ۇلىتاۋ وبلىسىنىڭ اكىمى داستان رىسپەكوۆ ۇلىتاۋ اۋدانىنا جۇمىس ساپارىمەن بارىپ, جەرگىلىكتى حالىقپەن كەزدەستى. اۋدان تۇرعىندارىن جەكە قابىلداپ, وزەكتى ماسەلەنى كوتەرگەن ءوتىنىشىن تىڭدادى, دەپ جازادى Egemen.kz.
كەزدەسۋدە تۇرعىن ءۇي الۋ كەزەگى, جول جانە كوپىر ينفراقۇرىلىمىن جوندەۋ, جارىقپەن قامتاماسىز ەتۋ ماسەلەلەرى كوتەرىلدى. وبلىس اكىمى ءاربىر ءوتىنىش جەكە باقىلاۋعا الىناتىنىن ايتىپ, ءتيىستى سالا باسشىلارىنا ناقتى تاپسىرمالار جۇكتەدى.
وبلىس باسشىسى ۇلىتاۋ اۋدانىنداعى الەۋمەتتىك وسال توپتاعى 10 وتباسىعا جاڭا پاتەر كىلتىن تاپسىردى.
سونىمەن قاتار, «سامعا» جشس ديرەكتورى اباي بولات ۇلى كوپبالالى اناعا قوسىمشا ءۇش بولمەلى پاتەر سىيعا تارتتى. وبلىس اكىمى دەمەۋشىلىك جاساعان كاسىپكەرگە العىس ايتتى.
داستان رىسپەكوۆ كەزدەسۋدە اۋدانعا بىلىكتى كادرلاردى تارتۋ جۇمىستارىن جالعاستىرىپ, جاس مامانداردى تۇرعىن ۇيمەن قامتاماسىز ەتۋ جاعىن جەدەلدەتۋ قاجەتتىگىن تاپسىردى.
جۇمىس ساپارىندا ءوڭىر باسشىسى «تازا قازاقستان» رەسپۋبليكالىق ەكولوگيالىق اكتسياسىنا قاتىسىپ, تاڭبالى تاس ساياباعىنا جانە جەكە كاسىپكەر سالعان ورمانشىلىق القابىندا شىرشا كوشەتتەرىن وتىرعىزدى.