29 ءساۋىر كۇنى اتىراۋ قالاسىندا North Caspian Operating Company (NCOC) كومپانياسىنىڭ ءبولىم باسشىسى, 45 جاستاعى بيبىگۇل شپانوۆانىڭ ءمايىتى ءوز ۇيىنەن تابىلدى.
پوليتسيا مالىمەتىنشە, ايەلدىڭ دەنەسىندە پىشاق جاراقاتتارى بولعان, ال پاتەرىندەگى سەيف اشىلعان, دەپ حابارلايدى Ulysmedia.kz.
“اق جايىق” اقپاراتىنشا مارقۇمنىڭ تۋىستارى ادام قۇقىقتارى بيۋروسىنا شاعىمدانىپ, ءىستىڭ جان-جاقتى تەرگەلۋىن تالاپ ەتتى. ولار بۇل قىلمىستىڭ شپانوۆانىڭ كاسىبي قىزمەتىمەن بايلانىسى بولۋى مۇمكىن ەكەنىن جوققا شىعارمايدى.
پوليتسيانىڭ حابارلاۋىنشا, كۇدىكتى — 1987 جىلى تۋعان ازامات ۇستالىپ, ۋاقىتشا ۇستاۋ يزولياتورىنا قامالدى. قر قىلمىستىق كودەكسىنىڭ 99-بابى 2-بولىگى ("ادام ءولتىرۋ") بويىنشا ءىس قوزعالدى. زاتتاي دالەلدەر تاركىلەندى, تەرگەۋ ءجۇرىپ جاتىر.
ادام قۇقىقتارى جونىندەگى بيۋرو Facebook پاراقشاسىندا مارقۇم شپانوۆانىڭ كاشاگان كەن ورنىن يگەرۋ سىندى ەل ءۇشىن ماڭىزدى جوبالارعا قاتىسقانىن حابارلادى. وسىعان بايلانىستى ولار كەلەسى تالاپتاردى جاريالادى:
قايعىلى وقيعانىڭ بارلىق ءمان-جايىن تولىق ءارى وبەكتيۆتى زەرتتەۋ;
قىلمىستىڭ كاسىبي قىزمەتپەن بايلانىسىن دا قاراستىرۋ;
وتباسىنا ناقتى ءارى تولىق اقپارات بەرۋ, ىسكە قول جەتكىزۋ مۇمكىندىگىن قامتاماسىز ەتۋ;
تەرگەۋدىڭ اشىق جۇرگىزىلۋى جانە بارلىق جاۋاپتى تۇلعالاردى جاۋاپكەرشىلىككە تارتۋ.
اتىراۋ وبلىستىق پوليتسيا دەپارتامەنتى تەرگەۋ بارىسى ولاردىڭ باقىلاۋىندا ەكەنىن مالىمدەدى.