بۇگىن قر پارلامەنتى ماجىلىسىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە زياتكەرلىك مەنشىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى, دەپ حابارلايدى Egemen.kz.
دەپۋتات نۇرسۇلتان بايتىلەسوۆ ءوز سوزىندە زاڭ جوباسىنىڭ ماڭىزدىلىعىن اتاپ ءوتىپ, زياتكەرلىك مەنشىكتى قورعاۋ ەل ەكونوميكاسىنىڭ دامۋىنا تىكەلەي اسەر ەتەتىنىن جەتكىزدى.
«زياتكەرلىك مەنشىك يننوۆاتسيالىق ەكونوميكانى دامىتۋدا, ينۆەستيتسيا تارتۋدا جانە ەلدىڭ باسەكەگە قابىلەتتىلىگىن ارتتىرۋدا شەشۋشى ءرول اتقاراتىنى بەلگىلى.بۇل قۇقىقتى زاڭسىز پايدالانۋ جانە بۇزۋ ەلىمىزدىڭ ەكونوميكاسى مەن مادەنيەتىنە ەلەۋلى قاۋىپ توندىرەدى, يننوۆاتسياعا دەگەن ىنتانى ازايتىپ, قۇقىق يەلەرىنە زيان كەلتىرەدى», دەدى دەپۋتات.
سونىمەن قاتار دەپۋتات مەملەكەت باسشىسى قاسىم-جومارت توقاەۆتىڭ جولداۋىندا ايتىلعان كرەاتيۆتى ەكونوميكانى دامىتۋ تاپسىرماسىنا نازار اۋداردى.
«مەملەكەت باسشىسى قاسىم-جومارت توقاەۆتىڭ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىندا ەلىمىزدە كرەاتيۆتى ەكونوميكانىڭ اۋقىمدى دامۋىنا بارلىق جاعداي جاسالۋ قاجەتتىلىگىنە نازار اۋداردى. ونىڭ ىشىندە زياتكەرلىك مەنشىكتى قۇقىقتىق تاسىلدەرمەن قورعاۋ تۇبەگەيلى ماڭىزدى ماسەلە ەكەنىن اتاپ ءوتتى», دەدى ن.بايتىلەسوۆ.
زاڭ جوباسى قولدانىستاعى زاڭنامانى جۇيەلى تۇردە جەتىلدىرۋگە باعىتتالعان. ءماجىلىس دەپۋتاتتارى زاڭ ەرەجەلەرىن جەتىلدىرۋ ءۇشىن جۇمىس توبى وتىرىستارىندا بىرقاتار تۇزەتۋلەر ۇسىنعان. وزگەرىستەر زياتكەرلىك مەنشىك سالاسىنداعى قوعامدىق قاتىناستاردى, ونىڭ ىشىندە تاۋارلار مەن قىزمەتتەرگە قاتىستى قۇقىقتاردى رەتتەۋدى كوزدەيدى.
دەپۋتات نۇرسۇلتان بايتىلەسوۆ Meta پلاتفورمالارىندا قازاقستاندىق مۋزىكالىق تۋىندىلارعا شەكتەۋ قويىلعان جاعدايدى دا اتاپ ءوتتى. بۇل وقيعا ۇجىمدىق باسقارۋ سالاسىنداعى رەفورمالاردى قاجەت ەتەتىنىن كورسەتكەن.
«2024 جىلعى قاراشادا Meta پلاتفورمالارىندا قازاقستاندىق اۆتورلار مەن ورىنداۋشىلاردىڭ مۋزىكالىق تۋىندىلارىنا شەكتەۋ فاكتىلەرى ۇجىمدىق باسقارۋ (مقۇنب) جونىندەگى ۇيىمداردى باقىلاۋدى جەتىلدىرۋ قاجەتتىگىن كورسەتتى. بۇل جاعداي قۇقىق يەلەرىنىڭ دەرەكتەرىن تسيفرلاندىرۋدى تالاپ ەتتى», دەدى ول.
وسىعان بايلانىستى زاڭ جوباسىندا ۇجىمدىق باسقارۋ ۇيىمدارىنىڭ جۇمىسىن تسيفرلاندىرۋ, سىياقىنىڭ اشىقتىعىن قامتاماسىز ەتۋ جانە ونى ءادىل بولۋگە باعىتتالعان وزگەرىستەر ەنگىزىلەدى.
«بۇل تۇزەتۋلەردىڭ ماقساتى اۆتوردىڭ جانە قۇقىق يەلەنۋشىنىڭ ۇجىمدىق باسقارۋ جۇيەسى ارقىلى ءوز وبەكتىلەرىن پايدالانعانى جانە رەترانسلياتسيا جاساعانى ءۇشىن سىياقى الۋ قۇقىعىن قامتاماسىز ەتۋ», دەدى ن.بايتىلەسوۆ.
سونىمەن قاتار, زاڭ جوباسى پاتەنتتىك سەنىم بىلدىرىلگەن وكىلدەردىڭ ماماندانۋىن كوزدەيدى. سونداي-اق تاۋار تاڭبالارىن تىركەۋدەن باس تارتۋ نەگىزدەرى مەن پاتەنت بەرۋدەن باس تارتۋ مۇمكىندىگى ناقتىلانباق.
زاڭ جوباسى بويىنشا تۇراقتى كوميتەتتەر وڭ قورىتىندىلارىن بەرگەن. قۇجات ۋاكىلەتتى مەملەكەتتىك ورگاندار, بيزنەس وكىلدەرى, اۆتورلار مەن ساراپشىلار قاتىسقان جۇمىس توپتارىندا جان-جاقتى تالقىلانعان.
«جوعارىدا ايتىلعانداردى ەسكەرە وتىرىپ, كوميتەت وسى زاڭ جوباسىن ءبىرىنشى وقىلىمدا ماقۇلداۋدى ۇسىنادى. قولداۋلارىڭىزدى سۇرايمىن», دەپ ءسوزىن تۇيىندەدى دەپۋتات.