استانادا اۋقىمدى ەكوفەستيۆال ءوتىپ, «تازا قازاقستان» ەكولوگيالىق مادەنيەتتى دامىتۋ تۇجىرىمداماسىنىڭ قورىتىندىسى شىققانى بەلگىلى. سوعان سايكەس, ەكولوگيالىق باستاماعا وسى كۇنگە دەيىن قاتىسقانداردىڭ سانى 6 ميلليون ادامنان استى. بۇل دەگەنىڭىز, ءاربىر ءۇشىنشى وتانداسىمىز تازالىق ساقتاۋعا ۇندەيتىن باستامادان قۇر قالمادى دەگەن ءسوز.
«تازا قازاقستان» رەسپۋبليكالىق ەكولوگيالىق اكتسياسى بىلتىر 8 ساۋىردە باستالدى. سودان بەرىدە وڭىرلەردە «تازا ولكە», «كيەلى مەكەن», «جاسىل ايماق», «ونەگەلى ۇرپاق», ء«مولدىر بۇلاق» سىندى اكتسيالار ءداستۇرلى تۇردە ءوتىپ كەلەدى. ءتۇرلى ءىس-شارالاردىڭ بارىسىندا تۇرعىندار 1,8 ملن گەكتار اۋماقتى كۇل-قوقىستان تازارتتى, 1,6 ميلليونعا جۋىق تال-داراق وتىرعىزدى. 5 مىڭنان استام تاريحي-مادەني مۇرا وبەكتىلەرى قالپىنا كەلتىرىلدى. وزەن-كولدەردىڭ, باسقا دا سۋ ارنالارىنىڭ 5,8 ملن شارشى مەتردەن استام اۋماعى قوقىستان تازارتىلدى. ەكولوگيالىق اكتسيادان قۇر قالماي, ءوز اۋلاسىن تازالاۋعا شىققان تۇرعىندار بۇگىنگە دەيىن شامامەن 1,1 ملن توننا قوقىس شىعارعان.
كۇن رايى جىلىنعالى بەرى ەلىمىزدىڭ باس قالاسىندا اباتتاندىرۋ, كوگالداندىرۋ جۇمىستارى قىزا تۇسكەن. ەلوردالىقتار جىل سوڭىنا دەيىن ميلليونعا جۋىق تال-داراق, كوشەت وتىرعىزۋدى جوسپارلاپ وتىر. وتكەن اپتادا «تازا قازاقستان. استانا – تازالىق پەن ءتارتىپتىڭ ۇلگىسى» ەكولوگيالىق اكتسياسى اياسىندا اۋقىمدى جالپىقالالىق سەنبىلىك ءوتتى. وعان 100 مىڭنان استام قالا تۇرعىنى, ەڭبەك ۇجىمدارى, مەملەكەتتىك ورگانداردىڭ قىزمەتكەرلەرى, بيزنەس وكىلدەرى, سپورتشىلار, مادەنيەت قايراتكەرلەرى, قوعام قايراتكەرلەرى, ءماسليحات دەپۋتاتتارى قاتىستى. سەنبىلىك بارىسىندا 12 مىڭنان استام اعاش وتىرعىزىلىپ, 16 مىڭ شارشى مەتردەن استام اۋماق اباتتاندىرىلدى. ەكواكتسيا بارىسىندا 400 تونناعا جۋىق قوقىس شىعارىلدى. بۇل 100-دەن استام اۋىر جۇك كولىگىنىڭ رەيسىنە تەڭ.
