اقتوبەدەگى قازاق-ورىس حالىقارالىق ۋنيۆەرسيتەتى (قوحۋ) 2024–2025 وقۋ جىلىنىڭ سوڭىندا ءوز قىزمەتىن رەسمي تۇردە توقتاتادى. ەلىمىزدە 31 جىلدان بەرى ستۋدەنتتەرگە ءبىلىم بەرىپ كەلە جاتقان ىرگەلى وقۋ ورنىنىڭ جابىلۋىنا نە سەبەپ بولدى؟ Egemen.kz ءتىلشىسى ماسەلەنىڭ ءمان-جايىن زەردەلەپ كوردى.
بۇل شەشىمگە ستۋدەنتتەردىڭ ساباققا قاتىسۋ كورسەتكىشىنىڭ كۇرت تومەندەۋى سەبەپ بولعان. قر عىلىم جانە جوعارى ءبىلىم مينيسترلىگىنىڭ تەكسەرىسى بارىسىندا انىقتالعان دەرەكتەرگە سايكەس, ۋنيۆەرسيتەتتە ءبىلىم الۋشىلاردىڭ 90 پايىزى وقۋ پروتسەسىنە قاتىسپاعان.
«2024–2025 وقۋ جىلىنىڭ سوڭىندا قوحۋ ءبىلىم بەرۋ قىزمەتىن توقتاتاتىنىن حابارلايمىز. بۇل شەشىم ستۋدەنتتەردىڭ ساباققا قاتىسۋىنىڭ 90%-عا دەيىن تومەندەۋى مەن ىشكى تەكسەرىس ناتيجەلەرى نەگىزىندە قابىلداندى. وسىعان بايلانىستى, وقۋ جىلى اياقتالعان سوڭ, باسقا جوعارى وقۋ ورىندارىنا رەسمي تۇردە اۋىسۋلارىڭىزدى سۇرايمىز. 2025–2026 وقۋ جىلىنان باستاپ تاڭداعان ۋنيۆەرسيتەتتەرىڭىزدە وقۋلارىڭىزدى جالعاستىراتىن بولاسىزدار», دەلىنگەن ۋنيۆەرسيتەتتىڭ ستۋدەنتتەرگە جولداعان رەسمي حابارلاماسىندا.
بۇل اقپاراتتى ۋنيۆەرسيتەت باسشىلىعى دا راستاپ وتىر. ءبىلىم ورداسىنىڭ وكىلدەرى ستۋدەنتتەردىڭ ساباققا قاتىسپاۋى عانا ەمەس, وقىتۋشى-پروفەسسورلار قۇرامىنىڭ جەتكىلىكسىزدىگى دە نازارعا الىنعانىن ايتىپ وتىر.
ء«يا, بۇل – شىندىق. بىرقاتار كەمشىلىكتەر بىرىنەن سوڭ ءبىرى انىقتالىپ, ۋنيۆەرسيتەت يەلەرى جوعارعى وقۋ ورنىن جابۋعا ءماجبۇر بولدى. دەگەنمەن, بارلىق ستۋدەنتتەردىڭ وقۋلارىن باسقا ۋنيۆەرسيتەتتەردە جالعاستىرۋىنا مۇمكىندىك بەرىلگەن. ەشكىم دالادا قالمايدى», دەپ مالىمدەدى وقۋ ورنىنىڭ باسشىلىعى.
قر عىلىم جانە جوعارى ءبىلىم مينيسترلىگى عىلىم جانە جوعارى ءبىلىم سالاسىنداعى ساپانى قامتاماسىز ەتۋ كوميتەتى توراعاسىنىڭ ورىنباسارى ارتۋر جاۋحان ۇلىنىڭ ايتۋىنشا, بيىل مينيسترلىككە ۋنيۆەرسيتەت قۇرىلتايشىسىنان رەسمي مالىمدەمە كەلىپ تۇسكەن.
مالىمدەمەگە سايكەس, ءبىلىم بەرۋ قىزمەتىنىڭ وقۋ جىلى اياقتالعان سوڭ توقتاتىلىپ, ارى قاراي جوعارى ءبىلىمدى مامانداردى كادرلىق دايارلاۋ قىزمەتىنە شەكتەۋ قويىلاتىنى ايتىلعان بولاتىن. تەك قانا بىرنەشە ءبىلىم بەرۋ باعدارلامالارى توقتاتىلعانى بولماسا, 2024-2025 وقۋ جىلىندا اتالعان ۋنيۆەرسيتەت ءبىلىم بەرۋ قىزمەتىن جالعاستىردى.
