قازاقستان حالقى اسسامبلەياسىنىڭ XXXIV سەسسياسى اياسىندا مادەنيەت جانە اقپارات مينيسترلىگى ۇيىمداستىرعان «Birlik» ءان-بي ءانسامبلىنىڭ كونتسەرتىندە بەيبىتشىلىك پەن تاتۋلىق كورىنىس تاپتى. قحا-نىڭ 30 جىلدىعىنا ارنالعان دۋماندا ىنتىماق پەن ىمىرالاستىق ءان-بي, جىر-كۇي تىلىندە سويلەدى.
بەيبىتشىلىك تۋ تىككەن ەلگە بەرەكە ورنايدى. بىرلىك بولسا, ەلدە تۇراقتى ەكونوميكالىق, ساياسي, مادەني دامۋ بولادى. اسسامبلەيا ەلىمىزدەگى ەتنوستار اراسىنداعى بىرلىك پەن تاتۋلىقتى نىعايتتى, ولاردىڭ مادەنيەتى مەن ءتىلىن ساقتاۋعا مۇمكىندىك جاساپ كەلەدى. مادەنيەت جانە اقپارات مينيسترلىگىنە قاراستى روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمىنىڭ ىشىنەن قۇرىلعان «Birlik» بي ءانسامبلى رەپەرتۋارىندا بارلىق حالىقتاردىڭ بي ونەرى كورىنىس تاپتى. ونەر ۇجىمىنىڭ كونتسەرتىن قازاقستان حالقى اسسامبلەياسى توراعاسىنىڭ ورىنباسارى-پرەزيدەنت اكىمشىلىگىنىڭ قازاقستان حالقى اسسامبلەياسى حاتشىلىعىنىڭ مەڭگەرۋشىسى مارات ءازىلحانوۆ, پارلامەنت دەپۋتاتتارى, مەملەكەتتىك ورگاندار وكىلدەرى, رەسپۋبليكالىق ەتنومادەني بىرلەستىكتەردىڭ باسشىلارى مەن مۇشەلەرى, سونداي-اق قحا قوعامدىق قۇرىلىمدارىنىڭ وكىلدەرى تاماشالادى.
كورەرمەنگە ءتۇرلى ەتنوستاردىڭ ۇلتتىق ءبيى مەن اندەرى ۇسىنىلدى. اتاپ ايتقاندا, ورىس, كورەي, تاجىك, وزبەك, تاتار, تۇرىكمەن ءبيى كورسەتىلدى. ءبىر شاڭىراق استىندا تاتۋ-ءتاتتى ءومىر ءسۇرىپ جاتقان ەتنوستاردىڭ بىرلىگىن بەينەلەيتىن «سەنى سۇيەمىن, قازاقستان» اتتى ۆوكالدىق-حورەوگرافيالىق قويىلىم مەرەكەلىك كەشتىڭ كوركىن كىرگىزدى.
كوپ ەتنوستى «Birlik» ءانسامبلىنىڭ ماقساتى – الەم حالىقتارىنىڭ مادەني مۇراسىن ساقتاۋ جانە دامىتۋ, ءداستۇرلى مۋزىكا مەن بي ونەرىن كەڭىنەن ناسيحاتتاۋ. ءار ەتنوس وكىلدەرىنەن قۇرالعان شىعارماشىلىق ۇجىمنىڭ قويىلىمدارى وزىندىك بىرەگەيلىگىمەن ەرەكشەلەنەدى.