مەملەكەت باسشىسى – قازاقستان قارۋلى كۇشتەرى جوعارعى باس قولباسشىسى قاسىم-جومارت توقاەۆ ۇلى جەڭىستىڭ 80 جىلدىعىنا ارنالعان اسكەري پارادتا ءسوز سويلەدى, دەپ حابارلايدى Egemen.kz.
مەملەكەت باسشىسى قاسىم-جومارت توقاەۆ ۇلى جەڭىس كۇنىنە وراي قازاقستاندىقتاردى قۇتتىقتاپ, اتاۋلى مەرەكەنىڭ ماڭىزىن اتاپ ءوتتى. پرەزيدەنتتىڭ ايتۋىنشا, بيىل ۇلى جەڭىسكە 80 جىل تولىپ وتىر. بۇل — حالقىمىزدىڭ وتانسۇيگىشتىگى مەن جاۋىنگەرلىك رۋحىنىڭ ايقىن كورىنىسى.
«بيىل ۇلى جەڭىسكە – 80 جىل! بارشاڭىزعا ۇلى جەڭىس كۇنى قۇتتى بولسىن! بۇل مەيرام – حالقىمىزدىڭ جاۋىنگەرلىك رۋحىنىڭ سيمۆولى. ءبىز ەلدىك ءۇشىن كۇرەسكەن باتىر بابالاردى ۇلىقتايمىز. وتان قورعاۋ جولىندا وپات بولعان بوزداقتارعا تاعزىم ەتەمىز. بەيبىت كۇندى قىراعى كۇزەتىپ تۇرعان ساربازدارعا قۇرمەت كورسەتەمىز», دەدى مەملەكەت باسشىسى.
پرەزيدەنت سوعىس زاردابى قازاقستان حالقى ءۇشىن دە اۋىر بولعانىن ەسكە سالدى.
«قاھارلى كۇندەر سوعىستىڭ تەك قاسىرەت اكەلەتىنىن كورسەتتى. بەيبىتشىلىكتىڭ باعا جەتپەس بايلىق ەكەنىن ۇعىندىردى. ۇلى جەڭىس – تاريحىمىزدىڭ اجىراماس بولىگى جانە كۇللى الەم ءۇشىن ۇلكەن ساباق. ءبىز وسى اقيقاتتى ءاردايىم ەستە ساقتاۋىمىز كەرەك. زۇلمات كەزەڭدى باستان وتكەرگەن مايدانگەرلەر قازىر ورتامىزدا وتىر. قۇرمەتتى ارداگەرلەر, بارشا حالىقتىڭ اتىنان سىزدەرگە شىن جۇرەكتەن العىس ايتامىن! اعا بۋىننىڭ وشپەس ەرلىگى – ۇرپاققا ۇلاعات. وتانشىلدىعى مەن جانقيارلىعى – ۇلگى-ونەگە. ءبىز ۇلى وتان سوعىسىنىڭ ارداگەرلەرىن ەشقاشان ۇمىتپايمىز! بارشاڭىزعا باس يەمىز!» دەدى قاسىم-جومارت توقاەۆ.