تالانتتاردى توپتاستىرعان «مىڭ بالا»

مەملەكەت باسشىسى قاسىم-جومارت توقاەۆ اسسامبلەيانىڭ بىلتىرعى «بىرلىك. جاسامپازدىق. ورلەۋ» اتتى سەسسياسىندا «قازاق ءتىلى ۋاقىت وتە كەلە ەتنوسارالىق قارىم-قاتىناس تىلىنە اينالادى» دەگەن ەدى. بايقاپ باعدارلاساق, قوعام بىرتىندەپ وسىعان كەلە جاتىر. مۇنى قازىرگى كەڭ تارالعان ۇردىسكە, وسى باعىتتا جاسالىپ جاتقان ساياسي قادامدارعا قاراپ اڭعارۋعا بولادى. ارينە, بۇل رەتتە قحا-نىڭ ءرولى ايرىقشا. ۇيىم مەملەكەتتىك ءتىلدى ىلگەرىلەتىپ قانا قويماي, ەل ازاماتتارىن ورتاق قۇندىلىق اياسىندا ۇيىستىرۋدا, قوعامدىق كەلىسىم مەن بىرلىكتى نىعايتۋدا اۋقىمدى جۇمىس اتقارىپ وتىر.

ونىڭ ءبىرى ءارى بىرەگەيى – قازاق تىلىندە جاتىق جازىپ, ەركىن كوسىلەتىن جاستاردىڭ باسىن قوسقان «مىڭ بالا» جوباسى. 2015 جىلى ىسكە قوسىلعان باستاما مەملەكەتتىك ءتىلدى مەڭگەرۋدى مىندەتتەۋدەن گورى, ءوزىڭ ۇلگى بولساڭ, اينالاڭ دا بوي تىكتەيدى دەگەن ۇستانىمدى العا تارتادى. بۇل ويدى كۇنى بۇگىنگە دەيىن 3 ملن-عا جۋىق وزگە ەتنوس وكىلى قولداپ, جوباعا قاتىستى.

سول ۇلتتىق ونەردى ۇلىقتاپ جۇر­گەن جاستاردىڭ اراسىندا اقتوبەلىك الەكساندرا پوگورەلوۆا دا بار. «مىڭ بالا» جوباسىنىڭ 13 جاستاعى جەڭىمپازى جەتىگەن اسپابىندا كاسىبي دەڭگەيدە ويناپ, قازاق اندەرى ارقىلى حالقىمىزدىڭ رۋحاني مۇراسىن دارىپتەپ ءجۇر.

– جوبا پوەزيا, بەينەروليكتەر جارىسى, ءتىل ۇيرەتۋدەگى اۆتورلىق باعدار­لامالار, شەشەندىك وقۋلار سىندى ءتۇرلى باعىت-باعداردى قامتيتىن بايقاۋلاردان تۇرادى. مەن جەتىگەندە ويناپ, ونەر كورسەتتىم. وزگە قاتىسۋشىلار دا – ءوز وڭىرىندە باس جۇلدە يەلەنگەن كىل مىق­تىلار. قاتارىمىزدا ولەڭ جازاتىن قابى­لەتى بار, سۋىرىپسالما جاس اقىندار, سونداي-اق قازاق شايىرلارىنىڭ ولەڭ­دەرىنە ءان جازاتىن سازگەر دارىندى جاستار بولدى. بىرازىمەن جاقىن دوس بولىپ ارالاسىپ كەتتىك. باستىسى, جوبا قازاق حالقىنىڭ سالت-ءداستۇرىن تەرەڭىنەن مەڭگەرۋگە, پوەزياسىنا دەگەن قىزىعۋشىلىعىمدى ارتتىردى, – دەيدى ا.پوگورەلوۆا.

2015–2024 جىلدار ارالىعىندا اتالعان جوبا اياسىندا ەلىمىزدە 125 مىڭ­نان اسا ءىس-شارا ۇيىمداستىرىلعان. «مىڭ بالا» جوباسىنىڭ وڭىرلەردە وتەتىن بيىل­عى ءىس-شارالارى قازاقتىڭ ۇلى اقىنى اباي قۇنانباي ۇلىنىڭ 180 جىلدىعىنا, حالقىمىزدىڭ ءبىرتۋار پەرزەنتى, كۇيشى نۇر­عيسا تىلەنديەۆتىڭ 100 جىلدىعىنا ارنالادى.

