پرەزيدەنت جىل باسىندا «Ana tili» گازەتىنە بەرگەن سۇحباتىندا جەڭىستىڭ 80 جىلدىعى اياسىندا سوعىس جانە تىل ارداگەرلەرىنە ايرىقشا قۇرمەت كورسەتىلەتىنى تۋرالى ايتقان ەدى. ەڭبەك جانە حالىقتى الەۋمەتتىك قورعاۋ مينيسترلىگىنىڭ 8 مامىرداعى دەرەگىنشە, قازىر ەلىمىزدە 105 سوعىس ارداگەرى تۇرادى. بۇعان قوسا ءفاشيزمدى جەڭۋگە ۇلەس قوسقان 40 707 ادام بار. پرەزيدەنت تاپسىرماسى شەڭبەرىندە ولاردى الەۋمەتتىك تۇرعىدا قولداۋدىڭ اۋقىمدى ءىس-شارالارى قولعا الىندى.
بىلتىر جەڭىس كۇنىنە وراي ەكىنشى دۇنيەجۇزىلىك سوعىس قاتىسۋشىلارىنا 1,5 ملن تەڭگە كولەمىندە بىرجولعى ماتەريالدىق كومەك بەرىلگەن بولسا, بيىل ەڭبەك جانە حالىقتى الەۋمەتتىك قورعاۋ مينيسترلىگىنىڭ ۇسىنىسىمەن ونىڭ كولەمى 5 ملن تەڭگەگە دەيىن كوبەيدى. جەڭىستىڭ 80 جىلدىعىن مەرەكەلەۋ اياسىندا جىل باسىنان بەرى 109 ارداگەرگە جالپى سوماسى 545 ملن تەڭگە كولەمىندە بىرجولعى جاردەماقى تولەنگەن. سونىمەن قاتار جەڭىسكە ۇلەس قوسقان وزگە دە ساناتتاعى ازاماتتارعا 50 مىڭنان 200 مىڭ تەڭگەگە دەيىن الەۋمەتتىك كومەك بەرىلدى.
ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ولجاس ءانافيننىڭ ايتۋىنشا, ارداگەرلەرگە قامقورلىق جاساۋ, ولاردىڭ ءومىر ءسۇرۋ ساپاسىن ارتتىرۋ مەملەكەتتىڭ الەۋمەتتىك ساياساتىنىڭ باستى باسىمدىقتارىنىڭ ءبىرى بولىپ سانالادى.
– ەلىمىزدە قورشاۋداعى لەنينگرادتىڭ 64 تۇرعىنى, كونتسلاگەرلەردىڭ بۇرىنعى كامەلەتكە تولماعان 129 تۇتقىنى, سوعىس كەزىندە العان جاراقاتى, كونتۋزياسى, زاقىمدانۋى نەمەسە اۋرۋى سالدارىنان قايتىس بولعان ادامداردىڭ 1 638 جۇبايى, سونىمەن قاتار 38 874 تىل ەڭبەككەرى بار. بيىل 1 مامىرداعى جاعداي بويىنشا سوعىس ارداگەرلەرى الاتىن الەۋمەتتىك تولەمدەردىڭ ورتاشا جيىنتىق مولشەرى 271 802 تەڭگەنى, ال تىل ەڭبەككەرلەرى الاتىن ورتاشا جيىنتىق مولشەرى 179 800 تەڭگەنى قۇرايدى, – دەدى ول.
بۇعان قوسا ۆيتسە-مينيستر قازىرگى كەزدە اسكەري قىزمەتشىلەر پايدالاناتىن قۇقىقتار مەن كەپىلدىكتەردىڭ بارلىعى ارداگەرلەرىمىز ءۇشىن دە جارامدى ەكەنىن ايتتى. ولار سالىق جەڭىلدىكتەرىن پايدالانادى, استانا جانە الماتى قالالارىنداعى مامانداندىرىلعان گوسپيتالداردا بىلىكتى مەديتسينالىق كومەك كورسەتىلەدى, ساناتوري-كۋرورتتىق ەمدەۋ ۇسىنىلادى.
