«Astana Eurasian Book Fair 2025» حالىقارالىق كىتاپ جارمەڭكەسى اياسىندا مەملەكەتتىك سىيلىقتىڭ لاۋرەاتى ساۋىتبەك ابدراحمانوۆتىڭ «كوريفەي» اتتى كىتابىنىڭ تۇساۋكەسەر ءراسىمى ءوتتى. اتالعان كىتاپ – ماسكەۋدەگى «حۋدوجەستۆەننايا ليتەراتۋرا» باسپاسىنان جارىق كورگەن, قازاقستاننىڭ ەڭبەك ەرى, حالىق جازۋشىسى ءابىش كەكىلباەۆتىڭ شىعارماشىلىعىنا ارنالعان.
سالتاناتتى جيىنعا «حۋدوجەستۆەننايا ليتەراتۋرا» باسپاسىنىڭ باس رەداكتورى گەورگي پرياحين, مەملەكەت جانە قوعام قايراتكەرلەرى قۋانىش سۇلتانوۆ, قىرىمبەك كوشەرباەۆ, ەرالى توعجانوۆ, ورتالىق سايلاۋ كوميسسياسىنىڭ توراعاسى نۇرلان ءابدىروۆ, گەنەرال ۆلاديمير بوجكو, فيلولوگيا عىلىمدارىنىڭ دوكتورى ءاسيما يشانوۆا, سونداي-اق ادەبيەتسۇيەر قاۋىم مەن جاس وقىرمان قاتىستى. باسىلىمنىڭ تارالىمى – 1 000 دانا.
جاڭا تۋىندى ەل پرەزيدەنتى قاسىم-جومارت توقاەۆتىڭ العى سوزىمەن باستالادى. مەملەكەت باسشىسى ءابىش كەكىلباەۆپەن ۇزاق جىلدار سەناتتا قاتار جۇمىس ىستەگەنىن, ونى اسا جوعارى قۇرمەتپەن قابىلداعانىن تەبىرەنە ەسكە الادى. پرەزيدەنت بۇل جىلداردى ءوزىنىڭ ومىرىندەگى باقىتتى كەزەڭ رەتىندە سيپاتتاپ, جازۋشىنىڭ دانالىعىنا, تۇلعالىق بيىگىنە باس يەتىنىن جەتكىزەدى.
سونداي-اق القالى جيىندا مەملەكەت جانە قوعام قايراتكەرى قىرىمبەك كوشەرباەۆ ءسوز الىپ, ابىز قالامگەر تۋرالى كەڭىنەن تولعادى.
«ماسكەۋدە قازاقستاننىڭ ەلشىسى قىزمەتىندە جۇرگەنىمدە الەمدىك ادەبيەت ينستيتۋتىنىڭ ديرەكتورى فەليكس كۋزنەتسوۆپەن جاقسى ارالاسىپ ەدىم. سول كىسى ءبىر سوزىندە «اۋەزوۆ – قازاق ادەبيەتىنىڭ كەڭدىگىنىڭ, كەكىلباەۆ –تەرەڭدىگىنىڭ ولشەمى» دەگەن بولاتىن. مىقتىلاردىڭ ءبىر-ءبىرىن مويىنداۋى وڭاي بولمايدى. ايتسە دە ءابىش اعانى مويىنداماۋ مۇمكىن ەمەس ەدى. مەن ابەمەن – ادەبيەتىمىزدىڭ كلاسسيگى ءابدىجامىل نۇرپەيىسوۆپەن قازاقىلىق جاعىنان جاقىن اداممىن, وعان قوسا اعايىندىعىمىز تاعى بار. ەركىن سويلەسە بەرەتىنمىن. ءبىر جولى ءازىل-شىنىن ارالاستىرىپ: «نۇرپەيىسوۆ تە مىقتى, كەكىلباەۆ تا مىقتى. ايتسە دە قايسىسى مىقتىراق؟» دەپ سۇراق قويعانمىن. ابەڭ ويلانىپ وتىردى دا: ء«اي, ول بۇيراباسقا جەتۋ قايدا؟!» دەپ ەدى», دەدى قىرىمبەك كوشەرباەۆ.
كىتاپتا ءابىش كەكىلباەۆتىڭ سان قىرلى بولمىسى كەڭىنەن اشىلىپ, قالامگەردىڭ رۋحاني تەرەڭدىگى مەن ادامگەرشىلىك قاسيەتتەرى سيپاتتالادى. جازۋشى, دراماتۋرگ, اقىن, تاريحشى, ساياساتكەر, فيلوسوف, ادەبيەتتانۋشى, پۋبليتسيست – بۇل تەك ءابىشتىڭ بويىنداعى قاسيەتتەردىڭ ءبىر پاراسى عانا. اۆتور ونى «دالا دانالىعىنان» ءنار العان, زامانىنىڭ فەنومەنى دەپ سيپاتتايدى. اۆتور ءوز ەستەلىكتەرىندە ءابىش كەكىلباەۆتىڭ ادامي قاسيەتتەرىنە دە ەرەكشە توقتالادى.
كىتاپتىڭ ورىس تىلىندە جارىق كورۋى – ءابىش كەكىلباەۆتىڭ شىعارماشىلىعىن جاڭا اۋديتورياعا تانىتۋعا مۇمكىندىك بەرەدى. ونىڭ ەڭبەكتەرى بۇعان دەيىن اعىلشىن, فرانتسۋز, اراب, تۇرىك, چەح, وزبەك, قىرعىز, تاجىك تىلدەرىنە اۋدارىلعان.