قر پرەمەر-ءمينيسترى ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا جەتىسۋ وبلىسىنىڭ اكىمى بەيبىت يساباەۆ وڭىردەگى گازداندىرۋ جانە تسيفرلاندىرۋ جۇمىستارى تۋرالى بايانداما جاسادى, دەپ حابارلايدى Egemen.kz.
اكىمنىڭ ايتۋىنشا, وبلىستاعى 358 ەلدى مەكەننىڭ 192-ءسى گازداندىرۋعا جاتادى. قازىرگى ۋاقىتتا 84 ەلدى مەكەن كوگىلدىر وتىنمەن قامتىلعان, بۇل 404 مىڭ ادامدى نەمەسە ءوڭىر حالقىنىڭ 58,2%-ىن قۇرايدى. جىل سوڭىنا دەيىن تاعى 42 ەلدى مەكەنگە گاز تارتۋ كوزدەلىپ وتىر.
جەتىسۋ وبلىسى قۇرىلعانعا دەيىن نەبارى 5 ەلدى مەكەن عانا گازبەن قامتىلعان بولاتىن. بۇگىنگى تاڭدا گازداندىرۋ جۇمىستارى قارقىندى ءجۇرىپ جاتىر. اتاپ ايتقاندا, «تالدىقورعان–ۇشارال» ماگيسترالدى گاز قۇبىرىنىڭ قۇرىلىسى 97%-عا اياقتالىپ, 294 شاقىرىمدىق قۇبىر جەلىسى سالىندى. سونىمەن قاتار, 6 اۆتوماتتاندىرىلعان گاز تاراتۋ ستانتسياسىن ورناتۋ جۇمىستارى باستالعان. جوبا قازان ايىندا تولىق اياقتالادى دەپ جوسپارلانعان.
اتالعان ماگيسترال ارقىلى اقسۋ, سارقان جانە الاكول اۋداندارىنداعى 66 ەلدى مەكەندى گازداندىرۋ جوسپارلانىپ وتىر. قازىرگى تاڭدا جوبالاۋ-سمەتالىق قۇجاتتاما ازىرلەنىپ, ونىڭ ساراپتامالىق قورىتىندىسى بيىلعى قىركۇيەكتە دايىن بولادى. بۇل جوبالارعا 2026–2027 جىلدارى رەسپۋبليكالىق بيۋدجەتتەن قارجى ءبولۋ قاجەت.
– اتالعان جوبالار تولىق ىسكە اسقان جاعدايدا جەتىسۋ وبلىسىنىڭ 642 مىڭ تۇرعىنى نەمەسە جالپى حالىقتىڭ 92 پايىزى كوگىلدىر وتىنعا قول جەتكىزەدى, – دەدى بەيبىت يساباەۆ.
اكىمنىڭ ايتۋىنشا, ءوڭىردى گازبەن قامتۋ جۇمىستارى ۇنەمى باقىلاۋدا جانە كەزەڭ-كەزەڭىمەن جۇزەگە اسىرىلىپ جاتىر.