كەشە سەنات سپيكەرى ماۋلەن اشىمباەۆتىڭ توراعالىعىمەن پالاتا بيۋروسىنىڭ وتىرىسى ءوتىپ, دەپۋتاتتار 15 مامىردا بولاتىن سەنات وتىرىسىنىڭ كۇن ءتارتىبىن بەكىتتى.
سوعان سايكەس سەناتورلار الداعى بەيسەنبىدە «اكۆاشارۋاشىلىق تۋرالى» زاڭدى قارايدى. بۇل قۇجات جۇمىس ىستەپ تۇرعان وندىرىستەردى كەڭەيتۋ جانە جاڭالارىن قۇرۋ ارقىلى اكۆاشارۋاشىلىقتى تۇراقتى دامىتۋعا ارنالعان. سونداي-اق باسەكەگە قابىلەتتى اكۆاشارۋاشىلىق نىساندارىنىڭ كولەمىن ۇلعايتۋ, ولاردىڭ ادام ءومىرى مەن دەنساۋلىعى جانە قورشاعان ورتا ءۇشىن قاۋىپسىزدىگىن ارتتىرۋ كوزدەلىپ وتىر.
سونىمەن قاتار اتالعان زاڭعا ىلەسپە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اكۆاشارۋاشىلىق, اگروونەركاسىپتىك كەشەن, ەلەكتر ەنەرگەتيكاسى جانە جەكەلەگەن ورتالىق مەملەكەتتىك ورگانداردىڭ فۋنكتسيالارىن قايتا ءبولۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ دا سەنات وتىرىسىنىڭ كۇن تارتىبىنە شىعارىلدى. قۇجات نورمالارىنا سايكەس جەر, ورمان, كاسىپكەرلىك جانە ەكولوگيالىق كودەكستەرگە, سونداي-اق قازاقستان رەسپۋبليكاسىنىڭ بىرقاتار زاڭدارىنا وزگەرىستەر مەن تولىقتىرۋلار ەنگىزىلەدى.
بۇعان قوسا, دەپۋتاتتار كوميتەتتەردىڭ وسى اپتاداعى وتىرىستارىندا قوزعالاتىن تاقىرىپتاردى پىسىقتادى. سونىڭ اياسىندا سوت اكىمشىلىگىنىڭ قىزمەتى, قۇقىق قورعاۋ جانە سوت قىزمەتىنە جاساندى ينتەللەكت تەحنولوگيالارىن ەنگىزۋ, وندىرىستىك نىسانداردا ورتكە قارسى قاۋىپسىزدىكتى قامتاماسىز ەتۋ جانە مەملەكەتتىك-جەكەشەلىك سەرىكتەستىكتى دامىتۋ ماسەلەلەرى تالقىلاندى.