنداعى مادەني-گۋمانيتارلىق ىنتىماقتاستىقتى نىعايتۋدىڭ دا ماڭىزدى ەكەنىن تىلگە تيەك ەتىپ, رۋحاني ديپلوماتيانى ىلگەرىلەتۋ ماسەلەلەرىنە ءمان بەردى. بۇل رەتتە بيىل قىركۇيەك ايىندا استانادا وتەتىن الەمدىك جانە ءداستۇرلى دىندەر كوشباسشىلارىنىڭ VIII سەزىنە دايىندىق بارىسى تۋرالى كەڭىرەك ءسوز بولدى.
ءوز كەزەگىندە ارمەنيا ۇلتتىق جينالىسىنىڭ توراعاسى الەن سيمونيان قازاقستاننىڭ بەيبىتشىلىك پەن ىنتىماقتاستىقتى نىعايتۋدى كوزدەيتىن حالىقارالىق باستامالارىنا جوعارى باعا بەردى جانە كوپجوسپارلى ءوزارا بايلانىستى ودان ءارى نىعايتۋعا مۇددەلى ەكەنىن جەتكىزدى.