جىل باسىنان بەرى قالاداعى اقبۇلاق وزەنىنىڭ جاعالاۋى, ر.قوشقارباەۆ داڭعىلى مەن س.نۇرماعانبەتوۆ كوشەلەرىنىڭ قيىلىسى, ج.وماروۆ كوشەسى, اباي داڭعىلى, ش.ءۋاليحانوۆ كوشەسى, كيرپيچنىي تۇرعىن الابى, سونداي-اق كەرەي, جانىبەك حاندار, ۇلى دالا كوشەلەرىنىڭ بويى, بەيبىتشىلىك, كۇمىسبەكوۆ, سەركەباەۆ كوشەلەرىنىڭ بويى, جاعالاۋ ساياباعىنىڭ اۋماعى تازالانعان. «جاستار» ساياباعىندا, بوتانيكالىق باقتا, كوكتال ساياباعىندا, اباي الاڭىندا, باسقا دا قوعامدىق ورىنداردا كوپتەپ كوشەت وتىرعىزىلعان.
وتكەن سەنبىدە ەكولوگيالىق اكتسياعا قالانىڭ بارلىق التى اۋدانى جۇمىلدى. اباتتاندىرۋ جۇمىستارىنان بايقوڭىر اۋدانىنىڭ تۇرعىندارى دا قاراپ قالمادى. ولار قالا ورتالىعىنداعى تاشەنوۆ كوشەسىنىڭ بويىنا, ەسىل وزەنىنىڭ جاعالاۋىنا 500 ءتۇپ اعاش وتىرعىزدى.
«بۇگىن ءبىز اباتتاندىرۋعا شىققان اۋماقتى قالانىڭ قاق ورتاسى دەپ ايتساق بولدى. سەبەبى مۇندا ەسىل وزەنىنىڭ جاعالاۋى بار. سول سياقتى اقبۇلاق وزەنى اعىپ جاتىر. وزەن جاعاسى سالاماتتى ءومىر سالتىن ۇستاناتىن قالا تۇرعىندارىنىڭ ءجيى قاتىنايتىن اۋماعى. كەش اۋا جاستار كوپ كەلەدى. وسىنى ەسكەرە كەلە, ءبىز 500 ءتۇپ اعاش وتىرعىزۋدى ۇيعاردىق. ولاردىڭ اراسىندا قىلقان جاپىراقتى اعاشتاردان شىرشا, قاراعاي, قايىڭ اكەلدىك. 100 ءتۇپ الما, المۇرت اعاشتارى بار. جالپى, اۋدانىمىزدا اعاش وتىرعىزۋ جۇمىسىن مامىردىڭ ءبىرىنشى ونكۇندىگىنە دەيىن اياقتاۋدى جوسپارلاپ وتىرمىز», دەيدى بايقوڭىر اۋدانىنىڭ اكىمى تالعات راحمانبەردى.
ەكولوگيالىق اكتسيا اياسىندا قالا تۇرعىندارى, ەڭبەك ۇجىمدارى ءوز اۋلالارىن عانا ەمەس, قالاداعى ارىقتاردى, كوشەلەردى, تروتۋارلاردى, قوعامدىق ورىنداردى دا تازالۋعا كىرىسكەن. كوشەت وتىرعىزۋ, ونى كۇتىپ ۇستاۋ جونىندەگى ماۋسىمدىق اگروتەحنيكالىق جۇمىستار قاۋىرت ءجۇرىپ جاتىر. ساۋدا الاڭدارى تازارىپ, رۇقسات ەتىلمەگەن ۇيىندىلەر شىعارىلعان. مەردىگەر ۇيىمدار شاعىن ساۋلەت نىساندارىن, ەسكەرتكىشتەر مەن ساۋلەت نىساندارىن, قوقىس ورىندارى مەن كونتەينەرلەردى جۋىپ, قالپىنا كەلتىرگەن. بۇل استانا قالاسىندا ىسكە اسىپ جاتقان قىرۋار جۇمىستىڭ ءبىر بولىگى عانا. تازالىققا, قورشاعان ورتانى, تابيعاتتى ايالاۋعا شاقىراتىن ەكولوگيالىق اكتسياعا ەلىمىزدىڭ وزگە دە وڭىرلەرى بەلسەندى قاتىستى.