ەلورداداعى «ەكسپو» حالىقارالىق كورمە ورتالىعىندا ونەركاسىپ جانە سۋمەن جابدىقتاۋ سالاسىنداعى ءۇش بىردەي حالىقارالىق كورمە ءوتىپ جاتىر. كولەمى 10 مىڭ شارشى مەتردەن استام الاڭدا 22 ەلدەن كەلگەن ماشينا جاساۋ, مەتالل وڭدەۋ, سۋمەن جابدىقتاۋ, ءوندىرىستى اۆتوماتتاندىرۋ مەن ينجەنەرلىك جاڭعىرتۋ شەشىمىن ۇسىنعان 290-نان استام كومپانيا جينالدى.
قاتىسۋشىلار اراسىندا «Hyundai WIA», «CHIRON Group SE», «KAMAZ», «QazTehna», «Bodor», «XT Laser», «Robentex», «ISCAR Kazakhstan», «Zoller», «KAPP NILES», «IGM Robotersysteme», «Guhring», «WeldExpert», «SMWAutoblok», «Linsinger Maschinenbau» جانە باسقالار ءوز ءونىمىن ۇسىنىپ وتىر. ءبىرىنشى كەزەكتە گەرمانيا, تۇركيا, اۋستريا, يتاليا, قىتاي ەلدەرىنىڭ ۇلتتىق ەكسپوزيتسيالارىن اتاپ وتكەن ءجون. گەرمانيا سورەسىندە ساكسونيا مەن تيۋرينگيا فەدەرالدى شتاتتارىنىڭ ۇجىمدىق ستەندتەرى, سونداي-اق ءارتۇرلى سالاعا ارنالعان جوعارى تەحنولوگيالىق شەشىمدەرى بار جەتەكشى نەمىس كومپانيالارى تۇر.
«ماشينا جاساۋ – ەلدىڭ ونەركاسىپتىك الەۋەتىنىڭ نەگىزى, تەحنولوگيالىق پروگرەستىڭ درايۆەرى جانە ۇلتتىق ەكونوميكانى قولداۋ. وڭدەۋ ونەركاسىبى قۇرىلىمىنداعى سالانىڭ ۇلەسى 19%-دى قۇرايدى» دەگەن ەرسايىن ناعاسپاەۆ سالانىڭ تۇراقتى ءوسىم كورسەتىپ وتىرعانىن ايتتى. ماسەلەن, وتكەن جىلدىڭ قورىتىندىسى بويىنشا كورسەتكىشتەر 9,7%-عا وسكەن. بيىل 16%-دىق ءوسىمدى قامتاماسىز ەتۋ ۇلكەن ماقسات بولىپ وتىر. كورمە ورتالىعىندا سۋ يندۋسترياسىنىڭ «Su Arnasy – Water Expo» XIV حالىقارالىق مامانداندىرىلعان كورمەسى مەن «Ondeu EXPO» V حالىقارالىق وڭدەۋ ونەركاسىبى كورمەسى دە ۇيىمداستىرىلعان. انىعىندا, «Ondeu EXPO» مەتاللۋرگيا, ماشينا مەن اسپاپ جاساۋ, قۇرىلىس پەن حيميا ماتەريالدارىنىڭ ءوندىرىسى, اگروونەركاسىپتىك كەشەن سالاسىنا ارنالعان شەشىمدەر مەن جابدىقتاردى جەتكىزۋشىلەردى بىرىكتىرەدى. كومپانيالار وتاندىق ونەركاسىپتىڭ ونىمدىلىگىن, ورنىقتىلىعى مەن تەحنولوگيالىق تاۋەلسىزدىگىن ارتتىرۋعا باعىتتالعان ازىرلەمەلەردى ۇسىنادى.
شاراعا «Vogelsang», «ANDRITZ», «CNP», «ARC», «QA-Plast», «VodEcoFilter», «Invest Continent», «ETEK», «SAS», «Aquatoriya-Aktobe», «ATE», «Riza Global» جانە باسقا دا كومپانيالار قاتىستى. كورمەنى جىل سايىن سان ءتۇرلى سالانىڭ مىڭداعان مامانى تاماشالايدى. كورمە سوڭى فورۋمعا ۇلاستى. وندا ماشينا جاساۋدى دامىتۋ جونىندەگى كەشەندى جوسپاردى ىسكە اسىرۋ ءىسى, سالا دامۋىنداعى شەتەلدىك سەرىكتەستەردىڭ ءرولى, سونداي-اق ونەركاسىپتى روبوتتاندىرۋ مەن تسيفرلاندىرۋداعى وزەكتى ۇردىستەر, ماشينا جاساۋعا كادر دايارلاۋ شاراسى تالقىلاندى. نەگىزگى وندىرىستەردى دامىتۋعا, تەمىرجول, اۋىل شارۋاشىلىعى, مۇناي-گاز ماشيناسى مەن اۆتوموبيل جاساۋ سالاسىنىڭ كەلەشەگىنە ەرەكشە نازار اۋدارىلدى.