سەناتتا كورنەكتى مەملەكەت جانە قوعام قايراتكەرى, سەناتورلار كەڭەسىنىڭ مۇشەسى قۋانىش سۇلتانوۆتىڭ 80 جاسقا تولۋىنا وراي سالتاناتتى ءىس-شارا ءوتتى. ەل پرەزيدەنتى قاسىم-جومارت توقاەۆتىڭ مەرەيتوي يەسىنە ارنالعان قۇتتىقتاۋ حاتىن پالاتا توراعاسى ماۋلەن اشىمباەۆ وقىپ بەردى.
مەملەكەت باسشىسىنىڭ قۇتتىقتاۋىندا حالىق قۋانىش سۇلتانوۆتى كورنەكتى مەملەكەت جانە قوعام قايراتكەرى, بىلىكتى ديپلومات, ىسكەر ازامات رەتىندە قۇرمەتتەيتىنى اتاپ وتىلگەن.
«ۇزاق جىلعى ەڭبەك جولىڭىزدا ساياسي-اكىمشىلىك قىزمەتتەردى ابىرويلى اتقارىپ, قازاقستاننىڭ مەملەكەتتىلىگى بەرىك قالىپتاسۋىنا جانە الەمدىك قوعامداستىقتا مارتەبەسى نىعايا تۇسۋىنە سۇبەلى ۇلەس قوستىڭىز. پارلامەنت دەپۋتاتى بولعان تۇسىڭىزدا وتاندىق زاڭنامانى جەتىلدىرۋگە كۇش-قايراتىڭىزدى ارنادىڭىز. قاشاندا ەلدىك مۇددەنى جوعارى قويىپ, وسكەلەڭ ۇرپاققا وتان مەن قوعامعا ادال قىزمەت ەتۋدىڭ ۇلگىسىن كورسەتە ءبىلدىڭىز. ءسىزدىڭ سابىرلى دا سالماقتى مىنەزىڭىز بەن ازاماتتىق ۇستانىمىڭىز زامانداستارىڭىز اراسىندا قادىر-قاسيەتىڭىزدى ارتتىرا تۇسەتىنى انىق», دەلىنگەن پرەزيدەنتتىڭ قۇتتىقتاۋىندا.
سەنات سپيكەرى قۋانىش سۇلتانوۆتىڭ مەملەكەت باسشىسىنىڭ جارلىعىمەن مەملەكەتتىك جانە قوعامدىق قىزمەتتەگى ايرىقشا ەڭبەگى ءۇشىن «وتان» وردەنىمەن ماراپاتتالعانىنا نازار اۋدارىپ, بۇل قۇرمەتتىڭ ماڭىزدى ەكەنىن ايتتى.
م.اشىمباەۆ اتاپ وتكەندەي, قۋانىش سۇلتان ۇلىنىڭ ەڭبەك جولى ەگەمەن ەلىمىزدىڭ تاريحىمەن تىكەلەي جانە تىعىز بايلانىستى. تاۋەلسىزدىكتىڭ العاشقى جىلدارىندا قابىلدانعان ءاربىر شەشىم مەملەكەتتىڭ دامۋىنا, سونىڭ ىشىندە ماڭىزدى ينستيتۋتتىڭ ءبىرى – پارلامەنتاريزمنىڭ قالىپتاسۋىنا ەرەكشە ىقپال ەتكەنى انىق.
«قۋانىش سۇلتان ۇلى ونەگەلى ءومىر جولىندا جوعارى لاۋازىمدى قىزمەتتەردى ابىرويمەن اتقاردى. سونىمەن قاتار مەرەيتوي يەسى ۇلتتىق پارلامەنتاريزمدى قالىپتاستىرۋعا, وتاندىق زاڭ شىعارۋ قىزمەتىن جەتىلدىرۋگە زور ەڭبەك ءسىڭىردى. 20 جىلعا جۋىق ۋاقىت قوس پالاتانىڭ دەپۋتاتى بولىپ, وسى باعىتتاعى ىرگەلى ىستەردىڭ بەل ورتاسىندا ءجۇردى. سول كەزدە ارىپتەستەرىمەن بىرگە ەلدىك مۇددەنى كوزدەيتىن ماڭىزدى زاڭدار قابىلداپ, ەلىمىزدى دامىتۋدىڭ قۇقىقتىق نەگىزىن قالادى. بۇگىندە كوپشىلىك قۋانىش اعامىزدى ءجون سىلتەپ, جول كورسەتكەن ۇستاز رەتىندە دە قۇرمەت تۇتادى. مەن دە قۋانىش سۇلتان ۇلىن ءوزىم كوپ ءتالىم العان ۇستازىم دەپ ەسەپتەيمىن», دەگەن م.اشىمباەۆ مەرەيتوي يەسىن قۇتتىقتاپ, زور دەنساۋلىق جانە قۇت-بەرەكە تىلەدى.
سونداي-اق ءىس-شارا بارىسىندا ق.سۇلتانوۆتى سەناتورلار كەڭەسىنىڭ مۇشەلەرى, ارىپتەستەرى, زامانداستارى, بەلگىلى قايراتكەر تۇلعالار جانە زيالى قاۋىم وكىلدەرى قۇتتىقتاپ, ىزگى لەبىزدەرىن جەتكىزدى.