بۇگىن Maqsut Narikbayev University-دە (MNU) «ورتالىق ازيا XIX-XX عاسىرلارداعى باتىس زەرتتەۋشىلەرى مەن ساياحاتشىلارىنىڭ كوزىمەن» جوباسى اياسىنداعى العاشقى كورمە ءوتتى. ءىس-شارا بارىسىندا سول تاريحي كەزەڭدەگى ءوڭىر ءومىرىن ايقىن بەينەلەيتىن بىرەگەي ارحيۆ ماتەريالدارى كوپشىلىك نازارىنا ۇسىنىلدى, دەپ جازادى Egemen.kz.
كورمە ماجارستاننىڭ قازاقستانداعى ەلشىلىگىمەن بىرلەسىپ ۇيىمداستىرىلىپ, تانىمال ماجار شىعىستانۋشىسى جانە ساياحاتشىسى ارمينيۋس ۆامبەريدىڭ ەڭبەكتەرىنە ارنالدى. ەكسپوزيتسيادا ونىڭ 1868 جىلى جارىق كورگەن «ورتالىق ازياعا ساياحات» اتتى كىتابىنان تسيفرلانعان فوتوماتەريالدار مەن تاريحي سۋرەتتەر توپتاماسى قويىلدى. كورمەگە عىلىم جانە جوعارى ءبىلىم مينيسترلىگى مەن سىرتقى ىستەر مينيسترلىگىنىڭ وكىلدەرى, ديپلوماتيالىق كورپۋس مۇشەلەرى, تاريحشىلار, حالىقارالىق ساراپشىلار جانە جۋرناليستەر قاتىستى.
«Maqsut Narikbayev University-دەگى بۇل كورمە – تۇركىتانۋ عىلىمىنىڭ دامۋى مەن ماجارستاندا قالىپتاسۋىن كورسەتەتىن ماڭىزدى وقيعا. ارمينيۋس ۆامبەري – الەمدىك تۇركىتانۋدىڭ نەگىزىن قالاۋشىلاردىڭ ءبىرى. ول ورتالىق ەۋروپاعا قونىستانعان ماجار تايپالارىنىڭ شىعۋ تەگىن زەرتتەۋگە بار عۇمىرىن ارنادى. سونىمەن قاتار ماجار ءتىلى تۇركى تىلدەرىنە جاتا ما, الدە فين-ۋگور تىلدىك توبىنا ما دەگەن بۇگىنگە دەيىن وزەكتىلىگىن جوعالتپاعان عىلىمي پىكىرتالاستى دا العاشقىلاردىڭ ءبىرى بولىپ كوتەرگەن ەدى. ونىڭ ەڭبەكتەرى ماجارستان مەن ورتالىق ازيا حالىقتارى اراسىنداعى رۋحاني بايلانىستىڭ بەرىك نەگىزىن قالادى. سونىڭ ارقاسىندا قازاقتار مەن ماجارلار اراسىنداعى تۋىستىق سەزىم بۇگىنگە دەيىن ساقتالىپ وتىر», دەدى ماجارستاننىڭ قازاقستانداعى توتەنشە جانە وكىلەتتى ەلشىسى وتتو يۆان رونا.
كورمەدە باتىس ەتنوگرافتارى, شىعىستانۋشىلارى, ساياحاتشىلارى مەن لينگۆيستەرىنىڭ كوزقاراستارى ارقىلى ورتالىق ازيانىڭ تاريحي مۇراسىن كەڭىنەن ناسيحاتتاۋ كوزدەلدى.
«ارمينيۋس ۆامبەريدىڭ ورتالىق ازياعا جاساعان ساياحاتى ءارتۇرلى وركەنيەتتەر اراسىنداعى ءوزارا تۇسىنىستىككە جاڭا جول اشتى. وسى تاريحتى ۋنيۆەرسيتەت قابىرعاسىندا بولىسە العانىمىزعا ءبىز ەرەكشە قۋانىشتىمىز. Maqsut Narikbayev University-دە ءبىز زەرتتەۋشىلىك رۋحتى, پىكىر الماسۋ جانە تاريحقا دەگەن قۇرمەتتى جوعارى باعالايمىز. وسىنداي مادەني باستامالاردى قولداۋ – ءبىزدىڭ حالىقتار اراسىنداعى كوپىرلەردى نىعايتۋ جانە ستۋدەنتتەرىمىزدى ءوز مۇراسىن عانا ەمەس, الەمدىك مادەنيەتتەردىڭ بايلىعىن دا باعالاۋعا شابىتتاندىرۋ جولىنداعى كەڭ مىندەتتەرىمىزدىڭ ءبىر بولىگى», دەدى MNU پروۆوستى سەرگەي پەن.