جاسىل ەكونوميكاعا بەت بۇرعان جامبىل وبلىسىندا جالپى قۋاتى 2 گۆت قۇرايتىن ەكى جەل ەلەكتر ستانساسى سالىنادى, دەپ حابارلايدى Egemen.kz.
جامبىل وبلىسى اكىمىنىڭ ورىنباسارى قاناتبەك مادىبەكتىڭ ايتۋىنشا, وڭىردە ەنەرگيا تيىمدىلىگىن ارتتىرۋ بويىنشا التى باعىتتا جۇمىس اتقارىلىپ جاتىر. قازىرگى كەزدە جالپى قۋاتى 571,3 مۆت قۇرايتىن 22 جەك جۇمىس ىستەپ تۇر. ونىڭ التاۋى سۋ ەلەكتر ستانساسى بولسا, ونى جەل جانە التاۋى كۇن ەلەكتر ستانساسى ەكەنىن ايتا كەتكەن ءجون.
«وتكەن جىلى سارىسۋ اۋدانىندا جالپى قۋاتى 100 مۆت قۇرايتىن «شوقپار جەس» جەل ەلەكتر ستانساسى ىسكە قوسىلسا, جامبىل اۋدانىندا ورنالاسقان «AEC ASA» كۇن ەلەكتر ستانساسىنىڭ مۇمكىندىگىن قوسىمشا 20 مۆت ارتتىرۋ بويىنشا ءتيىستى جۇمىس جۇرگىزىلدى. الداعى ۋاقىتتا جالپى قۋاتى 2 گۆت قۇرايتىن ەكى ءىرى جوبانى ىسكە اسىرۋدى كوزدەپ وتىرمىز», دەيدى قاناتبەك مادىبەك.
وبلىس اكىمىنىڭ ورىنباسارى كەلتىرگەن دەرەككە جۇگىنسەك, ءباا-ءنىڭ Masdar كومپانياسى سارىسۋ جانە تالاس اۋداندارىندا قۋاتى 1 گۆت بولاتىن جەل ەلەكتر ستانساسىن سالماق. بۇل جوبانىڭ قۇنى 742,0 ملرد تەڭگەگە تەڭ ەكەن. جەل ەلەكتر ستانتسياسى مەن جوبالاۋ-ىزدەستىرۋ جۇمىستارىنا 44 مىڭ گەكتار جەر ۋچاسكەسى بەرىلگەن. كومپانيا قۇرىلىس جۇمىستارىن 2026 جىلى باستاپ, 2029 جىلى ىسكە قوسۋدى كوزدەپ وتىر.
بۇدان بولەك, «Total Eren» جشس مويىنقۇم اۋدانىندا قۋاتى 1 گۆت بولاتىن جەل ەلەكتر ستانتسياسىنىڭ قۇرىلىسىن جۇرگىزەدى. جوباعا 1 ترلن تەڭگە ينۆەستيتسيا تارتۋ جوسپارلانعان. قازىرگى تاڭدا سەرىكتەستىككە 52 مىڭ گەكتار جەر ۋچاسكەسى بولىنگەن. جەك ستانساسى 2028 جىلى پايدالانۋعا بەرىلمەك.
جامبىل وبلىسى