دۋبايدا قازاقستاننىڭ ساۋدا ءۇيى اشىلادى

جاڭا ساۋدا وكىلدىگى دۋبايداعى Expo City Dubai اۋماعىندا ورنالاسقان قازاقستان پاۆيلونى بازاسىندا جۇمىس ىستەيدى. جالپى اۋماعى 3 420 م² بولاتىن نىساننىڭ 2 415 م²-ءى تولىققاندى فۋنكتسيونالدىق كەڭىستىك رەتىندە جابدىقتالعان. مۇندا زاماناۋي كەڭسەلەر, كوپفۋنكتسيونالدى ىسكەرلىك ايماقتار, كورمە گالەرەياسى, مەيرامحانا مەن قويمالار ورنالاسقان. بۇل الاڭ ەكسپورتتى ىلگەرىلەتۋ مەن ساۋدا لوگيستيكاسى ءۇشىن كەشەندى پلاتفورما قىزمەتىن اتقارماق.

QazTrade Dubai-دىڭ باستى ماقساتى — قازاقستاندىق ونىمدەردى پارسى شىعاناعى نارىعىنا بەيىمدەپ, تۇراقتى ءارى ءتيىمدى وتكىزۋ ارنالارىن قالىپتاستىرۋ. بۇل رەتتە وڭىرلىك وكىلدىك كەلەسى باعىتتار بويىنشا جۇمىس جۇرگىزەدى:

ءونىمدى نارىق تالاپتارىنا بەيىمدەۋ;

تەحنيكالىق جانە ساۋدا كەدەرگىلەرىن ەڭسەرۋ;

مەملەكەتتىك قولداۋ قۇرالدارىن ىسكە اسىرۋ;

سىرتقى ساۋداداعى مەملەكەتارالىق ءوزارا ءىس-قيمىلدى كەڭەيتۋ.

سونىمەن قاتار, پاۆيلوندا وتاندىق وندىرۋشىلەردىڭ تۇراقتى شوۋ-رۋمى, B2B-كەزدەسۋلەر, ساۋدا ميسسيالارى مەن سالالىق ءىس-شارالار وتكىزۋ جوسپارلانعان. ارنايى قۇرىلعان شتاب ەكسپورتتاۋشىلارعا لوگيستيكا, ماركەتينگ, ءونىمدى بەيىمدەۋ مەن برەند جىلجىتۋ باعىتىندا ناقتى كومەك كورسەتپەك.

ءباا مەن پارسى شىعاناعى ەلدەرىنىڭ نارىعى – يمپورتقا شەكتەۋ قويمايتىن, بىراق جوعارى ساپا مەن باسەكەگە قابىلەتتىلىكتى تالاپ ەتەتىن نارىق. بۇل وڭىردە ازىق-ت ۇلىكتەن باستاپ ونەركاسىپتىك تاۋارلارعا دەيىنگى كەڭ اۋقىمدى ءونىم تۇرلەرىنە سۇرانىس جوعارى. سول سەبەپتى, قازاقستاندىق تاۋارلاردىڭ الۋان ءتۇرىن ەكسپورتتاۋعا مول مۇمكىندىك بار.

QazTrade مالىمەتىنشە, 2023 جىلى قازاقستاننان ءباا-گە ەڭ كوپ ەكسپورتتالعان تاۋارلار مىنالار بولدى:

كۇمىس – $55,2 ملن (42,1%);

سۋتەگى جانە ينەرتتى گازدار – $13,1 ملن (10%);

قوي مەن ەشكى ەتى – $8,1 ملن (6,2%);

بولات پروكاتى – $5,2 ملن (4%);

كەپتىرىلگەن بۇرشاق كوكونىستەرى – $4 ملن (3,1%);

ياحتالار مەن ءجۇزۋ قۇرالدارى – $3,5 ملن (2,7%);

ازوتتى تىڭايتقىشتار – $2,9 ملن (2,2%);

سۇيىق سورعىلار – $2,7 ملن (2%);

قوج ماقتا – $2,4 ملن (1,8%).

QazTrade Dubai وڭىرلىك وكىلدىگىنىڭ اشىلۋى – قازاقستاننىڭ سىرتقى ەكونوميكالىق ستراتەگياسىنىڭ ماڭىزدى كەزەڭى. بۇل قادام پارسى شىعاناعى نارىعىنا وتاندىق ونىمدەردىڭ جۇيەلى جانە ساپالى ەنۋىن قامتاماسىز ەتىپ, ەل ەكسپورتىنىڭ گەوگرافياسىن كەڭەيتۋگە جول اشادى.

جاڭا الاڭ – تەك ساۋدا وكىلدىگى عانا ەمەس, مەملەكەت پەن بيزنەستىڭ كۇش-جىگەرىن توعىستىراتىن حالىقارالىق ەكونوميكالىق ىنتىماقتاستىق ورتالىعى رەتىندە قىزمەت ەتەدى.