جاپون كومپانياسىنداعى جاس قازاق

شىڭعىستىڭ بالالىق شاعى عىلىم مەن ءبىلىمنىڭ ورتاسىندا وتكەن. مەكتەپتە وقىپ جۇرگەندە ماتەماتيكاعا ەرەكشە ىقىلاس تانىتىپ, وسى باعىتتا جەتىستىككە جەتۋگە ۇمتىلعان. ونىڭ ومىرلىك باعىت-باعدار بەرگەن العاشقى ۇستازى – تۋعان اتاسى, پروفەسسور رىسقۇل ويناروۆ.

ول ءوز ورتاسىندا ۇنەمى ۇزدىك بولۋعا تىرىسقانىن ايتادى. 37-ليتسەيدە وقىپ جۇرگەندە, سىنىپتاعى بەلسەندى ءارى ءبىلىمدى وقۋشىلاردىڭ ءبىرى بولعان. بىراق ءبىر كۇنى دوسىنىڭ نازارباەۆ زياتكەرلىك مەكتەبىنە اۋىسقانىن ەستىپ, ءوزى دە نزم-گە تۇسكەن.

«نزم-گە تۇسكەن العاشقى كەزدەردە ءبىراز قينالدىم. بۇرىن تەك «بەستىك» الىپ جۇرگەن وقۋشىمىن, ال مۇندا كەي ساباقتاردان ء«تورت» پەن ء«ۇش» الا باستادىم. بىراق ۋاقىت وتە كەلە, نزم-ءنىڭ ماعان بەرەر مۇمكىندىگى كوپ ەكەنىن ءتۇسىندىم. سول مەكتەپ مەنىڭ ويلاۋ قابىلەتىمدى, بىلىمگە دەگەن ىنتامدى وياتتى. اتام مەنى ۇنەمى قولداپ وتىردى. ول ماعان عىلىمي دۇنيەلەر جايلى قىزىقتى اڭگىمەلەر ايتىپ, لوگيكاعا قۇرىلعان ەسەپتەردى شەشۋگە باۋلىدى. اكەم دە, انام دا اتامدى ۇلگى ەتىپ وتىرادى. «ول قانداي ءبىلىمدى, ەڭبەكقور جان, سەن دە سونداي بول» دەيتىن. مەن ءۇشىن بۇل ۇلكەن جاۋاپكەرشىلىك ەدى. ءوز ورتامدا دا ۇنەمى ۇزدىك بولۋعا تىرىستىم», دەيدى ول.

ورتا مەكتەپتى ۇزدىك اياقتاعان سوڭ, شىڭعىس جوعارى ءبىلىم الۋ وڭتۇستىك كورەيانى تاڭداعان. «SKKU» شىڭعىستى قابىلداپ, Samsung Foundation شاكىرتاقىسىن ۇسىنعان. بۇل وعان ۇلكەن جىگەر بەرىپ, ءتورت جىلدا جاڭا بەلەستەرگە جول اشقان ءبىلىم ورداسى بولدى.

«كورەيانى مەن ءاۋ باستان تەحنولوگيالىق جاڭاشىلدىقتىڭ ورداسى رەتىندە قابىلدادىم. اپكەم وقىپ جاتقان ۋنيۆەرسيتەتكە بارىپ جۇرگەن كەزدەرىمدە, ەلدىڭ تازالىعى, ءتارتىبى, بىلىمگە دەگەن تالابى قاتتى اسەر ەتتى. «KAIST» پەن «UNIST»-كە تۇسە المادىم, بۇل مەنى ءبىر ساتكە توقتاتىپ تاستادى. بىراق «SKKU»-دەن قابىلداۋ حاتىن العان ءسات – مەنىڭ ومىرىمدەگى ەڭ ەلەۋلى كۇندەردىڭ ءبىرى بولدى. ول حاتتان كەيىن اراعا 20 مينۋت سالىپ, «Samsung» شاكىرتاقىسى تاعايىندالعانى تۋرالى حابار كەلدى. بۇل مەن ءۇشىن توسىن ءارى قۋانىشتى جاڭالىق بولدى. ۋنيۆەرسيتەتتەگى العاشقى سەمەستر وتە قيىن ءوتتى. ۋاقىت وتە كەلە مەن ۇزدىك ستۋدەنتتەر تىزىمىنە ەنىپ, ماراپاتتالدىم», دەيدى ول.

