بۇگىن استانا قالاسىندا ونەركاسىپ جانە سۋمەن جابدىقتاۋ سالاسىنداعى ءۇش اۋقىمدى حالىقارالىق كورمە ءوز جۇمىسىن باستادى. ولاردىڭ قاتارىندا VI ماشينا جاساۋ جانە مەتالل وڭدەۋدىڭ حالىقارالىق مامانداندىرىلعان Kazakhstan Machinery Fair, SU ARNASY – Water Expo XIV حالىقارالىق سۋ يندۋسترياسى كورمەسى جانە ONDEU EXPO V حالىقارالىق وڭدەۋ ونەركاسىبى كورمەسى بار, دەپ حابارلايدى Egemen.kz.
Kazakhstan Machinery Fair كورمەسىنىڭ سالتاناتتى اشىلۋ راسىمىنە قر ونەركاسىپ جانە قۇرىلىس ءمينيسترى ەرسايىن ناعاسپاەۆ قاتىسىپ, قۇتتىقتاۋ ءسوز سويلەدى. مينيستر ماشينا جاساۋدى ەلدىڭ ونەركاسىپتىك الەۋەتىنىڭ نەگىزى, تەحنولوگيالىق دامۋدىڭ قوزعاۋشى كۇشى جانە ۇلتتىق ەكونوميكانى قولداۋشى ماڭىزدى سالا دەپ اتاپ ءوتتى. ونىڭ ايتۋىنشا, بۇل سالانىڭ وڭدەۋ ونەركاسىبىندەگى ۇلەسى 19%-دى قۇرايدى, ال وتكەن جىلى ءوسىم 9,7%-دى كورسەتتى. بيىلعى ماقسات – 16%-دىق وسىمگە قول جەتكىزۋ.
كورمەنىڭ اشىلۋ سالتاناتىنا چەحيا رەسپۋبليكاسىنىڭ ونەركاسىپ جانە ساۋدا ۆيتسە-ءمينيسترى مارتين فرجەليچ, قازاقستان ماشينا جاساۋشىلار وداعىنىڭ باسقارما توراعاسى مەيرام پىشەمباەۆ, Leipziger Messe باس ديرەكتورى ماركۋس گايزەنبەرگەر جانە Astana Expo كومپانياسىنىڭ اتقارۋشى ديرەكتورى قۋانىش قاناپيانوۆ قاتىستى.
Kazakhstan Machinery Fair – ورتالىق ازياداعى ەڭ ءىرى سالالىق شارالاردىڭ ءبىرى. وندا مەتالل وڭدەۋگە جانە كەسۋگە ارنالعان جابدىقتار, دانەكەرلەۋ جۇيەلەرى, يندۋستريالىق اۆتوماتتاندىرۋ مەن روبوتوتەحنيكا, قۇرالدار, كومپونەنتتەر مەن وندىرىستىك تەحنولوگيالار تانىستىرىلۋدا. قاتىسۋشىلار قاتارىندا الەمدىك جانە وتاندىق الپاۋىتتار – Hyundai WIA, CHIRON Group SE, KAMAZ, QazTehna, Bodor, ISCAR Kazakhstan, Robentex, Zoller جانە باسقا دا كومپانيالار بار. گەرمانيا, تۇركيا, اۆستريا, يتاليا جانە قىتاي ەلدەرى وزدەرىنىڭ ۇلتتىق ەكسپوزيتسيالارىن ۇسىنىپ وتىر.
SU ARNASY – Water Expo كورمەسى تۇرعىن ءۇي-كوممۋنالدىق شارۋاشىلىقتى جاڭعىرتۋ, سۋمەن جابدىقتاۋ جانە سۋ بۇرۋ, اعىندى سۋلاردى تازارتۋ, سۋ رەسۋرستارىن تسيفرلاندىرۋ مەن اۆتوماتتاندىرۋ سالالارىنداعى زاماناۋي شەشىمدەرگە ارنالعان. كورمەگە Vogelsang, ANDRITZ, ARC, QA-Plast, VodEcoFilter سىندى كومپانيالار قاتىسىپ جاتىر.
ال ONDEU EXPO كورمەسى مەتاللۋرگيا, ماشينا جاساۋ, اسپاپ جاساۋ, قۇرىلىس ماتەريالدارى, حيميا جانە اگروونەركاسىپتىك كەشەن سالالارىنا ارنالعان جابدىقتار مەن تەحنولوگيالاردى ۇسىنادى. بۇل الاڭدا وتاندىق ءوندىرىستىڭ ونىمدىلىگى مەن تەحنولوگيالىق تاۋەلسىزدىگىن ارتتىرۋعا باعىتتالعان شەشىمدەر كورسەتىلىپ جاتىر.
اتالعان كورمەلەر 10 000 م² استام اۋماقتا ءوتىپ جانە ولاردا 22 ەلدەن كەلگەن 290-نان استام كومپانيا ءوز ونىمدەرى مەن يننوۆاتسيالىق شەشىمدەرىن ۇسىنىلعان. كورمەلەرگە زاۋىت باسشىلارى, ينجەنەرلەر, ونەركاسىپتىك تەحنولوگيا ازىرلەۋشىلەر, مەملەكەتتىك قۇرىلىمدار وكىلدەرى مەن سالا ماماندارى قاتىسىپ جاتىر. ءىس-شارالار اياسىندا ءتۇرلى فورۋمدار, تەحنيكالىق كونفەرەنتسيالار مەن جەلىلىك سەسسيالار وتكىزۋ جوسپارلانعان.