بۇگىن ءال-فارابي اتىنداعى قازاق ۇلتتىق ۋنيۆەرسيتەتىندە «Digital Farabi - 2025» حالىقارالىق فورۋمى ءوتتى.
ءىس-شارا بارىسىندا عىلىم جانە جوعارى ءبىلىم ءمينيسترى ساياسات نۇربەك, ءال-فارابي اتىنداعى قازۇۋ-دىڭ باسقارما توراعاسى-رەكتور جانسەيىت تۇيمەباەۆ, NVIDIA كورپوراتسياسىنىڭ كورپوراتيۆتىك بيزنەستى دامىتۋ, قازاقستانداعى ASUS, قازاقستان, ورتالىق ازيا جانە موڭعوليا مەملەكەتتىك ورگاندارىمەن جۇمىس جونىندەگى Kaspersky كومپانياسىنىڭ وكىلدەرى عىلىمي-زەرتتەۋلەر ناتيجەلەرى, IT-جوبالاردىڭ كورمەسىمەن تانىستى.
فورۋمدا عىلىم جانە جوعارى ءبىلىم ءمينيسترى ساياسات نۇربەك الەمدىك تاجىريبەلەردى زەرتتەۋ نەگىزىندە قولعا الىنىپ, جۇەزەگە اساتىن جوبالار بارىسىنا توقتالدى.
امەريكانىڭ ءبىرىنشى سىنىپتان جاساندى ينتەللەكت كۋرستارىن ەنگىزۋ تاجىريبەسىن, قىتايدا 2035 ستراتەگياسى اياسىندا جاساندى ينتەللەكتىنى ارنايى ءپان رەتىندە وقىتىلاتىندىعىن مىسالعا العا مينيستر عالامدىق باسەكەدە قازاقستان دا ءوز ورنىن نىقتاپ الۋى ءۇشىن وسى سالادا ماماندار دايارلاۋدىڭ زاماناۋي مۇمكىندىكتەرىن قولدانۋ قاجەتتىگىن العا تارتتى.
ايتۋىنشا, الەمنىڭ مىقتى ۋنيۆەرسيتەتتەرمەن بىرلەسىپ, ەلىمىزدىڭ جوعارى ءبىلىم جۇيەسىندە بۇرىن-سوڭدى قولعا الىنباعان 20-دان استام جاساندى ينتەللەكت جوباسى ىسكە اساتىن بولادى. قازىرگى كەزدە ەلىمىزدە 2 مىڭنان استام ستۋدەنت سالا بويىنشا ءبىلىم الىپ جاتقان بولسا, بۇل وتە از كورسەتكىش ەكەنىن العا تارتقان مينيستر AI-Sana ءبىلىم باعدارالاماسى اياسىندا 650 ستۋدەنتتىڭ جي بازالىق داعدىسىن يگەرەتىندىگىنە توقتالدى.
ياعني, ءبىرىنشى كەزەڭدە جوعارى وقۋ ورىندارىندا وقىپ جاتقان ستۋدەنتتەرگە بازالىق ءبىلىم بەرىلەدى. ال ەكىنشى كەزەڭىندە 100 مىڭنان استام ستۋدەنت جاساندى ينتەللەكت سالاسىنداعى كاسىپكەرلىك داعدىسىن مەيلىنشە تەرەڭدەتىپ وقۋعا مۇمكىندىك الادى. ونىڭ بارىسىنەدا ەكونوميكانىڭ قانداي سالاسىندا جاساندى ينتەللەكتى قولدانۋعا بولاتىندىعىنا قاتىستى ناقتى ءبىلىم داعدىلارى بەرىلەتىن بولادى. ارى قاراي unicorn كومپانيا دەڭگەيىنە جەتۋدى ماقسات ەتەتىن ستۋدەنتتەر ينۆەستورلارمەن جۇمىس, جاساندى ينتەللەكت كلاستەرى اياسىندا دامۋ مۇمكىندىگىنە يە بولادى. وسى جولدى باستان اياعىنا دەيىن وتۋگە دايىن ستۋدەنتتەر ءۇشىن جىل سايىن ءۇش باسىمدىققا يە, ياعني بيىل ەنەرگەتيكا, تۇراقتى دامى جانە اگوركەشەن سالالارى قارجىلاناتىن بولادى.
ءال-فارابي اتىنداعى قازۇۋ رەكتورى جانسەيىت تۇيمەباەۆ ءداستۇرلى شارانىڭ ماڭىزىن اتاپ ءوتىپ, جاساندى ينتەللەكت, كيبەرقاۋىپسىزدىك پەن تىلدىك مودەلدى تسيفرلاندىرۋعا ارنالعان جوبالارعا توقتالدى. اتاپ وتكەندەي, جاس عالىمداردى ىنتالاندىرۋعا جاڭا مۇمكىندىكتەر اشىلىپ جاتىر. وسى ورايدا پرەزيدەنت تاپسىرماسىمەن ۋنيۆەرسيتەتتە ەكونوميكانى دامىتۋعا باعىتتالعان زاماناۋي جوبالار ىسكە اسۋدا. قازىرگى كەزدە ۋنيۆەرسيتەت الدىڭعى قاتاردى تەحنولوگيالىق كومپانيالارمەن ارىپتەستىكتە جۇمىس ىستەپ, زاماناۋي وقىتۋ باعدارلاماسى اياسىندا بولاشاقتىڭ ماماندارىن دايارلاپ جاتىر.
فورۋمدا سونداي-اق NVIDIA كورپوراتسياسىنىڭ كورپوراتيۆتىك بيزنەستى دامىتۋ جونىندەگى اعا مەنەدجەرى انتون دجوراەۆ, قازاقستانداعى ASUS وكىلى رامازان ارانعازى, قازاقستان, ورتالىق ازيا جانە موڭعوليا مەملەكەتتىك ورگاندارىمەن جۇمىس جونىندەگى Kaspersky كومپانياسىنىڭ اعا مەنەدجەرى اسەت ورداباەۆ, ساراپشى عالىمدار جاساندى ينتەللەكتىڭ ەلىمىزدەگى دامۋ بارىسى, كومپانيالاردا قولدانىلۋ تاجىريبەسىمەن ءبولىستى.
فورۋمدا ءال-فارابي اتىنداعى قازۇۋ, بەيجىڭدەگى «March» تسيفرلىق ەكونوميكا ينستيتۋتى جانە «ناۋرىز تسيفرلىق ەكونوميكا پاركى» جشس اراسىندا مەموراندۋمعا قول قويىلدى.
سونىمەن قاتار فورۋمدا «Cyber Defence Challenge» بايقاۋى ءوتىپ, جاساندى ينتەللەكت, IT كەڭىستىكتىڭ ەڭ جاس قاتىسۋشىلارى زاماناۋي جوبالارىن تانىستىردى.
الماتى