قارجى مينيسترلىگىنە قاراستى مەملەكەتتىك كىرىستەر كوميتەتى كەدەن سالاسىن جاڭعىرتۋ اياسىندا «Keden» اقپاراتتىق جۇيەسىن كەزەڭ-كەزەڭمەن ەنگىزۋدى جالعاستىرىپ جاتىر. بۇل جۇيە «اشىق جانە باسقارىلاتىن كەدەن» تۇجىرىمداماسى اياسىندا قولدانىستاعى «استانا-1» جانە «ەكسپورت-يمپورت وپەراتسيالارى جونىندەگى بىرىڭعاي تەرەزە» پلاتفورمالارىن الماستىرۋعا باعىتتالعان, دەپ حابارلايدى Egemen.kz.
«Keden» – كەدەن ورگاندارى مەن سىرتقى ەكونوميكالىق قىزمەتكە قاتىسۋشىلار اراسىندا تولىق تسيفرلىق ءوزارا ءىس-قيمىلدى قامتاماسىز ەتەتىن, زاماناۋي تالاپتارعا جاۋاپ بەرەتىن شەشىم. ول اكىمشىلىك كەدەرگىلەردى ازايتىپ, راسىمدەردىڭ اشىقتىعىن كۇشەيتەدى جانە تاۋار قوزعالىسىن ءتيىمدى باقىلاۋعا مۇمكىندىك بەرەدى.
تسيفرلىق ەكوجۇيە قاعاز قۇجات اينالىمىن قىسقارتۋ ءۇشىن مەملەكەتتىك جانە كوممەرتسيالىق 30-دان استام اقپاراتتىق جۇيەمەن ينتەگراتسيالاندى. بۇل مالىمەتتەردى اۆتوماتتى تۇردە الۋ ارقىلى راسىمدەۋ بارىسىن ەداۋىر وڭايلاتادى.
جۇيەنى ەنگىزۋدىڭ نەگىزگى كەزەڭدەرى تومەندەگىدەي:
2024 جىلعى ءساۋىر — ەكسپرەسس-جۇكتەردى ەلەكتروندى كەدەندىك دەكلاراتسيالاۋ;
2024 جىلعى قىركۇيەك — جەكە تۇتىنۋعا ارنالعان تاۋارلاردى ەسەپكە الۋ ءمودۋلى (قورعاس حشىو);
2024 جىلعى قاراشا — الدىن الا وپەراتسيالار, ترانزيتتىك دەكلاراتسيا, ۋاقىتشا ساقتاۋ, تاۋەكەلدەردى باسقارۋ جۇيەسى, تولەمدەردى قامتاماسىز ەتۋ, رەزيدەنت ەمەستەردى تىركەۋ جانە تەكسەرۋ پروتسەستەرىنىڭ مودۋلدەرى;
2025 جىلعى قاڭتار–ساۋىر — كولىك قۇرالدارىنا ارنالعان دەكلاراتسيالار, 9 مەملەكەتتىك قىزمەت, حالىقارالىق پوشتا جونەلتىلىمدەرىن راسىمدەۋ;
2025 جىلعى 22 ءساۋىر — جولاۋشىلاردىڭ كەدەن دەكلاراتسياسىن راسىمدەۋ ءمودۋلى ىسكە قوسىلدى.
بۇگىنگى كۇنگە دەيىن ناتيجە كورسەتكىشتەرى ايتارلىقتاي بار. «Keden» جۇيەسى ارقىلى 837 مىڭنان استام الدىن الا اقپارات تىركەلگەن. سونىمەن قاتار 539 مىڭ ترانزيتتىك دەكلاراتسيا راسىمدەلىپ, 87 مىڭ تاۋار ساقتاۋ قۇجاتى جاسالعان. كەدەندىك تولەمدەردى قامتاماسىز ەتۋ ءۇشىن 28 مىڭنان استام ارنايى سەرتيفيكات تىركەلگەن. بۇدان بولەك, 119 مىڭ كولىك قۇرالىنا كەدەندىك دەكلاراتسيا شىعارىلىپ, 1 ميلليوننان استام حالىقارالىق پوشتا جونەلتىلىمى رەسىمدەلدى. ال جولاۋشىلار تاراپىنان 53 مىڭنان استام كەدەندىك دەكلاراتسيا بەرىلگەن. بۇل كورسەتكىشتەر جۇيەنىڭ تيىمدىلىگى مەن قولدانىستاعى فۋنكتسيونالىنىڭ كەڭ اۋقىمىن كورسەتەدى.
سونىمەن قاتار الداعى كەزەڭدە جۇيەنى ودان ءارى جەتىلدىرۋ كوزدەلىپ وتىر. 2025 جىلدىڭ سوڭىنا دەيىن Keden پلاتفورماسى كەدەندىك راسىمدەردىڭ بارلىق كەزەڭىن تسيفرلى فورماتتا باسقارۋعا مۇمكىندىك بەرەتىن تولىققاندى جۇيەگە اينالماق. اتاپ ايتقاندا, جۇيە كەدەن دەكلاراتسيالارىن الدىن الا تولتىرۋ, ولاردىڭ مارتەبەسىن ناقتى ۋاقىت رەجيمىندە باقىلاۋ, راسىمدەر بارىسىندا تۋىندايتىن كەمشىلىكتەردى اۆتوماتتى تۇردە تىركەۋ جانە وڭدەۋ فۋنكتسيالارىمەن تولىقتىرىلادى. سونداي-اق, پايدالانۋشىلارعا باعىتتالعان اۆتوتولتىرۋ, ناقتى كەڭەستەر جانە فورماتتىق-لوگيكالىق باقىلاۋ سياقتى قولايلى ينتەرفەيس ەلەمەنتتەرى دە ىسكە قوسىلادى. بۇل جاڭاشىلدىقتار بيزنەسكە جۇكتەمەنى ازايتىپ, كەدەندىك راسىمدەۋدى ايتارلىقتاي جەڭىلدەتەدى دەپ كۇتىلىپ وتىر.