قازاقستان حالقى اسسامبلەياسىنىڭ 30 جىلدىق مەرەيتويىنا ارنالعان سالتاناتتى جيىندا سەنات دەپۋتاتى, قحا جۋرناليستەر كلۋبىنىڭ توراعاسى الىشەر ساتۆالديەۆ ءسوز سويلەدى, دەپ حابارلايدى Egemen.kz.
پارلامەنت پەن ءماسليحاتتار دەپۋتاتتارى اتىنان مەرەيتويمەن قۇتتىقتاعان الىشەر عاپيرجان ۇلى جالپى, ۇلتتىق تۇتاستىق تاقىرىبى قاشاندا وزەكتى ەكەنىن اتاپ, وزبەك قاۋىمداستىعىنىڭ وكىلى, مەملەكەت باسشىسى تاعايىنداعان سەناتور رەتىندە ءسوز سويلەۋ زور باقىت ەكەنىن تىلگە تيەك ەتتى.
«بۇل تۇرعىدان قازاقستان حالقى اسسامبلەياسىنىڭ قىزمەتىن ەرەكشە اتاپ ءوتۋىمىز قاجەت. 30 جىلدىق تاجىريبە ەلىمىزدە جالپىحالىقتىق بىرلىكتى نىعايتۋعا باعىتتالعان ءتيىمدى زاڭنامالىق, باسقارۋشىلىق جانە ينستيتۋتسيونالدى تەتىكتەردىڭ تولىق ورنىققانىن كورسەتتى», دەدى ءا.ساتۆالديەۆ.
دەپۋتاتتىڭ ايتۋىنشا اتا زاڭىمىز – ەتنوسارالىق قاتىناستارداعى ۇيلەسىمدىلىكتى قامتاماسىز ەتەتىن ناقتى ءارى تولىققاندى نورمالاردى قامتيتىن, ياعني, بارشا ازاماتتاردىڭ تەڭدىگىن, ۇلتتىق بىرلىك يدەياسىن بىلدىرەتىن سيمۆولدىق تۇعىرىمىز.
«2008 جىلى قابىلدانعان «قازاقستان حالقى اسسامبلەياسى تۋرالى» زاڭ – ەتنوسارالىق قارىم-قاتىناستى, كەلىسىم جانە ىنتىماقتاستىقتى قامتاماسىز ەتۋدىڭ كەپىلى ەكەنىن دالەلدەدى. 30 جىل ىشىندە اسسامبلەيا قىزمەتىنە قاتىستى پرەزيدەنتتىڭ 10-نان استام جارلىعى جاريالاندى. اسسامبلەيا ستراتەگياسى, مەرزىمدى تۇجىرىمدامالار جانە بىرقاتار سالالىق باعدارلامالار قابىلداندى. بۇنىڭ بارلىعى جۇيەلى جۇمىستىڭ كورىنىسى», دەدى ءا.عاپيرجان ۇلى.
سەناتوردىڭ ايتۋىنشا 2007 جىلى قابىلدانعان ساياسي وزگەرىستەردەن كەيىن ماجىلىسكە 9 اسسامبلەيالىق دەپۋتاتتىڭ سايلانۋى باستالدى. ال, جاڭا كەزەڭدەگى كونستيتۋتسيالىق رەفورما, سەناتقا 5 دەپۋتات تاعايىنداۋ ارقىلى, قازاقستانداعى ەتنيكالىق توپتاردىڭ بارلىق مۇددەسىن ءتيىمدى قاراستىرۋعا جول اشىپ, اسسامبلەيا وكىلدەرىنىڭ مارتەبەسىن ارتتىردى.
«بۇل – ەلىمىزدەگى تۇراقتىلىق پەن ادىلەتتىلىك قاعيداتىن ىسكە اسىرۋدىڭ ناقتى كورىنىسى. «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسىنىڭ ناقتى ىسكە اسۋى. «اسسامبلەيا. پارلامەنت. ءماسليحاتتار» جوباسى جانە ء«بىر ەل – ءبىر مۇددە» دەپۋتاتتىق توبى – حالىقتىڭ تىنىس-تىرشىلىگىن زەردەلەيتىن ءتيىمدى قۇرالعا اينالدى. وبلىستىق ءماسليحاتتاردا «بىرلىك», «ىنتىماق» سىندى دەپۋتاتتىق توپتار قۇرىلدى», دەدى سەنات دەپۋتاتى.
سەناتور ءوز سوزىندە بۇنىڭ بارلىعى قازاقستان حالقى اسسامبلەياسىنىڭ 30 جىل ىشىندە قول جەتكىزگەن, ەشكىم تالاسا المايتىن, تاريحي ءمانى زور ءتول جەتىستىگى ەكەنىن اتاپ ءوتتى.
«اسسامبلەيادان سايلانعان دەپۋتاتتار رەتىندە ءبىزدىڭ باستى مىندەتىمىز – تەك وكىل بولۋ عانا ەمەس, زاڭنامالىق دەڭگەيدە تەڭدىك, ادىلدىك پەن كەلىسىم قاعيداتتارىن نىعايتۋ», دەدى دەپۋتات.
ءسوزىنىڭ سوڭىن سەناتور ءا.ساتۆالديەۆ قازاقستانداعى بارلىق ساياسي كۇشتەرگە جانە ارىپتەستەرىنە ارناعان ۇندەۋمەن اياقتادى.
«ەتنوسارالىق قاتىناستار بۇگىندە جاھاندىق ساياساتتىڭ جۇيەلى فاكتورىنا اينالدى. ءبىز – بۇنداي ۇدەرىستەرگە وركەنيەتتى جاۋاپ بەرىپ, «زاڭ مەن ءتارتىپ» قاعيداتىن بەرىك ۇستانىپ, ساياسي ارانداتۋلارعا جول بەرمەۋىمىز قاجەت. ءبىز – ءبىرتۇتاس حالىقتىڭ بولشەگىمىز. بىزگە – سەنىم, مانداتى بەرىلگەن. بۇل سەنىمدى ابىرويمەن اقتاۋ – ءبىزدىڭ ار-نامىسىمىز بەن ساياسي جاۋاپكەرشىلىگىمىزدىڭ ءىسى. ءبىز – اسسامبلەيا مۇشەلەرى ءۇشىن قاسيەتتى جەرىمىزدە بەيبىتشىلىك پەن كەلىسىمدى نىعايتۋدان, تاۋەلسىزدىگىمىز بەن تۇتاستىعىمىزدى قاستەرلەۋدەن اسقان ميسسيا دا, مىندەت تە جوق!», دەدى قحا جۋرناليستەر كلۋبىنىڭ توراعاسى الىشەر عاپيرجان ۇلى.