مادەنيەت جانە اقپارات ءمينيسترى ايدا بالاەۆا بىرىككەن اراب امىرلىكتەرىنىڭ ابۋ-دابي قالاسىندا وتكەن VII مادەنيەت سامميتىنە قاتىستى.
فورۋمنىڭ نەگىزگى تاقىرىپتارى جاساندى ينتەللەكتىنىڭ مادەنيەت پەن ادام شىعارماشىلىعىنا ىقپالى, سونداي-اق بەيبىتشىلىكتى نىعايتۋداعى مادەني بايلانىستاردىڭ ءرولى بولدى.
پلەنارلىق سەسسيادا ءسوز سويلەگەن ايدا بالاەۆا جاھاندىق تۇراقسىزدىق جاعدايىندا مادەنيەتتىڭ ەرەكشە ماڭىزىن اتاپ ءوتتى.
«مادەنيەت تەك وتكەننىڭ مۇراسى ەمەس, بۇل – ديالوگتىڭ تەتىگى, ۇرپاقتار, ۇلتتار مەن دىندەر اراسىنداعى كوپىر. وركەندەۋ داۋىرىندە دە, قيىن كەزەڭدەردە دە مادەنيەت رۋحتى كوتەرىپ, شابىتتاندىرىپ, ادامداردى بىرىكتىرىپ وتىردى. بۇگىندە دە بۇل – بولاشاققا اپاراتىن سەنىمدى تىرەگىمىز ءارى ەلدەر اراسىنداعى ءوزارا ءىس-قيمىل تەتىگى», دەدى مينيستر.
سونىمەن قاتار ايدا بالاەۆا قازاقستانداعى عاسىرلار بويى قالىپتاسقان مادەني ارالۋاندىق داستۇرلەرىنە توقتالدى. بۇگىندە ەلىمىزدە جۇزدەن اسا ەتنوس وكىلدەرى ءوز ءتىلىن, ونەرىن ساقتاپ, بەيبىت ءومىر ءسۇرىپ كەلەدى. مينيستر مەملەكەت باسشىسى جاريالاعان «ارالۋاندىقتاعى بىرلىك» قاعيداتى قازاقستانداعى بەيبىتشىلىك پەن كەلىسىمنىڭ بەرىك نەگىزىنە اينالعانىن ەرەكشە اتاپ ءوتتى.
سامميت جۇمىسىنا 90 ەلدىڭ دەلەگاتسيالارى قاتىستى. حالىقارالىق جيىن يدەيا الماسۋ, گۋمانيتارلىق سالاداعى حالىقارالىق ىنتىماقتاستىقتى جانە مادەنيەت ارقىلى بەيبىتشىلىكتى نىعايتۋعا باعىتتالعان جاڭا باستامالاردى قالىپتاستىراتىن ماڭىزدى الاڭعا اينالدى.