ۋكراينا بەيبىتشىلىك ءۇشىن كەي اۋماقتارىنان باس تارتۋى مۇمكىن

ونىڭ ايتۋىنشا, بۇل ادىلەتسىز بولعانىمەن, بەيبىتشىلىكتى ساقتاۋ ءۇشىن ۋاقىتشا شەشىم رەتىندە قاراستىرىلۋى ىقتيمال.

«ايماقتان ايىرىلۋ – اۋىر. بۇل ادىلەتتى دە ەمەس. بىراق بەيبىتشىلىك ءۇشىن, ۋاقىتشا تىنىشتىق ءۇشىن بۇل ورىندالۋى مۇمكىن جوسپار»,  دەدى كليچكو جۋرناليستەر ساۋالىنا جاۋاپ بەرە وتىرىپ.

الايدا 53 جاستاعى ساياساتكەر, الەمگە اتى ءمالىم بۇرىنعى بوكستان الەم چەمپيونى, ۋكراين حالقى رەسەيدىڭ وككۋپاتسياسىن ەشقاشان مويىندامايتىنىن قاتاڭ تۇردە ءمالىم ەتتى.

ونىڭ بۇل مالىمدەمەسى كيەۆكە جاسالعان زىمىران جانە درون شابۋىلدارىنان كەيىن, 12 ادامنىڭ قازا تاۋىپ, 80-نەن استام تۇرعىننىڭ جاراقات العانىنان كەيىن ايتىلدى. بۇل – سوڭعى ايلارداعى ەڭ جويقىن شابۋىلداردىڭ ءبىرى رەتىندە تىركەلىپ وتىر.

2022 جىلى رەسەي فەدەراتسياسىنىڭ پرەزيدەنتى ۆلاديمير پۋتين ۋكرايناعا قارسى كەڭ اۋقىمدى سوعىس باستادى. قازىرگى تاڭدا ماسكەۋ ۋكراينانىڭ شامامەن 20 پايىز اۋماعىن باقىلاۋدا ۇستاپ وتىر.

كليچكو – ەل باسشىلىعىنىڭ جوعارعى دەڭگەيىندەگى تۇلعالارىنىڭ ءبىرى رەتىندە ۋكراينانىڭ اۋماقتىق تۇتاستىعىنا قاتىستى وسىنداي مالىمدەمە جاساعان العاشقى ساياساتكەرلەردىڭ ءبىرى. ول مۇنداي شەشىم ۋاقىتشا سيپاتتا عانا بولۋى مۇمكىن ەكەنىن اتاپ ءوتتى.

ايتا كەتەيىك, ۆيتالي كليچكو مەن پرەزيدەنت ۆلاديمير زەلەنسكيدىڭ اراسىندا ساياسي كوزقاراس قايشىلىعى بۇرىننان بەلگىلى. اكىم پرەزيدەنت كومانداسىن ءوز وكىلەتتىگىن شەكتەۋگە تىرىسىپ وتىر دەپ بىرنەشە رەت سىنعا العان.

BBC Radio 4 ارناسىنىڭ «Today» باعدارلاماسىنا بەرگەن سۇحباتىندا ول  پرەزيدەنت زەلەنسكي بەيبىت ومىرگە قول جەتكىزۋ ءۇشىن «اۋىر, بىراق قاجەت شەشىمگە» بارۋى كەرەك ەكەنىن ايتقان بولاتىن.

سونداي-اق اقپان ايىندا اق ۇيدە بولعان زەلەنسكي مەن دونالد ترامپ اراسىنداعى اشىق كەلىسپەۋشىلىككە توقتالعان كليچكو, مۇنداي ماسەلەلەر كامەرا الدىندا ەمەس, جابىق جاعدايدا شەشىلۋى قاجەت ەكەنىن مەڭزەدى.

ايتا كەتەيىك, اپتا باسىندا بۇرىنعى اقش پرەزيدەنتى دونالد ترامپ زەلەنسكيدى بەيبىت كەلىسسوزدەرگە كەدەرگى كەلتىرىپ وتىر دەپ ايىپتاعان ەدى. باستى سەبەپ – ۋكراينا باسشىسىنىڭ قىرىمدى رەسەي اۋماعى رەتىندە مويىنداۋدان باس تارتۋى. قىرىم – 2014 جىلى ماسكەۋ تاراپىنان اننەكسيالانعان ايماق.

قازىر ۋكراينا حالقىنىڭ پىكىرى دە ەكىگە جارىلىپ وتىر. رەسەيدىڭ توقتاۋسىز شابۋىلىنان زارەزاپ بولعان جەرگىلىكتى حالىقتىڭ ءبىر بولىگى زەلەنسكيدىڭ ساياساتىن قولدايتىنىن جەتكىزسە, ءبىر قاتارى ەلدەگى بارلىق دۇربەلەڭ زەلەنسكيدىڭ ساياساتكەر رەتىندە بىلىكسىزدىگىنىڭ كەسىرىنەن ەكەنىن ايتىپ جاتىر.