شىڭعىستىڭ كاسىبي جولى كورەياداعى ۋنيۆەرسيتەت قابىرعاسىنان باستالعان. وقۋ مەن عىلىمدى قاتار الىپ جۇرگەن ستۋدەنت بولا تۇرا, ول تاجىريبە جيناۋعا ۇمتىلىپ, ستارتاپ سالاسىنا قادام باسادى. ءۇشىنشى كۋرستا ول ەلەكترونيكا ماماندىعىندا وقيتىن برازيليالىق ستۋدەنتپەن تانىسىپ, ۋنيۆەرسيتەتتىك ستارتاپقا قوسىلۋعا شاقىرتۋ الادى. بۇل ستارتاپ – ەل كولەمىندەگى ەڭ ءىرى «AI Grand Challenge» بايقاۋىنا قاتىسىپ جاتقان جوبا ەدى. كوماندا قوقىستى تانۋ مەن كلاسسيفيكاتسيالاۋ جۇيەسىن جاساپ, كورەيا بويىنشا ءۇشىنشى ورىندى يەلەنەدى.

«سول ستارتاپ مەنىڭ تاعدىرىمدى وزگەرتتى. باستاپقىدا ماعان ۇسىنىس تۇسكەندە, جوبانىڭ ماسشتابى مەن بايقاۋ تۋرالى تولىق بىلمەيتىنمىن. قوقىس كلاسسيفيكاتسيالاۋ جوباسى قىزىق كورىندى, بىراق ۋاقىت وتە كەلە بۇل سالانىڭ قانشالىقتى ماڭىزدى ەكەنىن ءتۇسىندىم. ءبىز جاساعان جۇيە – كامەرالار ارقىلى تۇسىرىلگەن سۋرەتتەردەن قوقىستى تانيتىن, ءارى ونى ءتۇرلى كاتەگوريالارعا بولەتىن الگوريتم بولدى. مەنىڭ مىندەتىم – جۇيەنىڭ دالدىگىن ارتتىرۋ جولدارىن تابۋ, جاڭا تاسىلدەردى ەنگىزۋ بولدى», دەيدى شىڭعىس.

ستارتاپتان كەيىن شىڭعىس كورەياداعى پروفەسسورلاردىڭ ءبىرىنىڭ زەرتحاناسىنا جۇمىسقا ورنالاسادى. ول – جاساندى ينتەللەكتىنى زەرتتەيتىن عىلىمي توپتىڭ مۇشەسىنە اينالادى. ۋاقىت وتە كەلە اقش-تاعى «University of Southern California» ۋنيۆەرسيتەتىمەن بىرىگىپ, «YouTube» پلاتفورماسىنداعى بالالارعا تيىم سالىنعان كونتەنتتى انىقتايتىن اۆتوماتتى جۇيە ازىرلەيدى. وسى زەرتتەۋ ناتيجەسى عىلىمي ماقالا رەتىندە جاريالانىپ, شىڭعىستىڭ كاسىبي بەدەلىن نىعايتا تۇسكەن.

ء«بىر پروفەسسور مەنىڭ پاندەردەگى جەتىستىگىمدى بايقاپ, ءوزىنىڭ لابوراتورياسىنا شاقىردى. ول كەزدە AI ماعان تىم كۇردەلى ءارى تۇسىنىكسىز كورىنەتىن. بىراق ىشىمدەگى «قورىقپا, ۇيرەنۋگە تىرىس» دەگەن داۋىستى تىڭدادىم. سودان بەرى بۇل سالانى تەرەڭىرەك زەرتتەي باستادىم. مەن تەك زەرتتەۋمەن عانا شەكتەلمەي, وسى سالا بويىنشا كوپ وقىپ, تۇسىنگەندەرىمدى بلوگ رەتىندە جازىپ وتىرۋدى شەشتىم. «Medium» پلاتفورماسىندا جەكە پاراقشا اشىپ, وندا عىلىمي ماقالالار مەن تاجىريبەلەرىممەن بولىسە باستادىم. بۇل ءوزىمدى دە شىڭداۋعا, وزگە ماماندارمەن بايلانىس ورناتۋعا كوپ كومەكتەستى», دەيدى جي مامانى.