«بيىلعى جىلى ناۋرىز ايىندا بىرنەشە جۇزدەگەن ستۋدەنتتەردى وقۋدان شىعارىلۋىنا بايلانىستى ءتۇرلى ماسەلەلەر كوتەرىلگەن بولاتىن. سايكەسىنشە, مينيسترلىك تاراپىنان ءساۋىر ايىندا اتالعان جوعارى وقۋ ورنىنا مەملەكەتتىك باقىلاۋ شاراسى جۇرگىزىلدى. ناتيجەسى بويىنشا, ءبىلىمنىڭ ساپاسىنا بايلانىستى, ستۋدەنتتەردىڭ ءبىلىم الۋىنا قاجەتتى جاعداي جاسالۋ دەڭگەيىنە قاتىستى ءتۇرلى سۇراقتار پايدا بولدى. دەگەنمەن, قازاق-ورىس حالىقارالىق ۋنيۆەرسيتەتىن ليتسەنزياسىنان ايىرۋ تۋرالى شەشىم بۇگىنگى تاڭدا كۇشىنە ەنگەن جوق, ياعني, بيىلعى جىلى ستۋدەنتتەردىڭ وقۋىن تولىقتاي اياقتاپ, قولدارىنا ءتيىستى ديپلومدارىن الىپ شىعۋ ءۇشىن تولىق جاعداي جاسالعان. ياعني, 2025 جىلعى مامىرداعى جاعداي بويىنشا, قازاق-ورىس حالىقارالىق ۋنيۆەرسيتەتى ليتسەنزياسى زاڭدى كۇشىندە, وقۋدى تولىق اياقتاپ شىعۋعا, ەمتيحانداردى ۋاقىتىلى تاپسىرۋعا تولىق مۇمكىندىك بار», دەيدى ارتۋر جاۋحان ۇلى.
مينيسترلىك وكىلدەرى اتا-انالارمەن ارنايى كەزدەسۋ وتكىزىپ, ستۋدەنتتەردىڭ باسقا وقۋ ورىندارىنا اۋىسۋ ءتارتىبى جايلى ءتۇسىندىرۋ جۇمىستارىن جۇرگىزگەن. قازاقستان رەسپۋبليكاسىنىڭ ء«بىلىم تۋرالى» زاڭىنىڭ 42-بابىنا سايكەس, ءبىلىم بەرۋ قىزمەتى توقتاتىلعان جاعدايدا, وقۋ ورنى ستۋدەنتتەردى ەكى ايدىڭ ىشىندە وزگە جوعارى وقۋ ورىندارىنا ورنالاستىرۋعا جانە بارلىق قۇجاتتاردى مەملەكەتتىك ارحيۆكە تاپسىرۋعا مىندەتتى.
بيىل وقۋدى اياقتايتىن ستۋدەنتتەرگە ديپلوم مەن قۇجاتتارىن ۋاقتىلى بەرۋ دە زاڭ اياسىندا قاتاڭ باقىلاناتىن بولادى. سونىمەن قاتار, 1, 2 جانە 3-كۋرس ستۋدەنتتەرىن كورشىلەس جوعارى وقۋ ورىندارىنا اۋىستىرۋ ماسەلەسى دە شەشىمىن تابادى.
ايتا كەتەيىك, قوحۋ بيىلعى ساۋىردە ۇلكەن داۋعا ىلىككەن بولاتىن. ۋنيۆەرسيتەت 350 ستۋدەنتتى وقۋ اقىسىن تولەمەگەنى جانە جۇيەلى تۇردە ساباققا قاتىسپاعانى ءۇشىن وقۋدان شىعارعان. بۇل جاعداي ستۋدەنتتەردىڭ نارازىلىعىن تۋدىرعان.
وقيعاعا بايلانىستى مينيسترلىك كوميسسياسى وقۋ ورنىنا ارنايى بارىپ, تەكسەرىس جۇرگىزدى. ناتيجەسىندە, ستۋدەنتتەردىڭ وقۋدان شىعارىلۋى زاڭسىز دەپ تانىلعان.
اقتوبە قازاق-ورىس ۋنيۆەرسيتەتى 1994 جىلى تەمىرحان بەردىمۋراتوۆتىڭ باستاماسىمەن قۇرىلعان جەكە مەنشىك جوعارى وقۋ ورنى.