شىمكەنتتە تۇران-1 شاعىناۋدانىندا شۇڭقىرعا قۇلاپ, سۋعا تۇنشىعىپ ولگەن 7 جاسار بالانىڭ ولىمىنەن كەيىن قاراتاۋ اۋدانىنىڭ اكىمى راقىمبەردى مۇلكەمانوۆ ورنىنان بوساتىلدى. ونىڭ ورنىنا 35 جاستاعى الماس اباەۆ اكىم بولىپ تاعايىندالدى, دەپ حابارلايدى Egemen.kz.
ر.مۇلكەمانوۆ بۇل قىزمەتتى 2022 جىلدان بەرى اتقارىپ كەلگەن.
سونىمەن بىرگە قايعىلى وقيعاعا بايلانىستى بىرنەشە لاۋازىمدى تۇلعالار جازالاندى. اتاپ ايتقاندا شىمكەنت قالالىق ەنەرگەتيكا جانە كوممۋنالدىق شارۋاشىلىق باسقارماسىنىڭ باسشىسىنا قاتاڭ سوگىس بەرىلسە, وسى سالاعا جاۋاپتى قالا اكىمىنىڭ ورىنباسارى سوگىس ارقالادى.
مۇنان وزگە جۇمىسىنا سالعىرتتىق تانىتىپ سونىڭ سالدارىنان ولىمگە سەبەپكەر بولعانى ءۇشىن 2 كاسىپكەر قاماۋعا الىندى. شىمكەنت قالالىق پوليتسيا دەپارتامەنتى وسىعان قاتىستى مىناداي رەسمي مالىمدەمە جاسادى.
«12 ساۋىردە قاراتاۋ اۋدانى اۋماعىندا قورشالماعان, سۋعا تولى شۇڭقىردان 7 جاسار بالانىڭ ءولى دەنەسى تابىلعان بولاتىن. اتالعان جايت بويىنشا قىلمىستىق ءىس قوزعالدى. تەرگەۋ بارىسىندا ەكى مەردىگەرلىك كومپانيا قۇرىلىس جۇمىستارى بارىسىندا قاۋىپتى اۋماقتى قورشاۋ جانە ەسكەرتۋ بەلگىلەرىن قويۋ بويىنشا مىندەتتەرىن ورىنداماعانى بەلگىلى بولدى. پوليتسيامەن اتالعان كومپانيالار باسشىلارى ادام ولىمىنە اكەپ سوققان قۇرىلىس قىزمەتى سالاسىنداعى نورماتيۆتەردىڭ تالاپتارىن بۇزعانى ءۇشىن ۇستالىپ, قاماۋعا الىندى. قازىرگى تاڭدا وقيعانىڭ بارلىق ءمان-جايىن انىقتاۋعا باعىتتالعان كەشەندى تەرگەۋ جۇمىستارى جۇرگىزىلۋدە. پوليتسيا مۇنداي قايعىلى وقيعالاردىڭ الدىن الۋ ماقساتىندا قاۋىپسىزدىك تالاپتارىن قاتاڭ ساقتاۋعا شاقىرادى».
شىمكەنت قالالىق ەنەرگەتيكا جانە كوممۋنالدىق شارۋاشىلىق باسقارماسىنىڭ باسشىسى رزابەك مەڭدىقۇلوۆتىڭ مالىمدەۋىنشە قازىر اكىمدىك دەمەۋشىلەر ەسەبىنەن شۇڭقىردى بەكىتىپ ورنىن جوندەۋگە شۇعىل كىرىسىپ جاتىر.
«شۇڭقىر تۇرعان ايماق تۇران-1 شاعىناۋدانىنداعى ەڭ ويپاڭ جەر. 2018 جىلعى كونكۋرس بويىنشا ول جەردەن جول ءتۇسۋى كەرەك ەدى. الايدا «اقجول» مەردىگەر كومپانياسى جۇمىستى دۇرىس اتقارماي, سونىڭ كەسىرىنەن اتالعان اۋماقتا جاڭبىر سۋى تولىپ قالا بەرەتىن. وعان قوسا سول ايماقتان وتكەن كارىز جۇيەسىنىڭ دە سۋى كەپ قوسىلاتىن. ساپاسىز قىزمەتىنە بايلانىستى جول ىستەۋشى مەردىگەر كومپانيانىڭ جۇمىسى 2021 جىلى اكىمدىك تاراپىنان قابىلدانبايدى. سويتەدى دە كەلىسىمشارت ءارى قاراي بىرەشە جىلعا سوزىلىپ كەتەدى. 2024 جىلى دا اكىمدىك جول ساپاسىز سالىنعاندىقتان ونى قابىلداپ الۋدان باس تارتادى. سوندىقتان شۇڭقىر پايدا بولعا ايماقتاعى جول قازىرگى تاڭدا اكىمدىكتىڭ بالانسىندا ەمەس. دەگەنمەن كوممۋنالدىق باسقارما «اقجول» مەردىگەر كومپانياسىن سوتقا بەردى. سونداي-اق سول اۋماقتان كارىز جۇيەسىن جۇرگىزگەن تاعى ءبىر مەردىگەر مەكەمەگە قاتىستى سوت ءبىزدىڭ بەرگەن تالاپ ارىزىمىزعا وراي وڭ شەشىم شىعاردى. ياعني سوت كەزىندە كارىز جۇيەسىن سالعان كومپانياعا ورىن العان اقاۋلاردى ءوز ەسەبىنەن جوندەۋگە مىندەتتەدى» دەدى ول.
قالا اكىمىنىڭ ورىنباسارى سارسەن قۇرانبەك ارنايى بريفينگتە بەرگەن مالىمدەمەسىندە ءبىر جىل بويى اشىق جاتقان شۇڭقىر ورنى ءبىر اي ىشىندە قالپىنا كەلتىرىلەتىنىن ايتتى. سونداي-اق بۇل جاعداي قالا اكىمى ع.سىزدىقبەكوۆ كەلمەي تۇرىپ بولعانىن ەسكە سالدى.