سونداي-اق جەرگىلىكتى اتقارۋشى ورگاندار بيۋدجەتتىك جانە دەمەۋشىلىك قاراجات ەسەبىنەن ارداگەرلەرگە مەرەكەلىك (اتاۋلى) كۇندەرگە وراي, تۇرعىن ۇيگە جوندەۋ جۇرگىزۋ, وتىنمەن قامتاماسىز ەتۋ ءۇشىن الەۋمەتتىك كومەك تۇرىندە قوسىمشا الەۋمەتتىك قولداۋ شارالارىن, كوممۋنالدىق قىزمەتتەرگە اقى تولەۋ جانە قوعامدىق كولىكتە جول ءجۇرۋ بويىنشا جەڭىلدىكتەردى, ت.ب. كومەك تۇرلەرىن كورسەتەدى.
– 2025 جىلى جەرگىلىكتى بيۋدجەت قاراجاتى ەسەبىنەن كوممۋنالدىق قىزمەت اقىلارىن وتەۋ (2,6 ملرد تەڭگە), تۇرعىن ءۇيدى جوندەۋ (21,5 ملن تەڭگە), وتىن ساتىپ الۋ (14,5 ملن تەڭگە), قوعامدىق كولىكتە جول ءجۇرۋ جەڭىلدىكتەرى (4,1 ملرد تەڭگە), ءدارى-دارمەكپەن قامتاماسىز ەتۋ (48,5 ملن تەڭگە), ءتىس پروتەزدەۋ (441,9 ملن تەڭگە), ازىق-ت ۇلىك توپتاماسى (103,9 ملن تەڭگە) تۇرىندە كومەك كورسەتۋ كوزدەلگەن, – دەيدى ەڭبەك جانە حالىقتى الەۋمەتتى قورعاۋ ۆيتسە-ءمينيسترى.
بۇعان قوسا ءساۋىر-مامىر ايلارىندا «Samruk-Kazyna Trust» الەۋمەتتىك جوبالاردى دامىتۋ قورى «سالاماتتى قازاقستان» مامانداندىرىلعان پويىزىن ىسكە قوسىپ, ەل حالقىنا پروفيلاكتيكالىق-دياگنوستيكالىق قىزمەت كورسەتىپ جاتىر. جوبا شەڭبەرىندە ەكىنشى دۇنيەجۇزىلىك سوعىس قاتىسۋشىلارى, تىل ەڭبەككەرلەرى جانە شالعايداعى ستانسالاردىڭ تۇرعىندارى بىلىكتى مەديتسينا ماماندارىنان (تەراپەۆت, ستوماتولوگ, وفتالمولوگ, وتورينولارينگولوگ, حيرۋرگ, ۋرولوگ, ماممولوگ, پەدياتر) تەگىن تەكسەرۋدەن جانە ەمدەلۋدەن وتۋگە مۇمكىندىك الىپ وتىر. ونىڭ ىشىندە سوعىس ارداگەرلەرى مەن ولارعا تەڭەستىرىلگەن ادامدار ءۇشىن ۇيدە قىزمەت كورسەتۋ كوزدەلگەن.
مادەنيەت جانە اقپارات مينيسترلىگى مەن «ارداگەرلەر ۇيىمى» رقب ارداگەرلەر مەن تىل ەڭبەككەرلەرىنە كومەك كورسەتۋ بويىنشا «Birgemiz Qamqor» رەسپۋبليكالىق جوباسىن ىسكە قوسپاق. جوبا جاستاردى سوعىس ارداگەرلەرى مەن تىل ەڭبەككەرلەرىنە دەگەن تەرەڭ قۇرمەت, گۋمانيزم مەن پاتريوتيزم سەزىمدەرىن وياتۋعا باعىتتالعان.
ايتا كەتسەك, ءبىزدىڭ ەلىمىزدە تمد مەملەكەتتەرى ىشىندە سوعىس ارداگەرلەرىنە ەڭ ۇلكەن الەۋمەتتىك قولداۋ كورسەتىلىپ كەلەدى. بۇل كومەك تۇرلەرى الداعى ۋاقىتتا دا جالعاسا بەرمەك.