ىزدەگەندەر جوعىن تاباتىن, كوكسەگەندەر كوكەيىندەگىسىمەن تابىساتىن ەڭ ءبىر اتاۋلى رۋحاني ورىن كىتاپحانا ەكەنى بەلگىلى. مۇنداعى سورەلەردىڭ بەلىن قايىستىرىپ نەبىر كەمەڭگەر, عۇلامالاردىڭ اقىل-ويىنا ورانعان ساۋلەلى سوزدەر كىتاپتارعا قىمتانىپ ءسىز بەن ءبىزدى بالكىم سارىلا, بالكىم اسىعا كۇتەدى. وسىلايشا, كىتاپ قىمتاعان ىزگىلىك پەن ماحاببات, دانالىق پەن پاراسات بۇگىنگى ءھام بولاشاق ۇرپاقتىڭ سانا-سەزىمى مەن رۋحىنا قىزمەت ەتەدى.
پرەزيدەنت قاسىم-جومارت توقاەۆ ۇلتتىق كىتاپ كۇنىن ەنگىزگەن ءىىى ۇلتتىق قۇرىلتايدىڭ وتىرىسىندا «كىتاپحانا – مەملەكەتتىڭ, ۇلتتىڭ نەگىزگى جادى. ەلىمىز ءۇشىن قۇندى تاريحي دەرەكتەر مەن ماتەريالداردىڭ دەنى كىتاپحانادا ساقتالادى. سوندىقتان كىتاپحانا ءىسىن دامىتۋعا بەيجاي قاراۋعا بولمايدى. كىتاپ وقىرمانعا قولجەتىمدى بولۋى كەرەك», دەگەن ەدى. سودان بەرى ۇلتتىق كىتاپ كۇنى بيىل تۇڭعىش رەت اتالىپ ءوتىپ جاتىر. جەر-جەردە ءوتىپ جاتقان ءىس-شارالار لەگىندە ەسەپ جوق. كىتاپ وقۋدى ناسيحاتتايدى, كىتاپ وقىلادى, تالقىلانادى, ادامدار ىزگىلىككە ءبىر تابان جاقىندايدى. بۇرىنعىدان گورى ەل ىشىندە كىتاپ وقۋعا بەتبۇرىس بار. قازىرگى كىتاپحانالار قانداي؟ كىرسە شىققىسىز, جارىق تا, جايلى. وتىرىپ, تۇرىپ, ءتىپتى, جانتايىپ جاتىپ وقيمىن دەسەڭ دە جاعدايدىڭ ءبارى جاسالعان. الدىڭنان شىققان كىتاپحاناشى قىزمەت كورسەتىپ بايەك بولادى. ادەبيەتتەردى سۇراساڭ, ءجون سىلتەيدى, ناقتى تاپسىرىس بەرسەڭ دانالاردىڭ, عالىمداردىڭ, بىلگىشتەردىڭ تاجىريبەسىن تياناقتاعان جيناقتاردى ءۇيىپ-توگىپ ۇسىنادى. قارايسىڭ, وقيسىڭ, تاڭدايسىڭ, تالعايسىڭ. ايتەۋىر وزباساڭ, قاتاردان قالمايسىڭ. تەك قانا ءوزىڭنىڭ تاباندى ەرىك-جىگەرىڭ جەتسىن. قالعان جاعدايدىڭ ءبارى تۇر. سىزگە كىم كەرەك بولدى ەكەن؟ اباي مەن شاكارىم بە, الدە تولستوي مەن چەحوۆ پە؟ مۇمكىن شپەنگلەر مەن شوپەنگاۋەردىڭ ەڭبەكتەرى شىعار؟ مۇندا ءبارى تابىلادى. بولماعان كۇننىڭ وزىندە ىزىنە ءتۇسىپ, باعىت الاسىز. ويتكەنى مۇندا ءسىز جالعىز ەمەسسىز, تەجەلىپ قالمايسىز. قاسىڭىزدا كىتاپحاناشى بار, الەم عۇلامالارىنان بەلى قايىسقان سورەلەر مەن قابىرعالار, ينتەرنەت سىندى يگىلىكتەردىڭ بارلىعى ءسىز ءۇشىن تىنىمسىز قىزمەتكە كوشەدى. الەم كىتاپحانالاردىڭ ارقاسىندا ىزگىلىك پەن پاراساتتى ەسكە سالىپ تۇرعانداي سەزىلەدى.