ەلوردانىڭ كۇن سايىن ءوسىپ, دامىپ جاتقانى قۋانتادى. الايدا قالا تۇرعىندارىنىڭ ومىرىندە ءالى كۇنگە دەيىن شەشىلمەگەن وزەكتى ماسەلەنىڭ ءبىرى – جول جوندەۋ جۇمىستارى. جىل سايىن قايتالاناتىن جوندەۋ, اياقتالمايتىن اسفالتتاۋ مەن قايتا قازىلعان كوشەلەر – بۇل استانالىق جۇرگىزۋشىلەردىڭ جۇيكەسىن جۇقارتاتىن جاعدايعا اينالدى.
كوكتەم كەلە سالا ەلوردا كوشەلەرىنىڭ ءار بۇرىشىنان اۋىر تەحنيكا مەن جۇمىسشىلار كورىنە باستايدى. اسىرەسە تۇران, ماڭگىلىك ەل, قابانباي باتىر, بەيبىتشىلىك سىندى نەگىزگى ماگيسترالدار ءجيى جوندەلەدى. ءبىر قىزىعى, بۇعان دەيىن عانا جاڭارتىلعان كەيبىر جولدار كەلەسى جىلى تاعى قازىلىپ جاتادى. تۇرعىندار اراسىندا: «بۇل جولدىڭ ساپاسى ناشار ما, الدە جوسپارلاۋ دۇرىس جۇرگىزىلمەي مە؟» دەگەن سۇراق ءجيى تۋىندايدى.
مامانداردىڭ ايتۋىنشا, جول جوندەۋدىڭ ءجيى قايتالانۋىنا ساپاسىز قۇرىلىس ماتەريالدارى, قىستاعى قاتتى ايازدان اسفالتتىڭ بۇزىلۋى, جول استى ينجەنەرلىك جەلىلەرىن (سۋ, جىلۋ, ەلەكتر) ءجيى اۋىستىرۋ قاجەتتىلىگى, مەردىگەر كومپانيالاردىڭ جاۋاپسىزدىعى مەن باقىلاۋدىڭ السىزدىگى سەبەپ بولۋى مۇمكىن.
جول جوندەۋگە قىرۋار قارجى بولىنسە دە, كەيبىر كوشەلەردىڭ توزۋى ءبىر-ەكى جىل ىشىندە-اق بايقالىپ جاتادى. بۇل رەتتە مەملەكەتتىك باقىلاۋ مەن تەحنيكالىق قاداعالاۋ جۇمىستارىنىڭ ساپاسىن كوتەرۋ قاجەتتىلىگى ايتىلىپ ءجۇر.
جوندەۋ جۇمىستارى كوبىنە كۇندىزگى ۋاقىتتا ءجۇرىپ, جول قوزعالىسىنا ايتارلىقتاي كەدەرگى كەلتىرەدى. كەيدە ءبىر عانا جولاق اشىق قالىپ, ساعاتتاپ سوزىلاتىن كەپتەلىستەرگە سەبەپ بولادى. جۇرگىزۋشىلەردىڭ ايتۋىنشا, تاڭەرتەڭگى جانە كەشكى ۋاقىتتا جۇمىسىنا نە ۇيىنە جەتۋ ءۇشىن بۇرىنعىدان ەكى ەسە كوپ ۋاقىت كەتەدى.
قالا اكىمدىگى جول جوندەۋ جۇمىستارىنىڭ ماۋسىمدىق ەكەنىن ايتىپ, كەشىرىم سۇراۋمەن شەكتەلەدى. دەگەنمەن, ماسەلە جىل سايىن قايتالانىپ جاتقانى – جۇيەلى كەمشىلىكتىڭ بارىن كورسەتەدى.
استانا سياقتى قارقىندى دامىپ جاتقان قالادا جول جوندەۋ – مىندەتتى پروتسەسس. الايدا بۇل پروتسەسس تۇرعىنداردىڭ ءومىر ساپاسىنا كەرى اسەر ەتپەۋى ءتيىس. ءاربىر جوندەلگەن جول كەم دەگەندە 5-7 جىل پايدالانۋعا جارامدى بولۋى قاجەت. ايتپەسە, جىل سايىن قايتالاناتىن قۇرىلىس – ەلوردا مارتەبەسىنە كولەڭكە تۇسىرەدى.