ۇلەسكەرلىك قۇرىلىس نارىعىندا بارلىق تاراپقا تۇسىنىكتى, ادال ەرەجەلەر ورناتۋ, ينۆەستيتسيالانعان اقشانى قورعاۋ, پاتەردىڭ ۋاقىتىندا جانە ۋادە ەتىلگەندەي سالىنۋىن قاداعالاۋ ماقساتىندا ماڭىزدى وزگەرىستەر ەنگىزىلىپ جاتىر, دەپ حابارلايدى Egemen.kz.
ەلىمىزدە تۇرعىن ءۇي قاتىناستارى تۋرالى زاڭنامانى جەتىلدىرۋ شەڭبەرىندە ازىرلەنگەن جاڭا زاڭ جوباسى ۇلەسكەرلەردىڭ قۇقىقتارىن قورعاۋدى كۇشەيتۋگە, قۇرىلىستىڭ بارلىق كەزەڭىندە جوبالاردىڭ اشىقتىعىن قامتاماسىز ەتۋگە جانە قۇرىلىس سالۋشىلارعا قويىلاتىن تالاپتاردى قاتاڭداتۋعا باعىتتالعان. زاڭ جوباسىندا تۇرعىن ءۇي قۇرىلىسىنا ۇلەستىك قاتىسۋدىڭ نەگىزگى اسپەكتىلەرىن قامتيتىن بىرقاتار جاڭاشىلدىق قاراستىرىلدى. اتاپ ايتقاندا, بۇدان بىلاي قۇرىلىس سالۋشىلار ۇلەسكەرلەردىڭ قاراجاتىن رۇقسات قۇجاتتارىنىڭ تولىق پاكەتى جانە قارجىلىق تۇراقتىلىعى راستالعان جاعدايدا عانا تارتا الادى. بۇل قۇرىلىستىڭ جەتكىلىكتى نەگىزسىز, كەپىلدىكتەرسىز سالىنۋىن بولدىرمايدى. ۇلەستىك قۇرىلىستىڭ بارلىق جوبالارى: ىسكە اسىرۋ كەزەڭدەرى, جاسالعان شارتتار سانى, رۇقساتتاردىڭ بولۋى تۋرالى مالىمەت جينالىپ, كورسەتىلەتىن اقپاراتتىق جۇيەنى ەنگىزۋ جوسپارلانىپ وتىر. بۇل ازاماتتار ءۇشىن دەرەكتەردىڭ قولجەتىمدىلىگىن قامتاماسىز ەتىپ, مەملەكەت پەن جۇرتشىلىقتىڭ باقىلاۋىنا ءتيىستى جاعداي جاسايدى.
سونداي-اق ۇلەسكەردى قورعاۋعا باعىتتالعان ەرەجەلەردىڭ مىندەتتى جيىنتىعى بار ۇلەستىك قاتىسۋ شارتتارىنىڭ ۇلگىلىك نىساندارى بەكىتىلەدى. شارتتى بىرجاقتى تارتىپپەن قولدان جاساۋعا نەمەسە ماجبۇرلەۋ تاۋەكەلدەرىنە جول بەرمەۋ ءۇشىن ونى نوتاريالدى كۋالاندىرۋ مۇمكىندىگى قاراستىرىلادى. قۇرىلىس مەرزىمدەرىن بۇزعانى, بۇرىس اقپارات بەرگەنى نەمەسە جوبالىق شەشىمدەردى ساقتاماعانى ءۇشىن جاۋاپكەرشىلىكتىڭ نەعۇرلىم قاتاڭ شارالارى كوزدەلگەن. بۇدان باسقا, بۇزۋشىلىق انىقتالعان جاعدايدا ۇلەسكەرلەردىڭ جاڭا قاراجاتىن تارتۋعا تىيىم سالۋدى قوسا العاندا, قۇرىلىس سالۋشىنىڭ قىزمەتىن توقتاتا تۇرۋ ءۇشىن نەگىزدەر ناقتىلاندى. جوبالىق قۇجاتتاماعا جانە تەحنيكالىق تاپسىرىس بەرۋشىگە قويىلاتىن تالاپ تا قاتاڭ. زاڭ جوباسىندا وسىنداي مامانداردى اتتەستاتتاۋ جۇيەسىن ەنگىزۋگە جانە قۇرىلىس ساپاسىن باقىلاۋدى كۇشەيتۋگە نازار اۋدارىلعان.
جاڭا ءتاسىل نارىقتىڭ باستى ماسەلەلەرىنىڭ ءبىرى – قۇرىلىس سالۋشىلارعا دەگەن سەنىمنىڭ تومەندىگىن جانە پاتەرگە قاراجات سالاتىن ازاماتتاردىڭ تاۋەكەلدەرىن شەشۋ ءۇشىن ماڭىزدى.