جاقىندا كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىندە ءداستۇرلى مۋزىكالىق ونەر فاكۋلتەتىنىڭ ۇيىمداستىرۋىمەن ەكىنشى دۇنيەجۇزىلىك سوعىستاعى جەڭىستىڭ 80 جىلدىعىنا ارنالعان «ەر ەسىمى – ەل ەسىندە» اتتى كونتسەرت ءوتتى.
ەل باسىنا كۇن تۋعاندا قانشاما اتالارىمىز بەن انالارىمىز جەرىمىزدى جاۋدان قورعاۋعا اتتاندى. سولاردىڭ اراسىندا ونەر ادامدارى دا وتان الدىنداعى پارىزىن ورىنداپ, ۇرپاعىنىڭ اماندىعى مەن بولاشاعى ءۇشىن جاندارىن قيىپ, شەيىت كەتتى. ماسەلەن, سماعۇل كوشەكباەۆ, عابدۇلمان ماتوۆ, مالىك جاپپاسباەۆ, ىسقاق ۋاليەۆ, رامازان ەلەباەۆ سەكىلدى مارعاسقالاردى اتاۋعا بولادى. سوعىستان امان-ەسەن ەلگە ورالعانداردىڭ ىشىندە رۇستەمبەك وماروۆ, نۇرعيسا تىلەنديەۆ, تۇراش ءابۋوۆ, ساميعوللا اندارباەۆ سىندى ونەر مايتالماندارى بار.
وسىنداي ەرجۇرەك اتالاردى ەسكە الۋعا ارنالعان ءىس-شارانى قازاقستاننىڭ ەڭبەك سىڭىرگەن قايراتكەرى, پروفەسسور داۋرەن عىلىموۆ جەتەكشىلىك ەتەتىن ستۋدەنتتىك قازاق حالىق اسپاپتار وركەسترى مۇرات وسكىمباەۆتىڭ «جەڭىس» كۇيىمەن اشتى. دينا نۇرپەيىسوۆا اتىنداعى رەسپۋبليكالىق قوعامدىق قوردىڭ توراعاسى, پەداگوگيكا عىلىمدارىنىڭ كانديداتى, پروفەسسور تولەگەن قۋانىشەۆ پەن قازاقستاننىڭ ەڭبەك سىڭىرگەن مادەنيەت قىزمەتكەرى, ك.بايسەيىتوۆا اتىنداعى قازۇوۋ-ءدىڭ پروفەسسورى ايتجان توقتاعان جەڭىس كۇنىن جاقىنداتقان قاھارمانداردىڭ عۇمىر تاريحىنا توقتالدى.
«سوعىس كەزىندەگى جانە ودان كەيىنگى شىعارمالاردى زەرتتەپ-زەردەلەۋ – ونەرلى اعا بۋىننىڭ بىزگە قالدىرىپ كەتكەن اماناتى دەپ قابىلداعانىمىز ورىندى بولار. سول ۋاقىتتا جازىلىپ, تارتىلعان كۇيلەر مەن ورىندالعان اندەردە مۇڭ مەن زارلى ۇندەردىڭ باسىم ەكەندىگى ايقىن بايقالادى. سەبەبى بۇل كەزەڭدەگى شىعارمالار بالاسى نەمەسە جارى قان مايدانعا اتتانىپ, قايتىپ ەلگە كەلەرىن نە كەلمەسىن بىلمەيتىن قاپالى كۇي كەشكەن تۇستا, وسىنداي سەزىمدەردىڭ ناتيجەسىندە تۋىندادى. مىسال رەتىندە كەنەن ازەرباەۆتىڭ ء«بىزدىڭ وتان جەڭەدى», سماعۇل كوشەكباەۆتىڭ «مايدانعا» اتتى اندەرىن جانە دينا نۇرپەيىسوۆانىڭ «مايدانداعى بالاما» اتتى كۇيىن ايتۋعا بولادى» دەپ اتاپ ءوتتى پروفەسسور ت.قۋانىشەۆ.
كونتسەرتتە قۇرمانعازىنىڭ «ەرتەڭ كەتەم», «پابەسكى», «لاۋىشكەن» كۇيلەرى, سونداي-اق, «مايدانعا», «جاس قازاق», ء«وتتى ءومىر», «سۇيگەن جار», ت.ب. اندەر ورىندالدى. ءىس-شارا بۇگىندە 100 جىلدىعى تويلانىپ جاتقان حالىق قاھارمانى نۇرعيسا تىلەنديەۆتىڭ «جەڭىس سالتاناتىمەن» اياقتالدى.