– بىلتىر وڭىرلەردە مۇعالىمدەر ارا­سىندا قازاق ءتىلىن جەدەل وقىتۋعا باعىت­تالعان يننوۆاتسيالىق ء«تىلىم – تىرەگىم» اتتى ادىستەمە كونكۋرسى, شەشەن­دىك ونەردى دامىتۋعا ىقپال ەتەتىن, مەم­لەكەتتىك تىلدە سويلەۋ داعدىلارىن جەتىل­دىرەتىن «ونەر الدى – قىزىل ءتىل» اتاۋىمەن ترەنينگ, كۋرستار, بالاباقشا, مەكتەپ پەن جازعى لاگەردە ۇلتتىق, سپورتتىق ويىن­دار, كونكۋرس­تار مەن ۆيكتورينالاردى قامتيتىن «جۇزدەن جۇيرىك, مىڭنان تۇلپار» ويىن الاڭى, «ونەرلى ورگە جۇزەر» مۋزىكالىق بايقاۋى ۇيىمداستىرىل­دى. قازاقستان حالقى تىلدەرى كۇنىنە ارنال­عان جالپى رەسپۋبليكالىق اشىق ديك­تانت ءوتتى. سونداي-اق الەۋمەتتىك جەلىلەر­دە #مىڭبالا2024 حەشتەگىمەن اقىن ساكەن سەيفۋلليننىڭ 130 جىلدىعىنا وراي شىعارمالارىن وقۋدان چەللەندج جاريالاندى. وسىلايشا, جوبا جاستاردىڭ ۇلتتىق رۋحتى سەزىنۋىنە, ەڭ باستىسى, بىرلىك پەن تاتۋلىقتى تەرەڭ تۇسىنۋىنە جول اشتى, – دەيدى مادەنيەت جانە اقپارات مينيسترلىگى ەقدك «قوعامدىق كەلىسىم» رمم قىزمەتكەرى ۇمبىگۇلسىم احمەتجانوۆا.

بىلتىر جوبانىڭ «ونەرلى ورگە جۇزەر» مۋزىكالىق بايقاۋىنىڭ جەڭىم­پازدارى ءداستۇر بويىنشا استاناعا ارنايى شاقىرىلىپ, قازاقستان حالقى اسسامبلەياسىنىڭ, مادەنيەت جانە اقپارات مينيسترلىگىنىڭ ديپلومدارىمەن, باعالى سىيلىقتارمەن ماراپاتتالدى. سول كونتسەرتتە «مىڭ بالا» جوباسىنىڭ جەڭىمپازى زارينا ەرگاشبەكوۆا ءوز ولەڭدەرىمەن جۇرتتى ءتانتى ەتتى.

– ۇلتىم – وزبەك. تۇركىستان وبلىسىنىڭ سايرام اۋدانىندا دۇنيەگە كەلىپ, قازىر پاۆلودار وبلىسىندا تۇرىپ جاتىرمىن. اتا-انامنىڭ شەشىمىمەن قازاق سىنىبىنا باردىم. سونىڭ ارقاسىندا بۇگىندە قازاق تىلىندە ەركىن سويلەيمىن, ويلايمىن, ءتىپتى ىشكى جاندۇنيەمدى قارا ولەڭمەن جەتكىزەمىن. جوباعا پوەزيا باعىتى بو­يىنشا قاتىسىپ, 4-5 اۆتورلىق تۋىندىمدى ۇسىندىم. وسى جوبا ماعان ەرەكشە شابىت سىيلادى. بىرلىك پەن تاتۋلىقتىڭ قادىرىن تەرەڭ سەزىندىم, – دەيدى جاس اقىن.

دەمەك «مىڭ بالا» – جاي عانا جوبا ەمەس, بۇل جۇرەكتەردى جاقىنداستىرىپ, ءتۇرلى ەتنوس وكىلدەرىن ءبىر تۋ استىنا بىرىكتىرگەن الاڭ. ال ءتىل – تەك قارىم-قاتىناس قۇرالى ەمەس, تۇتاس ءبىر حالىقتىڭ جان-دۇنيەسىن جەتكىزەتىن رۋحاني بايلىق.