مەملەكەت باسشىسى قاسىم-جومارت توقاەۆ قازاقستان حالقى اسسامبلەياسىنىڭ XXXIV سەسسياسىندا ءسوز سويلەپ, ەلدەگى ەتنوسارالىق كەلىسىمدى نىعايتۋعا باعىتتالعان بىرقاتار ماڭىزدى باستامالاردى جاريالادى, دەپ حابارلايدى Egemen.kz.
پرەزيدەنت الدىمەن قازاقستان حالقى اسسامبلەياسىنىڭ ايماقتارداعى جۇمىسىن كۇشەيتۋ قاجەت ەكەنىن اتاپ ءوتتى. ول بىلتىر تۇركىستان قالاسىندا جاڭا دوستىق ءۇيى اشىلعانىن تىلگە تيەك ەتىپ, ءدال وسىنداي ورتالىقتى حالىق تىعىز قونىستانعان الماتى وبلىسىندا دا سالۋدى ۇسىندى. مەملەكەت باسشىسىنىڭ ايتۋىنشا, بۇل عيمارات ءوڭىردىڭ قوعامدىق ءومىرىنىڭ ماڭىزدى ورتالىعىنا اينالۋى ءتيىس.
سونىمەن قاتار قورداي, ۇيعىر, سايرام, پانفيلوۆ جانە باسقا دا ەتنوسارالىق قاتىناستار بەلسەندى دامىپ جاتقان اۋدانداردا اسسامبلەيا بولىمشەلەرىن اشۋ قاجەتتىگىن ايتتى. دوستىق ۇيلەرى الداعى ۋاقىتتا باسقا دا قالا جانە اۋدان ورتالىقتارىندا دا اشىلماق.
«مەن بۇل باستامانى قولدايمىن. ءبىز قوعامدىق كەلىسىم ينفراقۇرىلىمىن بىرتىندەپ كەڭەيتە بەرۋىمىز كەرەك», مەملەكەت باسشىسى.
پرەزيدەنت سونىمەن قاتار بارلىق وڭىرلەردەگى دوستىق ۇيلەرىن تۋريستىك باعىتتار كارتاسىنا ەنگىزۋ قاجەت ەكەنىن اتاپ ءوتتى. بۇل ورىندار ەلىمىزدىڭ ازاماتتارى ءۇشىن عانا ەمەس, شەتەلدىك قوناقتار ءۇشىن دە تارتىمدى بولۋى ءتيىس.
«بارلىق ايماقتاعى دوستىق ۇيلەرىن ءوز ازاماتتارىمىز دا, قاجەت بولىپ جاتسا, شەتەلدىك قوناقتار دا باراتىن تۋريستىك باعىتتار كارتاسىنا ەنگىزگەن ءجون. قۇزىرلى ورگان باسشىلارى مەن اكىمدەر اسسامبلەيانىڭ ەتنومەدياتسيا سالاسىنداعى جۇمىسىنا جان-جاقتى قولداۋ كورسەتۋگە ءتيىس. «ەلدەسۋ جانە تاتۋلاسۋ» جوباسىنىڭ اۋقىمىن كەڭەيتىپ, ونى الداعى ەكى جىلدا بۇكىل ەلگە تاراتۋ قاجەت», دەدى قاسىم-جومارت توقاەۆ.
سونداي-اق, ۇكىمەت پەن جەرگىلىكتى اكىمدىكتەرگە اسسامبلەيانىڭ باسقا دا جوبالارىن قوعامدىق-ساياسي جۇمىس جوسپارلارىنا ەنگىزىپ, ناقتى شارالار قابىلداۋ تاپسىرىلدى.
مەملەكەت باسشىسى سەسسيا بارىسىندا اقپاراتتىق كەڭىستىكتە ەتنوسارالىق بىرلىك پەن كەلىسىمدى ناسيحاتتاۋدىڭ ماڭىزدىلىعىنا دا ەرەكشە توقتالدى. ونىڭ ايتۋىنشا, بۇل اسسامبلەيا قۇرىلىمدارىنىڭ, اسىرەسە, جۋرناليستەر كلۋبىنىڭ باستى مىندەتتەرىنىڭ ءبىرى بولۋى ءتيىس. سالالىق مينيسترلىكتەر مەن ءوڭىر اكىمدەرى قحا جۋرناليستەر كلۋبىنىڭ قۇرامىنا جەتەكشى بۇقارالىق اقپارات قۇرالدارىنىڭ وكىلدەرىن قوسىپ, كلۋب جۇمىسىنىڭ بىرىڭعاي الگوريتمىن ازىرلەۋى قاجەت.
پرەزيدەنت سونداي-اق, ەتنوستاردىڭ انا تىلىندە جارىق كورەتىن وڭىرلىك بۇقارالىق اقپارات قۇرالدارىن جۇيەلى تۇردە قولداۋ كەرەك ەكەنىن ايتتى. بۇل شارالار ەتنوسارالىق كەلىسىمدى نىعايتىپ, مادەني ارالۋاندىقتى ساقتاۋعا مۇمكىندىك بەرەدى.
سونىمەن قاتار قاسىم-جومارت توقاەۆ «بىرلىگىمىز – ارالۋاندىقتا» قاعيداتىن جۇزەگە اسىرۋ ءۇشىن مادەنيەت پەن ونەردىڭ الەۋەتىن بارىنشا پايدالانۋدىڭ ماڭىزدىلىعىنا توقتالدى. ول قازاقستاندا الەكساندر پۋشكين, تاراس شەۆچەنكو, فەدور دوستوەۆسكي, ميحايل شولوحوۆ سىندى الەمدىك دەڭگەيدەگى تۇلعالارعا ارنالعان مۋزەيلەردىڭ جۇمىس ىستەيتىنىن, ولاردىڭ ەل مادەنيەتىنىڭ باعا جەتپەس بولىكتەرى ەكەنىن ايتتى.
پرەزيدەنت بۇل مۋزەيلەردىڭ كورمەلەرىن استانا, الماتى جانە باسقا قالالاردا ۇيىمداستىرىپ, كەڭىنەن ناسيحاتتاۋ قاجەت ەكەنىن ۇسىندى. سونىمەن قاتار, كەيبىر ەتنومادەني بىرلەستىكتەردىڭ جيناعان ەتنوگرافيالىق جانە ونەر تۋىندىلارىنىڭ جەكە كوللەكتسيالارى دا قازاقستاننىڭ مادەني مۇراسىنا اينالۋى ءتيىس.
«كەيبىر ەتنومادەني بىرلەستىكتەر بىرەگەي ونەر جانە ەتنوگرافيالىق جەكە كوللەكتسيالاردى جينادى. بۇل دا ەلىمىزدىڭ مادەني مۇراسىنا اينالۋعا ءتيىس. قازاقستاندا 9 ورىس دراما تەاترى تابىستى جۇمىس ىستەپ جاتىر. سونداي-اق ەرەكشە ءتورت ەتنوس تەاترى, ياعني, ۇيعىر, كورەي, وزبەك جانە نەمىس تەاترلارى كورەرمەننىڭ كوزايىمى بولىپ ءجۇر. اسسامبلەيانىڭ 30 جىلدىعى اياسىندا الماتىدا ءبارىنىڭ باسىن قوسىپ, قازاقستان ەتنوستارى تەاتر ونەرىنىڭ فەستيۆالىن وتكىزسەك بولادى. حالىق كوپ كەلەدى دەپ ويلايمىن», دەدى مەملەكەت باسشىسى.