ەلوردادا جۇمىس ىستەيتىن جاستاردى باسپانا الۋ ماسەلەسىندە قولداۋعا باعىتتالعان «ەلوردا جاستارى» مەملەكەتتىك باعدارلاماسى تابىستى جۇزەگە اسىپ كەلەدى. وسى باعدارلاماعا قاتىسۋشىلاردىڭ ءبىرى ەركە بايعابىلوۆا مەملەكەتتىڭ باستاماسىنىڭ ارقاسىندا قالاي باسپانالى بولعانىن ايتىپ بەردى, دەپ جازادى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
ەركە بايعابىلوۆا استانادا جۇمىس ىستەيدى. بۇعان دەيىن جۇمىس ىستەيتىن جاستارعا ارنالعان جالعا بەرىلەتىن باسپانا باعدارلاماسىنا قاتىسىپ, بەس جىل بويى مەملەكەت بەرگەن پاتەردە تۇرعان. ونىڭ ايتۋىنشا, ءدال وسى ۋاقىت ءوز ءۇيىن ساتىپ الۋعا العىشارت بولعان.
«مەن «ەلوردا جاستارى» باعدارلاماسى تۋرالى «وتباسى» بانكىنىڭ وكىلدەرى ارقىلى ءبىلدىم. مەنى بىردەن ونىڭ شارتتارى قىزىقتىردى. بار بولعانى 10% باستاپقى جارنا جانە جىلدىق 5% تومەن پايىزدىق مولشەرلەمە. بۇل ءتيىمدى بولدى», دەيدى ەركە بايعابىلوۆا.
جالداۋ مەرزىمى اياقتالعان كەزدە اقشاسىن دا جيناپ ۇلگەرگەن. جالعا بەرىلگەن پاتەردە تۇرعان بەس جىلدا ءوز پاتەرىن ساتىپ الۋ ءۇشىن قارجىلىق نەگىزىن قالاعان. استانا تۇرعىنى مۇمكىندىگىن جىبەرمەي, قۇجات تاپسىرۋدى ءجون كورگەن.
«باعدارلاما وتە ءتيىمدى بولدى. بانك مەنەدجەرلەرىنىڭ ءوتىنىش بەرۋدەن باستاپ سوڭىنا دەيىنگى بارلىق كەزەڭدە بىزبەن بىرگە بولعانى ەرەكشە قۋانتتى. بۇل ماعان سەنىمدىلىك بەرىپ, بۇكىل پروتسەستى ايتارلىقتاي جەڭىلدەتتى», دەيدى ول.
قازىر ەركە وتباسىمەن بىرگە ءوز پاتەرىندە تۇرىپ جاتىر جانە «ەلوردا جاستارى» باعدارلاماسى كوپتەگەن جاستارعا ماڭىزدى قادام جاساۋعا مۇمكىندىك بەرەتىنىن ايتتى.
ايتا كەتەيىك, «ەلوردا جاستارى» باعدارلاماسى 34 جاسقا دەيىنگى جاستارعا جەڭىلدىكپەن نەسيە بەرۋدى ۇسىنادى. نەسيەنىڭ ماكسيمالدى سوماسى 20 ملن تەڭگەگە دەيىن, مولشەرلەمەسى – جىلدىق 5%, باستاپقى جارناسى – 10%. تۇرعىن ءۇيدى باستاپقى جانە قايتالاما نارىقتان ساتىپ الۋعا بولادى.