«پاۆلودار مۇناي-حيميا زاۋىتى» جشس-دە بيىلعى 1 مامىردان باستاپ مۇناي وڭدەۋ ءتاريفى وزگەرەدى. جاڭا تاريف تونناسىنا 35 400 تەڭگەنى قۇرايدى (ققس-تى ەسەپتەمەگەندە), دەپ حابارلايدى Egemen.kz.
بۇل شەشىم وندىرىستىك پروتسەستەردىڭ سەنىمدىلىگى مەن تيىمدىلىگىن, ەكولوگيالىق قاۋىپسىزدىگىن قامتاماسىز ەتۋگە باعىتتالعان نەگىزگى ينۆەستيتسيالىق جوبالاردى قارجىلاندىرۋ قاجەتتىلىگىنە بايلانىستى قابىلدانىپ وتىر.
«2025 جىلى زاۋىتتا ديزەل وتىنىن گيدروتازارتۋ قوندىرعىسىن قايتا قۇرۋ كوزدەلگەن. بۇل ءونىمنىڭ ساپاسىن جاقسارتۋعا جانە ونىڭ زاماناۋي ەكولوگيالىق ستاندارتتارعا سايكەس كەلۋىنە مۇمكىندىك بەرەدى. بۇعان قوسا بارىنشا تۇراقتى جانە بولجامدى وندىرىستىك تسيكلدى قامتاماسىز ەتەتىن كەڭەيتىلگەن جوندەۋارالىق كەزەڭگە كوشۋ, قايتالاما پروتسەستەردىڭ جۇكتەمەسىن ۇلعايتۋ ناتيجەسىندە مۇناي ونىمدەرى سەبەتىن جاقسارتۋ جوسپارلانعان. وپەراتسيالىق تاۋەكەلدەردى تومەندەتۋگە جانە ونەركاسىپتىك قاۋىپسىزدىك دەڭگەيىن كوتەرۋگە ىقپال ەتەتىن تەحنولوگيالىق پروتسەستەردى باسقارۋ جۇيەلەرى اۆتوماتتاندىرىلادى. اتالعان شارالار كاسىپورىننىڭ تۇراقتى دامۋىنا جانە وڭدەۋدىڭ جوعارى دەڭگەيىن ساقتاۋعا باعىتتالعان. ينۆەستيتسيالىق جوبالاردى ىسكە اسىرۋ جەڭىل مۇناي ونىمدەرىنىڭ ونىمدىلىگىن 73%-دان 75% -عا دەيىن ۇلعايتۋعا مۇمكىندىك بەرەدى», دەپ مالىمدەدى كاسىپورىننىڭ ءباسپاسوز قىزمەتىنەن.
زاۋىتتا قازىرگى ۋاقىتتا 1 توننا شيكى مۇنايدى وڭدەۋدىڭ قۇنى – 26 500 تەڭگە. ال 1 مامىردان قولدانىستاعى تاريف شامامەن 34%-عا ۇلعايادى. سونىمەن قاتار, پمحز-دا اعىمداعى جاڭارتۋ جۇمىستارى مۇناي جەتكىزۋشىلەر ءۇشىن ءونىم سەبەتى قۇنىن 2024 جىلمەن سالىستىرعاندا 6%-عا وسىرۋگە جول اشىپ وتىر. بۇل وڭدەۋ ءتاريفىنىڭ ءوسۋىن باسەڭدەتپەكشى.
پاۆلودار وبلىسى