ينفراقۇرىلىم – اۋىل حالقىنىڭ ءال-اۋقاتىن ارتتىرۋدىڭ باستى تەتىگى. مەملەكەت باسشىسى قاسىم-جومارت توقاەۆ ءوزىنىڭ جولداۋلارىندا اۋىلدىق ەلدى مەكەندەردىڭ دامۋىنا ەرەكشە ءمان بەرىپ كەلەدى. پرەزيدەنت تاپسىرماسىنا سايكەس, حالىقتىڭ ءومىر ءسۇرۋ ساپاسىن ارتتىرۋ, اۋىلداردى تازا اۋىز سۋمەن, ساپالى جولمەن قامتاماسىز ەتۋ – مەملەكەتتىك ساياساتتىڭ نەگىزگى باعىتتارىنىڭ ءبىرى بولىپ وتىر.
2025 جىلدىڭ 1 مامىرىنا دەيىنگى مالىمەت بويىنشا, اۋدانعا قاراستى 44 اۋىلدا تۇراتىن 24 380 ادامنىڭ ىشىندە 36 اۋىلدىڭ (22 074 ادام) تۇرعىندارى ساپالى اۋىز سۋمەن قامتىلعان. بۇل – جالپى كورسەتكىشتىڭ 90,5%-ى. ولاردىڭ ىشىندە 17 اۋىلدا (18 039 ادام) ورتالىقتاندىرىلعان سۋ جۇيەسى ىسكە قوسىلسا, 16 اۋىل (3 170 ادام) اكەلىنەتىن سۋ ارقىلى جۇمىس ىستەيتىن تاراتۋ پۋنكتتەرىمەن جابدىقتالعان. تاعى 3 اۋىلدىڭ (3,5%) تاراتۋ پۋنكتەر جۇمىس ىستەپ تۇرعان قۇبىرلاردان سۋمەن قامتاماسىز ەتىلۋدە.
قازىرگى تاڭدا نوۆوشۋمنوە مەن لەسنوە اۋىلدارىندا قۇرىلىس-مونتاجداۋ جۇمىستارى جالعاسۋدا.
جول-كولىك ينفراقۇرىلىمىن جاقسارتۋ دا مەملەكەت باسشىسىنىڭ تاپسىرمالارىنا ساي جۇزەگە اسىرىلىپ كەلەدى. 2024 جىلى اۋداندىق ماڭىزداعى 12 جول ۋچاسكەسىندە (جالپى ۇزىندىعى 44,15 كم) ورتاشا جانە اعىمداعى جوندەۋ جۇمىستارى جۇرگىزىلىپ, سۋ وتكىزۋ قۇبىرلارى اۋىستىرىلدى. ال 2025 جىلى 115,9 شاقىرىم اۋداندىق جولدى جوندەۋ جوسپارلانىپ وتىر.
كوشە-جول جەلىسى بويىنشا دا جۇمىس قارقىندى. وتكەن جىلى 13 ەلدى مەكەندەگى 22 كوشە (20,2 كم) جوندەۋدەن ءوتتى. بيىل تاعى 6 اۋىلدا جالپى ۇزىندىعى 19,7 كم بولاتىن 11 كوشەگە اعىمداعى جوندەۋ جۇرگىزىلەدى.
بۇل جۇمىستار – پرەزيدەنت تاپسىرمالارىنا سايكەس, اۋىلداعى ءومىر ساپاسىن ارتتىرۋ باعىتىنداعى ناقتى قادامدار. ولار اۋىل تۇرعىندارىنىڭ تۇرمىسىن جاقسارتىپ قانا قويماي, ءوڭىردىڭ الەۋمەتتىك-ەكونوميكالىق دامۋىنا سەرپىن بەرەدى.