مەملەكەت باسشىسى تۇرىكمەنستان حالك ماسلاحاتىنىڭ توراعاسىنا ىلتيپات ءبىلدىرىپ, ەلىمىزدىڭ رۋحاني استاناسى, تۇركى حالىقتارىنا ورتاق قاسيەتتى مەكەن سانالاتىن تۇركىستان قالاسىنا ساپارمەن كەلگەنى ءۇشىن ريزاشىلىعىن جەتكىزدى, دەپ حابارلايدى Egemen.kz.
قاسىم-جومارت توقاەۆ گۋربانگۋلى بەردىمۇحامەدوۆتى حالىقارالىق بەيبىتشىلىك جانە سەنىم جىلىنىڭ باستالۋىمەن قۇتتىقتادى. ونىڭ ايتۋىنشا, بۇۇ قولداعان بۇل باستاما تۇرىكمەنستاننىڭ الەمدىك دەڭگەيدەگى ابىروي-بەدەلى جوعارى ەكەنىن كورسەتەدى.
حالك ماسلاحاتىنىڭ توراعاسى مەملەكەت باسشىسىنا كيەلى تۇركىستاندا قوناقجايلىق تانىتقانى ءۇشىن العىس ايتتى. سونىمەن قاتار قازاقستان تۇرىكمەنستاننىڭ ەڭ نەگىزگى ستراتەگيالىق سەرىكتەستەرىنىڭ ءبىرى ەكەنىن جەتكىزدى.
«ەكى ەل اراسىنداعى ساياسي, ساۋدا-ەكونوميكالىق جانە مادەني-گۋمانيتارلىق سالالارداعى قارىم-قاتىناستاردىڭ بولاشاعى مول. بۇۇ اياسىندا حالىقارالىق بەيبىتشىلىك پەن سەنىم جىلىن جاريالاۋ جونىندەگى تۇرىكمەنستاننىڭ باستاماسىنا قولداۋ بىلدىرگەنىڭىز ءۇشىن ريزاشىلىعىمدى بىلدىرەمىن», دەدى گۋربانگۋلى بەردىمۇحامەدوۆ.كەزدەسۋ بارىسىندا ەكىجاقتى قارىم-قاتىناستاردىڭ بارلىق باعىتى بويىنشا سان قىرلى ستراتەگيالىق سەرىكتەستىكتى نىعايتۋ پەرسپەكتيۆاسى تالقىلاندى. ءوزارا ساۋدا-ساتتىق كولەمىن 1 ميلليارد دوللارعا جەتكىزۋ ءۇشىن بايلانىستاردى دامىتۋدىڭ تىڭ مۇمكىندىكتەرىن قاراستىرۋ قاجەتتىگى اتاپ ءوتىلدى.