رەسەي كەلىسسوزگە دايىن – لاۆروۆ

لاۆروۆ CBS News ارناسىنا بەرگەن سۇحباتىندا: «اقش پرەزيدەنتى ءبىزدىڭ باعىتتىڭ دۇرىستىعىنا سەنەدى, ونى بىلەمىن. ءبىز كەلىسسوزدى جۇزەگە اسىرۋعا دايىنبىز. الايدا ەسكەرەتىن كىلتيپاندار جانە بار. ونى رەتتەۋ كەرەك. قازىر ءبىز سونىمەن اينالىسىپ جاتىرمىز», دەدى ول.

سونداي-اق سىرتقى ىستەر ءمينيسترى دونالد ترامپتىڭ ۋكراينادا داعدارىسىنىڭ تۇپكى سەبەبىن جويۋ قاجەتتىلىگىن جەتە تۇسىنەتىن الەمدەگى جالعىز باسشى ەكەنىن جەتكىزدى.

كەشە لوندوندا اقش, ەۋروپا جانە ۋكراينا دەلەگاتسيالارى اراسىندا قاقتىعىستى رەتتەۋ بويىنشا كەلىسسوزدەر وتەدى دەپ جوسپارلانعان بولاتىن.

Washington Post باسىلىمىنىڭ مالىمەتى بويىنشا, اقش ءوزىنىڭ ەۋروپالىق وداقتاستارىمەن جانە ۋكراينامەن كەلىسسوزدەر جۇرگىزۋ بارىسىندا قىرىمدى رەسەيدىڭ قۇرامىندا دەپ تانۋدى ۇسىنۋدى جوسپارلاعان. ياعني, اقش تاراپىنان ۋكراينا مەن ەۋروپا ەلدەرىنە قىرىمدى رەسەيدىڭ تەرريتورياسى رەتىندە مويىنداۋ تۋرالى ۇسىنىس جاسالماق بولعان.

ال كيەۆتىڭ وداقتاستارى, ياعني ۋكراينا مەن ونىڭ باتىس ەلدەرىندەگى سەرىكتەستەرى, بۇل ۇسىنىسقا قارسى بولعان. ولار بۇل جاعدايدىڭ ورنىنا ۋكرايناعا قاۋىپسىزدىك كەپىلدىكتەرىن بەرۋدى تالاپ ەتكەن. قاۋىپسىزدىك كەپىلدىكتەرى دەگەنىمىز — ۋكرايناعا حالىقارالىق دەڭگەيدە قورعانىس قامتاماسىز ەتۋ, ونىڭ ىشىندە ناتو نەمەسە باسقا ەلدەر تاراپىنان اسكەري قولداۋ كورسەتۋ. ولار نەگىزىنەن ۋكراينا اۋماعىنىڭ تۇتاستىعىن قورعاۋعا باعىتتالعان حالىقارالىق زاڭدار مەن كەلىسىمدەر اياسىندا, قىرىم ماسەلەسىن كەيىنگە قالدىرىپ, ۋكرايناعا قاۋىپسىزدىك شارالارىن نىعايتۋدى ۇسىنعان.

بىراق اقش-تىڭ مەملەكەتتىك حاتشىسى ماركو رۋبيو مەن ترامپتىڭ ارنايى وكىلى ستيۆ ۋيتكوفف كەلىسسوزدەرگە بارۋدان باس تارتتى. بۇعان قوسا ۇلىبريتانيا, فرانتسيا جانە گەرمانيانىڭ سىرتقى ىستەر مينيسترلەرى دە كەزدەسۋگە قاتىسۋدان شەت قالدى. ناتيجەسىندە, كەزدەسۋلەر جوعارعى دەڭگەيدە وتپەدى. Washington Post باسىلىمى حابارلاعانداي, كەلىسسوزدەردىڭ ساتسىزدىگىنە ۆاشينگتوننىڭ كيەۆتىڭ اۋماقتىق ۇستانىمداردان باس تارتۋدى قابىلداماي, الدىمەن اتىستى توقتاتۋ ماسەلەسىن تالقىلاۋدى تالاپ ەتۋى سەبەپ بولعان.