باكالاۆريات اياقتالعان سوڭ شىڭعىس جاپونيادا جۇمىس ىستەۋدى تاڭدايدى. سەبەبى 1990 جىلدارى اكەسى دە جاپونيادا پروگرامميست بولىپ جۇمىس ىستەگەن. ءوزىنىڭ ايتۋىنشا وسى ءبىر رۋحاني بايلانىس شىڭعىستى دا سول ەلگە جەتەلەگەن. «Mercari»-دەن شاقىرتۋ العانىم – ومىرىمدەگى ەڭ كۇتپەگەن ساتتەردىڭ ءبىرى. مەن ول كومپانيا جايلى بۇعان دەيىن كوپ بىلمەيتىنمىن. ولار ماعان ستاجيروۆكا ۇسىندى. ۇشۋ بيلەتىن, تۇراتىن ورىندى – ءبارىن وزدەرى قامتاماسىز ەتتى. بۇل ماعان جاڭا ورتاعا تەز بەيىمدەلۋگە, جۇمىسقا ەركىن كىرۋگە كوپ كومەكتەستى. كەيىن ستاجيروۆكادان سوڭ ولار مەنى تۇراقتى جۇمىسقا الدى. سولايشا «Mercari»-دە جۇمىسىمدى باستادىم. ءبىز تاۋارلاردى ىزدەۋ مەن ۇسىنۋ جۇيەسىن جاسايتىن كوماندادا بولدىق. سونىمەن قاتار, AI جۇيەلەردەگى قاتەلىكتەردى تۇزەتۋمەن دە اينالىستىم. ءوز جۇمىسىمنىڭ ارقاسىندا مەن ۆەتنامدا, گەرمانيادا, توكيودا وتكەن حالىقارالىق كونفەرەنتسيالارعا قاتىستىم, دەيدى ش. وينار.

«Mercari»-دەگى تاجىريبەدەن كەيىن شىڭعىس «Tripla» كومپانياسىنا اۋىسادى. بۇل كومپانيا جاپونياداعى قوناقۇيلەرگە ارنالعان برونداۋ جۇيەسىن, تولەم ينتەرفەيستەرىن جانە AI نەگىزىندەگى چات-بوتتاردى ازىرلەۋمەن اينالىسادى. بۇگىندە Tripla – 7000-نان استام قوناقۇيمەن جۇمىس ىستەيتىن ءىرى جوباعا اينالعان. «Mercari» مەنىڭ كاسىبي جولىمنىڭ ۇلكەن مەكتەبى بولدى. بىراق مەن ءارتۇرلى تاجىريبە جيناپ, ءوزىمدى جاڭا سالالاردا سىناپ كورگىم كەلدى. «Tripla»-دا مەن اعا ينجەنەر رەتىندە جۇمىس ىستەيمىن. ءبىز قوناقۇيلەرگە ارنالعان چات-بوتتار جاسايمىز», دەيدى ول. 

شىڭعىس «Tripla»-دا جۇمىس ىستەپ ءجۇرىپ, ءبىلىمىن تەرەڭدەتۋدى ويلاپ الەمدەگى ەڭ بەدەلدى باعدارلامالاردىڭ ءبىرى وكسفورد ۋنيۆەرسيتەتىنىڭ جازعى مەكتەبىندە ءبىلىم العان. «العاش رەت ءوتىنىش بەرگەندە وتپەي قالدىم. سوسىن تاجىريبە جيناپ, تاعى تاپسىرىپ, قابىوداندىم. جازعى مەكتەپتە ماشينالىق وقۋدىڭ تەرەڭ ماتەماتيكالىق نەگىزدەرىن مەڭگەردىك. بۇل تەوريالىق ءبىلىم مەنىڭ پراكتيكالىق داعدىلارىمدى ايتارلىقتاي ارتتىردى. جۇمىستان كەيىن ونلاين وقىپ, ءاربىر لەكتسيانى جىبەرمەي تىڭدادىم. ءوزىمدى تەك ينجەنەر ەمەس, زەرتتەۋشى رەتىندە دە دامىتقىم كەلدى», دەيدى زەرتتەۋشى مامان.

جاس ماماننىڭ ەندىگى ماقساتى – ءبىلىمىن ءارى قاراي شىڭداپ, ماگيستراتۋرا وقۋ. نيۋ-يورك ۋنيۆەرسيتەتىنەن شاقىرتۋ العانىمەن, ۆيزا ماسكلەسىمەن وقۋعا بارا الماعان.

«مەن NYU-عا ءتۇستىم, بىراق ۆيزا بەرىلمەدى. بۇل ماعان وڭاي سوققان جوق. بىراق ماقساتىما سەنەمىن. ۇساق-تۇيەك كەدەرگى مەنى توقتاتا المايدى. جاقسىلاپ دايىندالىپ, قايتا تاپسىرامىن. مەنىڭ ارمانىم – الەمدىك دەڭگەيدە ءبىلىم الىپ, ونى ءوز ەلىمنىڭ دامۋىنا باعىتتاۋ», دەيدى شىڭعىس.